Dya Kayadi Dya Jisobha 25:1-30
25 Ku muvu wa kavwa wa utuminu wa Zedekiya, mu kizuwa kya kakwinyi mu mbeji ya kakwinyi, Nabukodonozolo sobha ya Babilonya weza ni kifuxi kyê kya masoladi phala kulwa ita ni akwa Jeluzaleme. Mwene wa ikondoloka phala ku ibwika, anga utunga ilumbu yakondoloka o mbanza.
2 O mbanza a ikondoloka kate ku muvu wa dikwinyi ni kamoxi wa utuminu wa sobha Zedekiya.
3 Mu kutula mu kizuwa kya kavwa ku mbeji ya kawana, o nzala yavudile mu mbanza. Kikwexile kudya phala o athu mu ixi.
4 Abulu kambandu ku ilumbu ya mbanza, o masoladi oso alenge mu usuku mu kubhita bhu mwelu wexile mwaxaxi ka ilumbu, bhwa zukamene o njaludim ya sobha, kyoso akwa Kaladeya kya kondolokele o mbanza. O sobha yu waditela mu njila iya ku Halabá.
5 Maji o kifuxi kya masoladi kya akwa Kaladeya ayi ni kukaya o sobha, ya a mukwatela mu kikangalakata kya Jedikó, o masoladi mê oso alenge.
6 Mukusuluka, akwata o sobha, amwambata kwa sobha ya Babilonya ku Libala, anga a mufundisa kwenyoko.
7 Ene ajibha o twana twa Zedekiya bhu pholo yê. Mukusuluka, Nabukodonozolo wafwisa o mesu a Zedekiya, wa mukutu ni malubhambu a ngondo yu wa mwambata ku Babilonya.
8 Ku mbeji ya katanu, mu kizuwa kya kasambwadi, ka muvu wa kavwa wa utuminu wa Nabukodonozolo sobha ya Babilonya, o kabhitangu Nebuzaladane ni jiselevende ja sobha ya Babilonya, eza mu Jeluzaleme.
9 Mwene wate túbhya mu inzo ya Jihova, ni mu inzo* ya sobha, ni mu jinzo joso jakexile mu Jeluzaleme. Wate we túbhya mu jinzo joso ja mayala akwa fuma.
10 O ilumbu ya kondolokele o mbanza ya Jeluzaleme a ibulu ku kifuxi kya masoladi kya akwa Kaladeya kyexile kumoxi ni kabhitangu ka masoladi.
11 Nebuzaladane o kabhitangu ka masoladi, wambata we o athu oso asubhukile mu mbanza ku ubhika, kikale yó exile mu zokela o sobha ya Babilonya ni athu akamukwa.
12 Maji, o kabhitangu ka masoladi waxisa o jingadyama phala kukalakala kala abhika mu mabhya a mividi.
13 O akwa Kaladeya abulu o jiphiladi jiyadi ja ngondo jexile mu inzo ya Jihova ni tumakalu, ni basiya yadikota ya ngondo a ixana musanza, yexile mu inzo ya Jihova, ya ambata o ngondo ku Babilonya.
14 Ene ambata o jibasiya ni jitezola, ni jikopho ni itutu yoso ya ngondo yexile mukalakala-nayu mu tembulu.
15 O kabhitangu wambata we o ididi yakutula o makala, o matijela o bhange ni phalata ni ulu yafina.
16 O jiphiladi jiyadi ni basiya yadikota a ixana musanza ni tumakalu twabhangele Solomá phala o inzo ya Jihova, katenene kuzonga o ngondo ya ima yoso yiyi.
17 Kala philadi mu kulebha yexile ni dikwinyi ni dinake dya jikovadu.* O kapitele* kexile ku thandu dya jiphiladi, kexile ka ngondo. O kapitele kexile ni kovadu jitatu mu kulebha, o mawanda ni jilomá ja kondolokele o kapitele jexile ja ngondo. O philadi ya kayadi ni mawanda mê adifule ngo.
18 O kabhitangu wambata-ku we o mukunji wadikota Selayiya ni mukunji wa kayadi Zefaniya ni alangidi atatu a mabhitu.
19 Mu mbanza wambata-mu o kabhitangu wexile ku pholo dya kifuxi kya masoladi, wambata we mayala atanu exile mubhana o jindunge kwa sobha, ni seketa ya kabhitangu ka kifuxi ka masoladi wexile mu bhongolola o athu mu ixi phala kuya mu ita, ni makwinyi asamanu a mayala asubhukile mu mbanza.
20 O kabhitangu ka masoladi Nebuzaladane, wa ambata kwa sobha ya Babilonya ku Libala.
21 O sobha ya Babilonya wa ajibha ku Libala mu ixi ya Hamati. Kyenyiki, o akwa Judá a akatula mu ixi yâ, a ambata mu ixi yengi, ya a akwika kwenyoko.
22 Nabukodonozolo sobha ya Babilonya wasolo Jedaliya mon’a Hayikane mon’a Safani kala mutwameni wa mundu waxisa mwene mu ixi ya Judá.
23 Kyoso o jikabhitangu joso ja masoladi kyeza mukwijiya kwila o sobha ya Babilonya wasolele Jedaliya, ene ayi ni lusolo muzwela ni Jedaliya ku Mixipa. O yó ayi kwenyoko enyá: Ijimayele mon’a Netaniya, Johanane mon’a Kadiyá, Selayiya mon’a Tanumete mukwa Notofa, Jazaniya mon’a diyala wa mukwa Makata. Ene oso ayi ni masoladi mâ.
24 Jedaliya wakanena ene ni masoladi mê mu kwamba: “Kanenu kukala ni wôma wa kusidivila o akwa Kaladeya. Tungenu mu ixi ni musidivile o sobha ya Babilonya, yoso yanda kwenda kyambote.”
25 Mu mbeji ya kasambwadi, Ijimayele mon’a Netaniya mon’a Elixama watokalele ku mwiji wa sobha,* wayi ku Mixipa ni dikwinyi dya mayala. Ene ajibha Jedaliya, o Jijudé ni akwa Kaladeya exile kumoxi ni mwene.
26 Kyabhiti o ima yiyi, o mundu woso kikale o adyakime ni ana-ndenge, ni jikabhitangu ja masoladi, atundu ya alengela ku Ijitu kuma exile ni wôma wa akwa Kaladeya.
27 Mu kizuwa kya makwinyi ayadi ni sambwadi kya mbeji ya dikwinyi ni kiyadi, kyoso Nzowaki sobha ya Judá kyatenesa makwinyi atatu a mivu ni sambwadi mu kaleya, Evile-Melodake wakituka sobha ya Babilonya, yu wakatula* Nzowaki sobha ya Judá mu kaleya.
28 Wazwela-nê ni henda yoso, yu wa mujingisa* dingi o jisobha joso jexile-nê kumoxi ku Babilonya ndenge.
29 Nzowaki wazula o izwatu yexile nayu mu kaleya, yu wamateka kudya ku meza a sobha izuwa yoso ya mwenyu wê.
30 Mwene wexile mutambula o kudya kwexile mu mubhana o sobha kizuwa ni kizuwa, kifwa, izuwa yoso ya mwenyu wê.
Footnotes
^ Mba, “mbonge.”
^ Kovadu imoxi yasokele 44.5 ja jisentímetulu. Tala o Kiba. B14
^ “O mbandu ya tunda ya philadi yofwamese kyambote.”
^ Mu Heba.: “mbutu ya utuminu.”
^ Mu Heba.: “wabhetula o mutwe wa.”
^ Mu Heba.: “o kyandu kyê u kizangeleka ku thandu dya jisobha jamukwa exile-nê ku Babilonya.”
