Dya Kayadi Dya Jisobha 23:1-37
23 O sobha watumu kwixana o adyakime oso a Judá ni a Jeluzaleme.
2 Mukusuluka, o sobha wayi mu inzo ya Jihova kumoxi ni mayala oso a Judá ni athu oso akwa Jeluzaleme, o akunji ni jipolofeta, o mundu woso, tunde ku mwadyakime kate ku mona-ndenge. Mwene watange o izwelu yoso ya divulu dya kikutu, dyasangele mu inzo ya Jihova.
3 O sobha wemana bhu mbandu ya philadi, yu watange o kikutu bhu pholo ya Jihova, wakanena kukayela ni kubhaka o itumu ya Jihova, o itendelesu, o jingonge ni muxima wê woso, mu kukumbidila o izwelu yoso yosoneke mu divulu dya kitumu. O mundu woso waxikina o kikutu kyate mwene.
4 Sobha watumu o mukunji wadikota Hilikiya ni akunji amukwa ni alangidi a mabhitu, kukatula mu tembulu ya Jihova o itutu yoso yabhangele phala kubheza Bahale ni iteka* ni jithéthembwa joso ja dyulu. Mukusuluka, ayoha bhu kanga dya mbanza ya Jeluzaleme bhwa zukamene o mulundu wa Kidelone, yu wambata o utokwa ku Betele.
5 Kyenyiki, wazubha ni ikalakalu yoso ya akunji a jinzambi ja jixi jengi, a asolele ku jisobha ja Judá phala kubandesa dixi dya jisata mu ididi ya kubhezela mu jimbanza ja Judá ni mu ididi ya zukamene ni Jeluzaleme. Wazubha we ni ikalakalu ya yó akwa kubandesa dixi dya jisata phala Bahale, phala o dikumbi, phala o mbeji ni jithéthembwa joso ja dyulu.
6 Mwene wakatula o kiteka* kyexile mu inzo ya Jihova, wa kyambata bhu kanga dya mbanza ya Jeluzaleme, yu wayi nakyu mu honga ya Kidelone. Wakyoha mu honga ya Kidelone kate ki kyakituka utokwa, o utokwa wa u mwange ku thandu dya jimbila.
7 Wabulu we o jinzo ja idyanzunga ya mayala a tembulu, jakexile mu inzo ya Jihova. Mu jinzo jiji mwene mwexile o ahatu exile mu tunga o jitenda, exile mu jibhanga kala jikalatódyu phala o iteka.*
8 Mwene wakaye o akunji oso mu jimbanza ja Judá, yu wabhangesa kwila o ididi mwexile mubhezela o akunji enya ni kuhabesa o dixi dya jisata, tunde ku Jeba kate ku Beleseba ki ifwama dingi phala kubhanga-mu o ima yenyiyi. Wabulu we o ididi ya kubhezela, yakexile ku dibokwenu dya mwelu wa Jozuwé, o mutwameni wa mbanza, dyexile ku mbandu ya kyasu mu dibokwenu dya mbanza.
9 O akunji a ididi ya kubhezela kakexile mu sidivila bhu kalatódyu ka Jihova mu Jeluzaleme, maji exile mudya o jimbolo ja kambe o felemendu kumoxi ni jiphange jâ.
10 Wabhangesa we kwila, o kididi kya kubhezela kya Tofete kyala mu honga ya Hinome,* kikifwame dingi phala kubhezela-mu, phala kibhukale muthu woha* mon’ê wa diyala mba wa muhatu mu túbhya phala Moloke.
11 Mwene wafidisa o jikabalu jabhakwile* o jisobha ja Judá ku dikumbi, kubokona mu inzo ya Jihova bhukaxi ka mwelu* wa Natane-Meleke, o fixiyadi ya mbonge ya sobha, wakexile mukala mu mbalanda. Mwene woha o makalu a ita abhakula ku dikumbi.
12 Wabulu we o jikalatódyu ja jisobha ja Judá, jabhangele ku ditala dya inzo mu dixilu dya thunda dya Akaji, ni jikalatódyu jabhangele Manasa mu ithádi iyadi ya inzo ya Jihova. Wajibulu kate ki jakituka fufuta, yu wamwange o fufuta mu honga ya Kidelone.
13 O sobha wabhangesa kwila o ididi ya kubhezela ya zukamene ni Jeluzaleme, yexile ku mbandu ya lwiji* ku mulundu wa Kibwikilu,* ya tungile Solomá o sobha ya Izalayele phala kubhezela-mu Axitolote o nzambi ya muhatu yayibha kinene ya akwa Sidónya ni Kemoji, o nzambi yayibha ya akwa Mowabe ni Milikome, o nzambi yayibha ya akwa Amone.
14 Mwene wabulu o jiphiladi, wabatujula o iteka,* yu wezalesa o ididi ni ifuba ya athu.
15 Wabulu o kalatódyu kexile ku Betele ni kididi kya kubhezela-mu kyabhangele Jelobowamu mon’a Nebate, kyabhangesa Izalayele kuta ituxi. Kyoso kyazubha o kubula o kalatódyu kaka ni kididi kya kubhezela, mwene wate túbhya mu kididi kya kubhezela kate ki kyakituka utokwa, yu woha we o kiteka.*
16 Kyoso Joziya kyabhiluka kudima, wamono jimbila jakexile ku mulundu, watumina kukatula o ifuba yu wa yoha ku kalatódyu mu kubhangesa kwila kene kikafwame dingi phala kubhezela-mu kala kyazwelele Jihova bhukaxi ka diyala dya Nzambi yakidi.
17 Mukusuluka, mwene webhwidisa: “O mbila yoyo ya nanyi?” O mayala a mbanza a mutambwijila: “O mbila yoyo ya diyala dya Nzambi yakidi mukwa Judá, wakanena o ima i wabhange mu kalatódyu ka Betele.”
18 Kyenyiki, mwene wambe: “Kikukale muthu u kwata ku ifuba yê, ehenu-yu kala kiyala.” Mukiki-phe, séku muthu wazambesa ku ifuba yê mba ku ifuba ya polofeta watundile ku Samadiya.
19 Joziya wabulu we o jikalatódyu joso mu ididi ya kubhezela mu mbanza ya Samadiya jabhangele o jisobha ja Izalayele phala kuthathamesa Nzambi. Mwene wabulu o jikalatódyu jiji kala kyabhangele ni kalatódyu ku Betele.
20 Kyenyiki, mwene wajibha o akunji oso ku jikalatódyu jexile mu ididi ya kubhezela, yu wohela-ku o ifuba ya athu. Mukusuluka, wavutuka mu Jeluzaleme.
21 O sobha watendelesa o mundu mu kwamba: “Bhangenu o fesa ya phasu phala Jihova Nzambi yenu, kala kyosoneke mu divulu didi dya kikutu.”
22 Tunde mu izuwa ya afundixi, kyoso kyexile mufundisa akwa Izalayele, ndu mu izuwa ya jisobha ja Izalayele ni ja Judá, kabhangele luwa fesa ya phasu kala yiyi.
23 Maji ku muvu wa dikwinyi ni kanake wa utuminu wa sobha Joziya, abhange o fesa yiyi ya Phasu phala Jihova mu mbanza ya Jeluzaleme.
24 Joziya wajibha we o imbanda ni akwa kuzambula, yu wabwika we o iteka yexile ku mabhata mâ ni iteka yayibha ni ima yayibha yakexile mu ixi ya Judá ni mu Jeluzaleme. Mwene wabhange o ima yiyi phala kukumbidila o izwelu yala mu divulu dya Kijila dyasange o mukunji Hilikiya mu inzo ya Jihova.
25 Ande dya mwene, kikwexile sobha wasokela-nê wasidivila Jihova ni muxima wê woso ni mwenyu we woso ni nguzu yê yoso, mu kukumbidila o Kijila kya Mozé. Ku pholo dya kwenda kikumoneka we sobha wasokele-nê.
26 Maji o njinda ya Jihova ku akwa Judá kiyabhwile hanji, mukonda dya ima yayibha yabhangele Manasa phala ku mu thathamesa.
27 Jihova wambe kiki: “Nganda sandula Judá bhu pholo yami, kala ki ngasandula Izalayele. Nganda dituna o mbanza ya Jeluzaleme i ngasolo ni inzo i ngambe: ‘O dijina dyami dyanda nangenena mwenyomo.”’
28 O ima ya mukwa ya musoso wa Joziya ni yoso yabhangele, a isoneka mu divulu dya misoso ya izuwa ya jisobha ja Judá.
29 Mu izuwa yenyoyo, Falawó dya Neku sobha ya Ijitu wayi mubhânga ni sobha ya Asídya bhwa zukamene o ngiji ya Ewufalate. Sobha Joziya watundu phala kubhânga ni Falawó dya Neku, maji kyoso Neku kya mumono ku Mejidu, wa mujibha.
30 Kyenyiki, o jiselevende jê akwata o kimbi ku Mejidu ya akite mu dikalu dya ita, akyambata ku Jeluzaleme, ya a mufundu mu mbila yê. O mundu anga a unda Jowakaji mon’a Joziya kala sobha bhu kididi kya tat’ê.
31 Jowakaji wexile ni makwinyi atatu ni kiyadi kya mivu kyoso kyakituka sobha, yu watumina mu mbeji jitatu mu Jeluzaleme. O dijina dya manyâ dyexile Hamutale mon’a Jelemiya mukwa Libina.
32 Mwene wexile mubhanga ima yayibha bhu pholo ya Jihova, kala kyabhangele o jikuku jê.
33 Falawó dya Neku wa mukutu ku Libala mu ixi ya Hamati, phala ku mufidisa o kutumina mu Jeluzaleme, yu wajijidika o athu akwa jixi jenyojo ku mufuta hama ya jitalendu* ja phalata ni talendu imoxi ya ulu.
34 Falawó dya Neku, wabhangesa kwila Eliyakimi mon’a Joziya ukituka sobha bhu kididi kya tat’ê Joziya, yu wa muluku dijina dyengi dya Nzoyakimi, maji wakwata Jowakaji yu wa mwambata ku Ijitu, mwene wafwila kwenyoko.
35 Nzoyakimi wabhana o ulu ni phalata kwa Falawó, maji phala kubhana o kitadi kya mubhingi Falawó, mwene wakobhalala lubhaku ku mundu. Mwene waxindi o valolo yatokalele kubhana kala muthu ku mundu, yalungu ni phalata ni ulu, phala ku ibhana kwa Falawó dya Neku.
36 Nzoyakimi wexile ni makwinyi ayadi ni kitanu kya mivu kyoso kyakituka sobha, yu watumina mu dikwinyi ni umoxi dya mivu mu Jeluzaleme. O dijina dya manyâ dyexile Zabuda mon’a Pedaya mukwa Luma.
37 Mwene wexile mubhanga ima yayibha bhu pholo ya Jihova, kala kyabhangele o jikuku jê.
Footnotes
^ Tala o Dilombolwelu.
^ Tala o Dilombolwelu.
^ Tala Dilombolwelu.
^ Tala o Dilombolwelu. “Njena.”
^ Mu Heba.: “ubhitisa mon’ê wa diyala mba wa muhatu mu túbhya.”
^ Mu Heba.: “ja bhanene.”
^ Mba, “kididi kya kúdila.”
^ Mu Heba. “kukadilu.” Kifwa ku mbandu ya lwiji, kyoso o muthu kyalungila o pholo yê ku mbandu kutundila o dikumbi.
^ Kifwa, o mulundu wa Midiva, benge-benge o mbandu ya lwiji. A wijiya we kala mulundu wa Jindaka.
^ Tala o Dilombolwelu.
^ Tala o Dilombolwelu.
^ Talendu imoxi yasokele 34.2 ya jikilu.Tala o Kiba. B14.
