Dya Kayadi Dya Jisobha 21:1-26
21 Manasa wexile ni dikwinyi ni kiyadi kya mivu, kyoso mwene kyamateka kutumina kala sobha. Mwene watumina mu makwinyi atanu a mivu ni kitanu mu Jeluzaleme. O dijina dya manyá dyexile Hefeziba.
2 Mwene wabhange ima yayibha bhu pholo ya Jihova mu kukayela o ima yayibha yexile mubhanga o ifuxi yakayesa Jihova bhu pholo ya Izalayele.
3 Mwene watungulula dingi o ididi ya kubhezela yabwikile kya tat’ê Ezekiya, watungu kalatódyu phala Bahale yu wabhange we kiteka* phala ku kibheza kala kyabhangele Akabe sobha ya Izalayele. Mwene wafukamena o jithethémbwa joso ja dyulu, yu wa jibheza.
4 Watungu we kalatódyu mu inzo ya Jihova, o inzo yazwelele Jihova kwila: “Mu Jeluzaleme mwene mu nganda ta o dijina dyami.”
5 Manasa watungu we jikalatódyu phala o ifuxi yoso ya jithethémbwa ku dyulu mu kithádi kya inzo ya Jihova.
6 Woha* mon’ê mu túbhya, wabhange ima ya wanga, wasoto kwijiya o ima yanda bhita ku hádya bhukaxi ka ijimbwete, wakexile we ni azambwidi ni imbanda. Mwene waswina mu kubhanga ima yayibhila Jihova phala ku muthathamesa.
7 Manasa, wabhange we kiteka *phala ku kibheza, yu wakite mu inzo ya Jihova, o inzo yazwelele mwene kwa Davidi ni kwa mon’ê Solomá, wixi: “Mu inzo yiyi yala mu Jeluzaleme i ngasolo mwaxaxi ka ifuxi yoso ya Izalayele, nganda ta-mu o dijina dyami kate ku hádya ni hádya.
8 Nuka nganda bhangesa dingi akwa Izalayele kunyunga dikanga dya ixi i ngabhana ku jikuku jâ, se ene abelesela yoso i nga atumu ni ku kumbidila o Kitumu kya abhana o selevende yami Mozé.”
9 Maji ene kabelesela, Manasa wasuluka ni ku a nganala, mu ku afunyisa kubhanga ima yayibha kinene, o yabhangele o ifuxi yakaye Jihova bhu pholo ya akwa Izalayele ndenge.
10 Jihova wasuluka mu kuzwela nawu bhukaxi ka jiselevende jê o jipolofeta, mu kwamba:
11 “Manasa, sobha ya Judá wabhange o ima yoso yiyi yayibha kinene. O ima yayibha yabhange mwene yatúndu o ima yabhangele akwa Mamodi atungile bhenyobho ande dya mwene. Ni iteka yê yayibha, mwene wabhangesa akwa Judá kuta kituxi.
12 Kyenyiki, Jihova o Nzambi ya Izalayele wambe kiki: ‘Nganda bheka wíndwa mu Jeluzaleme ni mu Judá, wanda bhangesa kwila, woso wivwa, u diwana.
13 Nganda fundisa Jeluzaleme kala ki ngafundisa Samadiya, nganda bhanga kala ki ngabhangele we ku inzo ya Akabe. Nganda zelesa Jeluzaleme kala kyazelesa o ditijela, mu kudisukula ni kudibhilula ni dikanu bhoxi.*
14 O yá asubhuka ku undundu wami, nganda kwa ehelela, nganda kwabhakula bhu maku a jinguma jâ. Ene anda kwa ambata kala abhika, anda kwatambula o ima yâ ku jinguma jâ.
15 Mukonda ene abhange ima yayibha ku mesu ami, ya asuluka ni kubhanga ima phala ku ngithathamesa, tunde o kizuwa kyatundu o jikuku jâ ku Ijitu, kate mu izuwa ya lelu.’”
16 Manasa wazunzumuna we manyinga avulu a athu kexile ni kikuma. Mwene wajibha athu avulu tunde ku dimatekenu dya mbanza ya Jeluzaleme ndu kwasukina o mbanza. Mwene wate we o kituxi kya kufwinyisa akwa Judá kuta ituxi ni kubhanga ima yayibha bhu pholo ya Jihova.
17 O ima ya mukwa ya musoso wa Manasa, yoso yabhange ni ituxi yatele, a isoneka mu divulu dya misoso ya izuwa ya jisobha ja Judá.
18 Mukusuka-ku, Manasa wafu ya a mufundila mu njaludim ya inzo yê, o njaludim ya Uza. Mon’ê Amone mwene wakituka sobha bhu kididi kyê.
19 Amone wakexile ni makwinyi ayadi ni kiyadi kya mivu, kyoso kyakituka sobha. Mwene watumina mu mivu iyadi mu Jeluzaleme, o dijina dya manyâ dyexile Mezulemete mon’a Haluze, mukwa Joteba.
20 Mwene wexile mubhanga ima yayibha bhu pholo ya Jihova kala kyabhangele tat’ê Manasa.
21 Mwene wasuluka mu kwenda mu jinjila ja tat’ê, wafukamena ni kubheza o iteka yexile mubheza tat’ê.
22 Kyenyiki, mwene waxisa Jihova, o Nzambi ya jikuku jê, kende mu njila ya Jihova.
23 Mukusuka-ku, sobha Amone a mulungulukila ku jiselevende jê, ya a mujibha mu inzo yê mwene.
24 Maji o mundu, wajibha o mayala oso alungulukile sobha Amone, ya abhangesa mon’ê Joziya kukituka sobha bhu kididi kyê.
25 O ima ya mukwa ya musoso wa Amone ni ima yabhange, a isoneka mu divulu dya misoso ya izuwa ya jisobha ja Judá.
26 Mukusuka-ku, a mufundu mu mbila yê mu njaludim ya Uza. O mon’ê Joziya mwene wakituka sobha bhu kididi kyê.
Footnotes
^ Tala o Dilombolwelu.
^ Mu Heba.: “wabhangesa mon’ê wa diyala kubhita mu tubhya.”
^ Tala o Dilombolwelu.
^ Mu dimi dya Hebalayiku kilombolola kwila Nzambi ukalakala ni jifalamenda ja kutunga phala kufundisa o mund wê.
