Dya Kayadi Dya Jisobha 24:1-20
24 Mu izuwa ya Nzoyakimi, Nabukodonozolo sobha ya Babilonya weza phala kubhânga ni mwene, Nzoyakimi anga ukituka selevende yê mu mivu itatu. Maji mwene wabhukumukina Nabukodonozolo, yu wa mulungulukila.
2 Maji Jihova wamateka kutumikisa ifuxi ya masoladi akwa Kaladeya, akwa Sídya, akwa Mowabe ni akwa Amone phala kubhânga ni Nzoyakimi. Mwene wasuluka mu ku atumikisa phala kubwika akwa Judá, kala kyazwelele Jihova bhukaxi ka jiselevende jê, o jipolofeta.
3 Jihova mwéne wabhangesa o ima yiyi kubhita ni akwa Judá, phala ku asondolola bhu pholo yê, mukonda dya ituxi yatele Manasa,
4 ni mukonda dya mwene kujibha athu kexile ni kikuma. Kuma mwene wezalesa Jeluzaleme ni manyinga a athu kexile ni kikuma. Jihova kamesenene kuloloka akwa Judá.
5 O ima ya mukwa ya musoso wa Nzoyakimi ni yoso yabhangele, a isoneka mu divulu dya misoso ya izuwa ya jisobha ja Judá.
6 Mukusuka-ku, Nzoyakimi wafu, o mon’ê Nzowaki wakituka sobha bhu kididi kyê.
7 O sobha ya Ijitu nuka dingi watundile mu ixi yê, mukonda o sobha ya Babilonya watambula o ima yoso yatokalele kwa sobha ya Ijitu, tunde ku honga ya Ijitu kate ku ngiji ya Ewufalate.
8 Kyoso Nzowaki kyamateka o kutumina wexile mu kitala kya dikwinyi ni dinake dya mivu, mwene watumina mu mbeji jitatu mu Jeluzaleme. O dijina dya manyâ dyexile Newusta mon’a Elenatane, mukwa Jeluzaleme.
9 Mwene wexile mubhanga ima yayibhila Jihova, kala kyabhangele tat’ê.
10 Mu izuwa yenyoyo, o masoladi a Nabukodonozolo sobha ya Babilonya ayi mu Jeluzaleme, ya akondoloka o mbanza.
11 Nabukodonozolo o sobha ya Babilonya weza kate mu mbanza, kyoso o masoladi mê kya ikondolokele.
12 Nzowaki sobha ya Judá wadibhakula kwa sobha ya Babilonya kumoxi ni manyâ ni jiselevende jê ni jifixiyadi ni ilamba ya inzo ya sobha. O ku muvu wa kanake wa utuminu wa sobha ya Babilonya, mwene wa ambata ku ubhika.
13 Kyenyiki, mwene wakatula o ima yoso yavalolo mu inzo ya Jihova ni ima yoso yavalolo mu inzo* ya sobha. O itutu yoso ya ulu yabhangele Solomá, o sobha ya Izalayele phala o tembulu ya Jihova, mwene wa ibula-bula kala kya kanene Jihova.
14 Mwene wambata o athu oso a Jeluzaleme ku ubhika, o ilamba, o mazonda a ita ni asongi a mabaya ni akwa kukalakala ni jifwelu.* Wambata dikwinyi dya midi ku ubhika. Kikuxala muthu, kikale ngo o jingadyama atungile mu ixi.
15 Kyenyiki, mwene wambata Nzowaki kala mubhika mu Babilonya, wambata we ku Babilonya manya sobha, o ahatu a sobha, o jikabhitangu ja mbonge ni mayala a fuma a ixi.
16 O sobha ya Babilonya wambata we ku ubhika mu Babilonya o mazonda oso a ita. Ene atenesa sambwadi dya midi. Kwa dibandekesa dingi midi ya mayala exile asongi a mabaya ni akwa kukalakala ni fwelu.* Ene oso exile mayala a nguzu exile ni uhete wa kubhânga mu ita.
17 O sobha ya Babilonya watumbika Mataniya sekulu a Nzowaki kala sobha bhu kididi kyê. Mwene walungulula o dijina dyê, yu wa muluku Zedekiya.
18 Zedekiya, wexile ni makwinyi ayadi ni umoxi a mivu, kyoso kyamateka kutumina. Mwene watumina mu dikwinyi dya mivu ni kamoxi mu Jeluzaleme, o dijina dya manyâ dyexile Hamutale mon’a Jelemiya, mukwa Libina.
19 Mwene wexile mubhanga ima yayibhila Jihova, kala kyabhangele Nzoyakimi.
20 O ima yiyi yabhiti mu Jeluzaleme ni mu Judá, mukonda dya njinda ya Jihova, kate mwene kya akaye bhu pholo yê. Zedekiya anga u lungulukila o sobha ya Babilonya.
Footnotes
^ Mba, “mbonge.”
^ Mba, nange “ akwa kutunga jimbanza jala ni ilumbu.”
^ Mba, nange “ akwa kutunga jimbanza jala ni ilumbu.”
