Dya Kayadi Dya Jisobha 22:1-20
22 Joziya wexile ni dinake dya mivu kyoso kyakituka sobha, yu watumina mu makwinyi atatu ni umoxi a mivu mu Jeluzaleme. O dijina dya manyâ dyexile Jedida mon’a Adaya mukwa Bozekate.
2 Joziya wabhange ima yambote bhu pholo ya Jihova, wende mu jinjila ja kukwê Davidi. Kabhambuka né ngo ku kadilu mba ku kyasu.
3 Ku muvu wa dikwinyi ni kanake wa utuminu wê, sobha Joziya watumikisa seketa Safani mon’a Azaliya, mon’a Melulane mu inzo ya Jihova, yu wambe:
4 “Nde utangele o mukunji wadikota Hilikiya kwila, abhongolole o kitadi kyoso kyabheka o mundu mu inzo ya Jihova, kyatambula o alangidi.
5 O kitadi atokala kukibhana kwa yó a mulanga o ikalakalu mu inzo ya Jihova. Mukusuluka, ene anda kibhana kwa yó a mubhanga o kikalakalu mu inzo ya Jihova, yó anda yudika* o inzo,
6 kifwa, o asongi a mabaya ni atungi. Ni kitadi kiki, ene anda sumba mabaya ni matadi o sete kyambote phala o inzo.
7 Maji-phe, katokala ku ajijidika kubhakula jikonda mu kitadi kya mu abhana, mukonda ene athu a kwadyelela.”
8 Ku pholo dya kwenda, o mukunji wadikota Hilikiya, wambela Safani o seketa, wixi: “Ngasange o divulu dya Kitumu mu inzo ya Jihova.” Kyenyiki, Hilikiya wabhana o divulu kwa Safani, mwene yu wamateka o kuditanga.
9 O seketa Safani wayi muzwela ni sobha yu wa mwambela, wixi: “O jiselevende jé abhongolola* o kitadi kyexile mu tembulu, ya akibhana kwa yó ala ku pholo dya ikalakalu mu inzo ya Jihova.”
10 O seketa Safani wambela we o sobha wixi: “O mukunji wadikota Hilikiya wa ngibhana divulu.” Kyenyiki, Safani wamateka kutanga o divulu bhu pholo ya sobha.
11 Kyoso sobha kyazubha kwivwa o izwelu ya divulu dya kitumu, watandula o izwatu yê.
12 Mukusuluka, sobha watendelesa Hilikiya o mukunji, Hayikane mon’a Safani, Akebolo mon’a Mikaya ni Safani o seketa ni Azayiya o selevende ya sobha, wixi:
13 “Ndenu, sotenu kwijiya o kibanzelu kya Jihova mu dijina dyami ni mu dijina dya mundu ni dya Judá yoso, yalungu ni izwelu yala mu divulu di twasange. Kuma Jihova watukwatela njinda yavulu, mukonda o jikuku jetu kabelesela o izwelu yala mu divulu didi, mukonda ene kabhange yoso yosoneke-mu phala etu.”
14 Bhenyobho, o mukunji Hilikiya ni Hayikane ni Akebolo ni Safani ni Azayiya, ayi mudikunda ni polofeta ya muhatu a mwixana Hulda. Mwene wexile muhatu wa Salume yó wexile ku pholo ya kididi kya kuzwata, mwene wexile mon’a Tikiva mon’a Hala. Hulda watungile mu Jeluzaleme mu Mbanza ya Ubhe.* Bhenyobho bhwene bhwa zwelele ni Hulda.
15 Hulda wambe, wixi: “Jihova o Nzambi ya Izalayele wambe kiki: ‘O diyala wa mitumikisa kokwami mu tangelyenu kiki:
16 “Jihova wambe: ‘O izwelu yoso yatange o sobha ya Judá mu divulu didi, nganda ikumbidila, nganda bheka divuwa bhu kididi kiki ni ku athu oso atungu-mu.
17 Mukonda ene a ngixisa ya a mubhakula jisata ku jinzambi jengi, phala ku ngithathamesa ni ikalakalu yoso ya maku mâ. O njinda yami yanda wama ku thandu dyâ kala o túbhya katena ku tujima.
18 Maji kiki kyene ki mwatokala kuzwela kwa sobha ya Judá, wa mitumikisa phala kwijiya o kibanzelu kya Jihova mu kwamba: “Jihova Nzambi ya Izalayele wambe kiki: ‘Yalungu ni izwelu i wevu,
19 kuma o muxima we waxikina,* eye waditulula bhu pholo ya Jihova, kyoso ki wevu o ima i ngazwela yalungu ni kididi kiki ni athu atungu-mu, kya kwila o athu eji diwana mu kumona o kididi kiki ni ku kitumbula mu kuloka kwâ. Maji eye watandula o kizwatu kyé, eye wadidi, eme wami ngakwivu.’ Kiki kyene kyambe Jihova.
20 Mukonda dyakiki, eye wanda dibunda kumoxi ni jikuku* jé, wanda fwa, anda kufunda ni kutululuka mu mbila yé, mukonda o mesu mé kanda tala o wíndwa u nganda bheka bhu kididi kiki.’”’”Kyenyiki, ene ayi ya atangela o maka yá kwa sobha.
Footnotes
^ Mba, “kuxita o misula ya.”
^ Mu Heba.: “alundulula.”
^ Mba, “ku Sanzala ya Kayadi.”
^ Mu Heba.: “wabeleketa.”
^ Sabhu phala kulombolola kufwa.
