Dya Kayadi Dya Jisobha 18:1-37
18 Ku muvu wa katatu wa utuminu wa Ozeya, mon’a Elahe sobha ya Izalayele, Ezekiya mon’a Akaji sobha ya Judá, wakituka sobha.
2 Mwene wexile ni makwinyi ayadi ni kitanu kya mivu kyoso kyakituka sobha, yu watumina mu makwinyi ayadi ni divwa dya mivu mu Jeluzaleme. O dijina dya manyâ dyexile Abiya mon’a Zakadiya.
3 Mwene wexile mubhanga ima yambote bhu pholo ya Jihova, kala kyabhangele kukwê Davidi.
4 Mwene wabulu o ididi ya kubhezela, wabulu o jiphiladi ni iteka.* Wabulu we o kiteka kya nyoka ya ngondo kyabhangele Mozé, kuma mu thembu yenyoyo o mundu wa Izalayele kwene kwexile mu bandesa o dixi dya jisata, ya exile mu kixana kiteka kya nyoka ya ngondo.*
5 Ezekiya wa dyelele kwa Jihova o Nzambi ya Izalayele, kikwexile muthu wasokele-nê ku jisobha joso ja Judá, kikale yó a mudyangele, kikale yó a mukayele.
6 Mwene kaxisa Jihova, wa dikwatenena kwa mwene. Ezekiya wabelesela o itumu yabhanene Jihova bhukaxi ka Mozé.
7 Jihova wexile jinga-nê. Mwene wexile mubhanga o ima yoso ni unjimu. Mwene wabhukumukina o sobha ya Asídya yu waditunu ku musidivila.
8 Ezekiya watolola akwa Fidíxa kate ku Ngaza ni jimbambe jê, tunde ku inzo ya matala ya alangidi kate mu mbanza yala ni ilumbu.*
9 Ku muvu wa kawana wa sobha Ezekiya, kifwa o muvu wa kasambwadi wa utuminu wa Ozeya mon’a Elahe sobha ya Izalayele, Salamanazale sobha ya Asídya weza mubhânga ni akwa Samadiya, yu wakondoloka o mbanza.
10 Mu kubhita mivu itatu ene atambula o mbanza. O mbanza ya Samadiya a itambula ku muvu wa kasamanu wa utuminu wa Ezekiya, wexile we o muvu wa kavwa wa utuminu wa Ozeya sobha ya Izalayele.
11 Mukusuluka, o sobha ya Asídya wambata akwa Izalayele ku ubhika ku Asídya, yu wa abhangesa kutunga ku Hala ni Habole bhwa zukamene o ngiji ya Ngozane ni mu jimbanza ja akwa Medya.
12 Kiki kyabhiti mukonda ene kévu o dízwi dya Jihova Nzambi yâ, kakumbidila o kikutu kyê, kifwa, yoso ya tendelesele Mozé o selevende ya Jihova. Ene kamwivu, ya asuluka ni ku mubhukumukina.
13 Ku muvu wa dikwinyi ni kiwana wa utuminu wa sobha Ezekiya, Senakedibe sobha ya Asídya weza mubhânga ni akwa Judá yu watambula o jimbanza jexile ni ilumbu.
14 Kyenyiki, Ezekiya sobha ya Judá, watumina kutangela o sobha ya Asídya ku Lakiji, mu kwamba: “Ngalweza. Tunda mu ixi yami, nganda kubhana yoso i wanda ngibhinga.” Bhenyobho, sobha ya Asídya wajijidika Ezekiya sobha ya Judá ku mufuta lubhaku lwa hâma jitatu ja jitalendu* ja phalata ni makwinyi atatu a jitalendu ja ulu.
15 Mukiki-phe, Ezekiya wabhana o phalata yoso yexile mu inzo ya Jihova, ni ima yoso yavalolo yexile mu inzo* ya sobha.
16 Mu thembu yenyoyo, Ezekiya sobha ya Judá wakatula o mbandu jiyadi ja dibhitu ja fwamesa* mwene, ni mabhitu a tembulu ya Jihova, yu wajibhana kwa sobha ya Asídya.
17 Sobha ya Asídya watumikisa Talatana,* Labesadi* ni Labesaki* kumoxi ni kifuxi kya masoladi kyakexile ku Lakiji, kwa sobha Ezekiya mu Jeluzaleme. Ene ayi kate mu Jeluzaleme ya exile bhwa zukama o kixima kyadikota, mu kikoka kyabhitila ku kididi kya mukwa kusukula o izwatu.
18 Kyoso kyexana o sobha phala kwiza bhwexile ene, Eliyakimi mon’a Hilikiya wexile mutambula o konda ya dibhata,* Sebena o seketa, ni musoneki Jowa mon’a Azafe, ayi mudisanga nawu.
19 Labesaki wa ambela wixi: “Tangelenu Ezekiya mwixi: ‘Kiki kyene kyambe o sobha yadikota, o sobha ya Asídya: “Wadyelela mu kima kyahi?
20 Eye wamuzwela: ‘Eme ngala ni ndunge ni kutena kwa kubhânga mu ita,’ maji yiyi izwelu yahatu ngo. Nanyi wa mudyelela phala kukala ni izala yiyi ya ku ngibhukumukina?
21 Tala, eye wadyelela o mbangala ya Ijitu yabukuka, yabhingi kwila se o muthu udifikidila-ku yene i mubokwena bhu kanda dya lukwaku, he i mutundila ku kanga? Kyene kyala Falawó o sobha ya Ijitu, ku athu oso yó a mudyelela.
22 Se mu ngambela, mwixi: ‘Twadyelela kwa Jihova Nzambi yetu.’ O ididi ya kubhezela ni jikalatódyu jabulu Ezekiya ki ja mutokala kyoso kyambe ku akwa Judá ni akwa Jeluzaleme: ‘O kwila enu mwatokala kufukamena o kalatódyu kala mu Jeluzaleme?’”
23 Kindala ta kikutu ni ngana yami o sobha ya Asídya: Eme nganda kubhana midi jiyadi ja jikabalu se usanga mayala asoko phala ku jendesa.
24 Ne mwene se akwa Ijitu akubhana o makalu a ita ni jikabalu, o kwila eye weji tena kutolola kate mwene o kilamba kyofele mwaxaxi ka jiselevende ja ngana yami?
25 O kwila ngeza mubwika o kididi kiki sé Jihova ku ngituma? Jihova mwéne wa ngitumina mu kwamba: ‘Ndé, ubwike o ixi yiyi.’”
26 Mukonda dyakiki, Eliyakimi mon’a Hilikiya, ni Sebena ni Jowa, ambela Labesaki, exi: “Zwela ni jiselevende jé mu dimi dya Halamayiku* mukonda etu twejiya kuzwela o dimi didi. Kana kuzwela mu dimi dya jijudé mukonda o mundu wala ku thandu dya ilumbu a mukwivwa.”
27 Maji Labesaki wa ambela: “O kwila o izwelu yiyi a ngitumina ku itangela ngo eye ni ngana yé? Kangitumu we ku itangela ku mayala axikama ku ilumbu, anda dya o tuji twâ ni kunwa o masu mâ kumoxi n’enu?”
28 Bhenyobho, Labesaki wadikola ni dízwi dyaswina mu dimi dya Jijudé, wixi: “Ivwenu o izwelu ya sobha yadikota, o sobha ya Asídya.
29 Kiki kyene kyambe o sobha: ‘Kanenu kwehela Ezekiya ku minganala, kuma mwene katena ku mibhulula ku mak’wami.
30 Ezekiya ka mibhangese kudyelela kwa Jihova mu kwamba: ‘Ni kidi kyoso Jihova wanda tubhulula, o mbanza yiyi kanda ibhakula bhu maku a sobha ya akwa Asídya.’
31 Kanenu kwivwa Ezekiya, kuma o sobha ya Asídya wambe kiki: “Bhangenu paze n’eme, ngitumakyenu.* Se mu kibhanga, kala muthu wanda tena kudya ku muxi wê wa muvidi, ni ku muxi wê wa mufiku ni kunwa menya a kixima kyê,
32 kate ki ngiza anga ngi myambata mu ixi yedi kala o ixi yenu, ixi ibhana jimbutu ni vinyu ya ubhe. Ixi ibhana mbolo ni mividi, ixi ibhana midiva ni wiki. Enu mwanda nangenena ku mwenyu, kimwanda fwa kana. Kanenu kwivwa Ezekiya, kuma mwene wa mu minganala, mu kwamba: ‘Jihova wanda tubhulula.’
33 Ku jinzambi ja ifuxi, o kwila sayi-ku nzambi wabhulula o ixi yê bhu maku a sobha ya Asídya?
34 Kwebhi kwala o jinzambi ja akwa Hamati ni Alapade? Kwebhi kwala o jinzambi ja akwa Sefalavayime ni ja akwa Hena ni Iva? O kwila ene atena kubhulula o mbanza ya Samadiya bhu mak’wami?
35 Ku jinzambi joso ja jixi jiji, o kwila sayi-ku nzambi watena kubhulula o ixi yê bhu mak’wami? Mukiki-phe o kwila Jihova wanda bhulula Jeluzaleme bhu mak’wami?”’”
36 Maji-phe o mundu wadixibha, kazwela né ngo kima, kuma o kitumu kya sobha kyambele: “Kanenu ku mutambwijila.”
37 Kyenyiki-phe, Eliyakimi mon’a Hilikiya wexile mulanga o dibhata* ni Sebena o seketa ni musoneki Jowa mon’a Azafe, ayi kwa Ezekiya ni izwatu yotandujule, ya a mutangela yoso yazwela Labesaki.
Footnotes
^ Tala o Dilombolwelu.
^ Mba, “exile mu kixana Nehutane.”
^ Kifwa, mu ididi yoso, kikale o ididi mwala athu avulu mba athu ofele.
^ Talendu imoxi yasokele 34.2 ya jikilu.Tala o Kiba. B14.
^ Mba, “mbonge.”
^ Kifwa, jofwamese ni ulu.
^ Mba, “kabhitangu.”
^ Mba, “o kabhitangu ka dyanga.”
^ Mba, “o mutwameni wa jikopelo.”
^ Mba, “mbonge.”
^ Mba, “dya akwa Sidya.”
^ Mu Heba.: “bhangenu dibesa n’eme he mutunde.”
^ Mba, “mbonge.”
