Dya Kayadi Dya Jisobha 20:1-21
20 Mu izuwa yenyoyo, Ezekiya wakatele. O uhaxi wenyo weji mubhangesa kufwa. Polofeta Izaya mon’a Amonji wayi muzwela-nê yu wa mwambela wixi: “Jihova wambe kiki: ‘Bhana itendelesu ku akwa dibhata dyé, mukonda eye wanda fwa, kiwanda disanza, kana.’”
2 Kyoso mwene kyakívu, walunguluka, wabhilula o pholo ku phalelu, yu wamateka o kusamba kwa Jihova:
3 “Jihova tata, ngakudyondo, lembalala kwila ngene mukwenda jinga mu jinjila jé ni ufiyele woso ni muxima woso, ngene mubhanga ima yambote bhu pholo yé.” Ezekiya anga udila kyavulu.
4 Ande mwene dya Izaya kubhixila mu kaxi ka kithádi kya inzo ya sobha, Jihova wa mwambela, wixi:
5 “Vutuka, utangele Ezekiya o mutwameni wa mundu wami, wixi: ‘Kiki kyene kyambe Jihova o Nzambi ya kukwé Davidi: “Ngevu o musambu wé, ngamono o masoxi mé. Mukonda dyakiki nganda kusaka, mu kizuwa kya katatu eye wandaya mu inzo ya Jihova.
6 Nganda kwehela kukala dingi ku mwenyu mu dikwinyi ni kitanu kya mivu, nganda kubhulula ni kubhulula o mbanza yiyi bhu maku a sobha ya Asídya. Nganda zokela o mbanza yiyi mukonda dyami-eme ni mukonda dya selevende yami Davidi.”’”
7 Bhenyobho, Izaya wambe, wixi: “Bhekenu mbwenga mwala o jifiku jakukuta.”* Kyenyiki, eza-nayu ya a itula ku thandu a mabhumbu, mwene wayi ni kudisanza bhofele-bhofele.
8 Ezekiya webhwidisa Izaya, wixi: “Kyebhi o kijimbwete kya kwila Jihova wanda ngisaka, ni kwila mu izuwa itatu ngandaya mu inzo ya Jihova?”
9 Izaya wa mutambwijila, wixi: “Kiki kyene o kijimbwete kya Jihova phala ku kulondekesa kwila Jihova wanda kumbidila o kizwelu kyê: Eye wamesena kwila o kilembeketa kisomboka dikwinyi dya maxikata* inga kivutuka dikwinyi dya maxikata?”
10 Ezekiya wambe, wixi: “Kikubhonzo phala o kilembeketa kusomboka dikwinyi dya maxikata, maji kibhonza kuvutuka dikwinyi dya maxikata.”
11 Polofeta Izaya wasambe kwa Jihova, Mwene anga ubhangesa kwila o kilembeketa kyasombokele kya o maxikata a inzo ya Akaji, kivutuka dingi dikwinyi dya maxikata.
12 Mu izuwa yenyoyo, o sobha ya Babilonya Belodake-Baladane, mon’a Baladane watumikisa mikanda ni ujitu kwa Ezekiya, kuma wevwile kwila Ezekiya wexile mukata.
13 Ezekiya wa atambulula* yu wa alondekesa o umvwama woso wexile mu inzo yê, phalata, ulu, máji a mazumba ni máji akamukwa a valolo, o mauta mê ni umvwama wê woso. Ezekiya wa alondekesa o ima yoso mu dibhata* dyê ni mu utuminu wê. Kibhukexile kima kyakambele kwalondekesa.
14 Mukubhita o ima yiyi, polofeta Izaya wayi muzwela ni sobha Ezekiya, yu wa mwibhwidisa: “O mayala yá atundu kwebhi ni ihi ya kutangela?” Ezekiya wa mutambwijila, wixi: “Ene atundu dikanga, mu ixi ya Babilonya.”
15 Kyenyiki, mwene wa mwibhwidisa: “Ihi yamono ene mu inzo* yé?” Ezekiya wa mu vutwila, wixi: “Ene amono yoso yala mu inzo* yami. Kikukambe kima ku umvwama wami u ngakambe ku alondekesa.”
16 Izaya wambela Ezekiya, wixi: “Ivwa yazwela Jihova:
17 ‘Tala, kwanda kwiza kizuwa, yoso yala ku dibhata* dyê ni yoso yabhake o jikuku jê kate mu kizuwa kya lelu, anda yambata ku Babilonya. Kikwanda subhuka kima, Jihova mwene wa kyambe.
18 Amoxi ku twana twé tu wanda vwala anda ku ambata ku ubhika, anga akituka ilamba mu mbonge ya sobha ya Babilonya.’”
19 Kyenyiki, Ezekiya wambela Izaya, wixi: “O kizwelu kya Jihova ki wa ngitudila kyawabha mwene.” Yu wabandekesa-ku, wixi: “Kyawabha, mukonda kwanda kala paze ni kutuluka mu kithangana kyoso ki nganda kala ku mwenyu.”*
20 O ima ya mukwa ya musoso wa Ezekiya, o kutena kwê, kyebhi kyakande o kixima kya menya ni mulombo ni kubheka o menya mu mbanza, a isoneka mu divulu dya misoso ya izuwa ya jisobha ja Judá.
21 Mukusuka-ku Ezekiya wafu, o mon’ê Manasa mwene wakituka sobha bhu kididi kyê.
Footnotes
^ Mba, “bolo ya jifiku jakukuta.”
^ Nange o maxikata yá, exile phala kukondala o thembu, kala kibhita ni lelojo ya dikumbi.
^ Mba, “wa evu.”
^ Mba, “mbonge.”
^ Mba, “mbonge.”
^ Mba, “mbonge.”
^ Mba, “mbonge.”
^ Mu Heba.: “mu izuwa yami.”
