Dya Kayadi Dya Jisobha 3:1-27
3 Jeholamu mon’a Akabe, wakituka sobha ya Izalayele ku Samadiya, ku muvu wa dikwinyi ni kanake wa utuminu wa Jozafate sobha ya Judá, yu watumina mu dikwinyi ni kiyadi kya mivu.
2 Mwene wexile mubhanga ima yayibhila Jihova, maji o ima yabhange tat’ê ni manyâ yabetele-kota mu kuyibha. Mukonda mwene wabulu o iteka ya Bahale yabhangele tat’ê.
3 Maji mwene wasuluka ni kuta o ituxi yatele Jelobowamu mon’a Nebate, yabhangele Izalayele kuta kituxi. Mwene wasuluka mukuta ituxi.
4 Mexa, sobha ya Mowabe wexile musasa jimbudi. Mwene wexile mufuta kwa sobha ya Izalayele, hama ya midi ya tumbudi ni hama ya midi ya jimbudi kajibhutile luwa.
5 Kyoso Akabe kyafu, o sobha ya Mowabe wabhukumukina o sobha ya Izalayele.
6 Mukonda dyakiki, sobha Jeholamu watundu ku Samadiya yu wongeka o mundu woso wa Izalayele.
7 Mwene we watumu kutangela Jozafate sobha ya Judá, mu kwamba: “O sobha ya Mowabe wa ngibhukumukina. O kwila wandaya n’eme mulwa ita ni akwa Mowabe?” Mwene wa mutambwijila: “Xe! Ngandaya, nganda kala n’eye. O mundu wami wanda kala kumoxi ni mundu wé. O jikabalu jami janda kala kumoxi ni jikabalu jé.”
8 Mwene webhwidisa: “Twanda ditela njila yebhi?” Jeholamu wa mutambwijila: “Twanda ditela mu njila iya mu kikangalakata kya Idomo.”
9 Kyenyiki, o sobha ya Izalayele wayi kumoxi ni sobha ya Judá ni sobha ya Idomo. Mu kubhita sambwadi dya izuwa mu kubhanga o njila, kikwexile dingi menya phala o masoladi ni ibhaku.
10 O sobha ya Izalayele wambe: “Kokolo dyetu! Jihova wongeka o jisobha jitatu phala ngo kujibhakula bhu maku a akwa Mowabe!”
11 Kyenyiki, Jozafate webhwidisa: “O kwila bhabha kibhwala polofeta ya Jihova ni tusote kwijiya o kizwelu kya Jihova bhukaxi ka mwene?” Sayi selevende ya sobha ya Izalayele wa mutambwijila: “Xe bhwala. Elizewu mon’a Safate, wexile mu lundulula o menya bhu maku a Elija.”
12 Jozafate wambe: “Jihova uzwela bhukaxi ka mwene.” Kyenyiki, o sobha ya Izalayele ni Jozafate ni sobha ya Idomo, ayi kwa mwene.
13 Elizewu wambela o sobha ya Izalayele, wixi: “Ihi i wandala n’eme? Nde wasote o jipolofeta ja tat’enu ni jipolofeta ja mam’enu.” Maji o sobha ya Izalayele wa mwambela: “Kana, mukonda Jihova mwene wa tu ongeka, etu tu jisobha jitatu, phala kutubhakula bhu maku a akwa Mowabe.”
14 Mukonda dyakiki, Elizewu wambe: “Kala Jihova o Nzambi ya ifuxi wene ku mwenyu, ungene mu musidivila, se kingexile musuwa Jozafate o sobha ya Judá, hinu kingeji kusuwa, né ngo ku kutala.
15 Ngibhekelyenu bhabha mukwa kuxika o tumbanza.” Kyenyiki, kyoso o mukwa kuxika o tumbanza kyamateka o kuxika, o lukwaku lwa Jihova lweza ku thandu dya Elizewu.
16 Mwene wambe: “Kiki kyene kyambe Jihova: ‘Kandenu milombo yavulu mu honga yiyi,
17 kuma Jihova wambe kiki: “Kimwanda mona kithembu né ngo mvula, maji o honga yiyi yanda kwizala ni menya. Kyenyiki, enu ni jingombe jenu ni ibhaku yenu yambata o mabunda, mwanda nwa o menya yá.”’
18 Maji ku mesu a Jihova kiki kikima, mukonda mwene wanda bhakula we akwa Mowabe bhu maku menu.
19 Bulenu o jimbanza joso jala ni ilumbu, ni jimbanza joso jabeta-kota, kokenu o mixi yoso yawabha, lambénu o jifixi joso ja menya, o ibhela yoso yambote mu izanga-zanga ni matadi.”
20 Mu kamene, mu ola ya kubhana o jisata ja jimbutu, kweza menya ejila ku Idomo, o menya anga ezalesa o honga.
21 O akwa Mowabe eza mukwijiya kwila, o jisobha ejile mubhânga ni ene. Kyenyiki, exana o mayala oso ejitena kukwata mawuta, ya emana mu mbambe ya ixi yâ.
22 Kyoso kyabalumuka mu kamene kaselu, amono kwila o mwanya wexile mu mwikina mu menya. O akwa Mowabe exile ku sambwa, exile mutala o menya kala akusuka, kala manyinga.
23 Ene ambe: “O yá manyinga mwene! Mukidi, o jisobha adijibha-jibha mudyâ ni jixibhata. Mukyenyiki, enu mu akwa Mowabe ndenu mukatula o ima yâ.”
24 Kyoso ene kyayi mu jibalaka ja akwa Izalayele, akwa Izalayele amateka kujibha akwa Mowabe, ene anga alenga. O akwa Izalayele akayela akwa Mowabe kate mu mbanza yâ, anga a ajibha, kyoso akwa Izalayele kyayi ni kulwa o ita.
25 Ene abwika o jimbanza joso, kala muthu watakula ditadi ku ibhela yambote, ya a izalesa ni matadi. Ene alámbe o jifixi joso ja menya, akoka o mixi yoso yambote. Mukusuka-ko, o ilumbu ya Kidi-Halesete yene ngo yemanene. O yó exile mutakula o mifula, akondoloka o ilumbu ya amateka ku ibula.
26 Kyoso sobha ya Mowabe kyamono kwila exile mu atolola, wambata hama asambwadi a mayala exile ni jixibhata phala kujikula njila iya kate kwa sobha ya Idomo, maji ene katena.
27 Kyenyiki, mwene wakwata mon’ê wa phande-kumbi, weji tumina bhu kididi kyê, yu wa mubhakula kala sata mu ku mwoha ku ilumbu. O athu* anga akala ni njinda yavulu ya akwa Izalayele, ya eha kulwa ita ni sobha ya Mowabe, anga avutuka ku ixi yâ.
Footnotes
^ Bhabha nange yamulombolola o masoladi akwa Idomo ni akwa Judá akwatekesele akwa Izalayele.
