Dya Kayadi Dya Jisobha 4:1-44
4 Muhatu umoxi ku ahatu a an’a jipolofeta wambela Elizewu, wixi: “Mwadi wami mubhik’é, wafu. Eye ngana wejiya kyambote kwila, o selevende yé wexile jinga muxila Jihova ithangana yoso. Maji o muthu a mudi o dikongo kwa mwadi wami, weza mu kwambata an’ami ayadi phala kukala abhik’ê.”
2 Elizewu wa mwambela, wixi: “Ihi i ngitena kubhanga phala ku kukwatekesa? Ngitangele, ihi i wala-nayu m’onzo.” O muhatu wa mutambwijila, wixi: “Eme ngi selevende yé kingala ni kima m’onzo, kikale ngo disanga dimoxi dya máji.”
3 Bhenyobho mwene wa mwambela, wixi: “Ndé ubhinge masanga ahatu ku athu oso a kuzukama, anga wiza ni jojo ji watena kubhongolola.
4 Mukusuluka, bokona mu inzo yé ni twana twé,anga ujika o dibhitu. Izalesa o masanga oso ni máji, o masanga ezala wa atula bhu mbandu.”
5 Kyenyiki, mwene wayi.
Kyoso kyabokona m’onzo ni twana twê, wajika o dibhitu, o twana twê amateka ku mubhana o masanga, mwene yu wexile mu azalesa.
6 Kyoso o masanga kyezala, mwene wambela mona umoxi, wixi: “Ngibhekele disanga dyamukwa.” O mona wa mutambwijila, wixi: “Séku dingi disanga.” Kyenyiki, o máji abatuka o kubhubha.
7 Mukusuluka, o muhatu wayi mutangela o maka yá ku diyala dya Nzambi yakidi, mwene yu wa mwambela, wixi: “Ndé, sumbisa o máji, ufute o makongo mé. O máji anda subhuka-ku, akale phala kudikila o ibhindamu yé ni ya twana twé.”
8 Sayi kizuwa Elizewu wayi mu mbanza ya Suneme. Kwenyoko, kwexile muhatu wafumanene, mwene wa mujijidika kudya kama mu inzo yê. Mu ithangana yoso kyexile mubhitila kwenyoko, Elizewu wexile muya hanji kwenyoko phala kudya kama.
9 Kyenyiki, o muhatu wambela mwadi wê, wixi: “Ngejiya kwila o diyala dyene mubhita bhabha ithangana yoso, mwene polofeta ya Nzambi.
10 Ngakudyondo, tubhange dixilu dyofele kutala dya inzo, tutula-mu hama imoxi, meza, kyalu ni ditudilu dya tundeya. Kyenyiki, mwene wanda tena kukala kwenyoko, kyoso kyandaya jinga ni kubhita bhabha.”
11 Sayi kizuwa Elizewu wabhixila kwenyoko, yu wabande ku xilu dyê, kutala dya inzo phala kuzeka.
12 Mwene wambela o mukwatekexi wê Jeyazi, wixi: “Exana o muhatu mukwa Suneme.” Jeyazi wamwixana, o muhatu yu weza.
13 Elizewu wambela Jeyazi, wixi: “Ngakudyondo, mutangele kiki: ‘Eye wabhange o kikalakalu kyoso kiki mukonda dyetu. Ihi itutena o kubhanga phala ku kukwatekesa? O kwila wabhindamena kima phala tu kitangele kwa sobha mba ku kabhitangu ka masoladi?’” Maji mwene wa mutambwijila: “Kana, eme ngalami kyambote mu kutunga mwaxaxi ka mundu wami.”
14 Mukiki, Elizewu webhwidisa: “Mukiki-phe tu mubhangela kima kyahi?” Jeyazi watambwijila: “Mwene kala ni mona, o mwadi wê wakuka kya.”
15 Mu kithangana kyenyokyo, mwene wambe, wixi: “Mwixane.” Jeyazi wa mwixana. O muhatu anga wimana bhu mwelu wa dixilu.
16 Kyenyiki, Elizewu wa mwambela, wixi: “Ku muvu wiza-ku mu kithangana kala kiki, eye wanda kala ni mona ku jihata jé.”* Maji o muhatu wa mwambela, wixi: “Kana ngana yami, eye u diyala dya Nzambi! Kana ku ngitangela makutu.”
17 Mukyenyiki, ku muvu wakayela o muhatu wemita yu wavwala mon’a diyala, mu kithangana kyambele Elizewu.
18 O mona wakulu, sayi kizuwa wayi muzwela ni tat’ê wexile kumoxi ni akwa kubhongolola o idima.
19 Anga wambela tat’ê, wixi: “Wawé o mútwe, wawé o mútwe wami!” Kyenyiki, tat’ê wambela o selevende yê, wixi: “Mwambate kwa manyâ.”
20 Kyenyiki, mwene wa mwambata kwa manyâ. O kambonga anga ka kala bhu jihata ja manyâ kate ku mediya, mu kubhita kithangana o kambonga kafu.
21 Mukiki-phe, o manyâ wabande-nê ku dixilu dya thunda, wa muzekesa ku hama ya diyala dya Nzambi yakidi. Watundu yu wajika o dibhitu.
22 O muhatu wexana mwadi wê yu wa mwambela, wixi: “Ngakudyondo, tumikisa mukwatekexi ni jumendu imoxi, ngiye ni lusolo ku diyala dya Nzambi yakidi ni ngivutuke.”
23 “Mukonda dyahi wamesena kuya-ku lelu?” Etu kitwala bhu mbeji yathethama mba kya sábhalu.” Kyenyiki, o muhatu wa mutambwijila, wixi: “Kana ngo kuthandanganya.”
24 Kyenyiki-phe, o muhatu wasokejeka o jumendu yu wambela o mukwatekexi, wixi: “Ndé ni lusolo, kana kwimana mukonda dyami. Kikale ngo se ngi kutangela.”
25 Bhenyobho, mwene wayi mudisanga ni diyala dya Nzambi yakidi ku mulundu wa Kalumelu. Kyoso o diyala dya Nzambi yakidi, kya mumono yu wiza, wambela o mukwatekexi wê Jeyazi, wixi: “Tala! Yó o muhatu mukwa Suneme.
26 Ngakudyondo, ndé ni lusolo, u mwibhwidisa kiki: ‘Yoso yala kyambote? O mwadi wé wala kyambote? O mon’é wala kyebhi?’” O muhatu wa mutambwijila, wixi: “Yoso yala kyambote.”
27 Kyoso mwene kyabhixila ku mulundu bhwexile o diyala dya Nzambi yakidi, mwene wa mukwata mu inama. Maji Jeyazi wa muzukama phala ku musandula, bhenyobho o diyala dya Nzambi yakidi, wambela Jeyazi, wixi: “Mwehe, mwene wala ni kikote ku muxima, Jihova wa ngiswekela o kima kyabhiti, kangitangela kima.”
28 Kyenyiki, o muhatu wambe, wixi: “Ngana, o kwila eme nga kubhingi mona? Kingakwambela-mi kwila, ‘kana ngo ku ngidyelelesa’?”
29 Mu kithangana kyenyokyo, Elizewu wambela Jeyazi, wixi: “Kuta o kizwatu kyé mu mbunda, kwata o mbangala yami ni uye. Se udisanga ni muthu kana ku mumenekena, se a kumenekena kana kutambwijila, ndé, tula o mbangala yami bhu pholo ya kambonga.”
30 Maji o many’a mona, wambe wixi: “Kikola ngana! kala Jihova kyene ku mwenyu, n’eye ngana yami, eme kinganda kuxisa.” Mukiki-phe Elizewu wabalumuka yu wayi ni mwene.
31 Jeyazi wa atwamenena ku pholo, yu watula o mbangala bhu pholo ya mona, maji kikutundu dízwi, né ngo ku dizambesa. Mukyenyiki-phe, mwene wavutuka kwa Elizewu yu wa mwambela, wixi: “O kambonga kikabalumuka.”
32 Kyoso Elizewu kyabokona m’onzo, wasange o kambonga wafu. O kambonga wexile ku thandu dya hama yê.
33 Mwene wabokona muxilu, wajika o dibhitu, anga akala ngo kiyadi kya, yu wamateka kusamba kwa Jihova.
34 Mukusuluka, wasambela ku hama yu wazeka ku thandu dya kambonga. Mwene wate o dikanu dyê ku dikanu dya kambonga, o mesu mê ku mesu a kambonga, o maku mê wa ate ku maku a kambonga, anga ukala ku thandu a kambonga, o mukutu wa kambonga wamateka dingi o kutema.
35 Elizewu ukala munyunga mu inzo mwenyomo, uya thunda, wiza lwiji, uya thunda, wiza lwiji, anga ubanda ku hama, udizala lwamukwa ku thandu a kambonga, bhenyobho, o kambonga uta sambwadi dya jingaxaxa anga ujikula o mesu.
36 Elizewu wexana Jeyazi, yu wa mwambela: “Exana o muhatu mukwa Suneme.” Kyenyiki, mwene wamwixana, o muhatu wayi kwa mwene. Elizewu wixi: “Katula mon’é.”
37 O muhatu wabokona, waditakula mu inama ya Elizewu, yu wa mufukamena ni pholo bhoxi. Mukusuluka, wakwata o mona yu watundu.
38 Kyoso Elizewu kyavutuka ku Jidingale, mu ixi mwakexile nzala. O an’a jipolofeta axikama ku pholo yê, mwene wambela o mukwatekexi wê wixi: “Tula o imbya bhu jiku, ulambe kudya phala o twana twa jipolofeta.”
39 Kyenyiki, diyala dimoxi, wayi mu mukáwu mukanza-mu tumafwe, yu wasange muxi wexile ni tu ibundu. Mwene wakanze-ku ibundu, yu wezalesa o homba yê ni ibundu yenyoyo. Kyoso kyavutuka mwene wa ibatujula mu jimbandu-jimbandu yu wa ite mu imbya, sé kukijiya se yexile ibundu yahi.
40 Mukusuluka, abhana o kudya ku mayala. Maji kyoso kyadi-ku, adikola: “Diyala dya Nzambi tata, mu imbya mwala kalunga.” Ene anga alembwa o kudya.
41 Kyenyiki, mwene wambe: “Ngibhekelyenu bhabha tufadinya. Kyoso kya itakula mu imbya, mwene wa ambela: “Bhanenu ku mayala n’adi.” Kyenyiki-phe, mu imbya kimwexile dingi kima kyoso-kyoso kyayibha.
42 Sayi diyala watundu ku Bahale-Saliza, wabheka makwinyi ayadi a jimbolo ja sevada jobhange ni ibundu yadyanga yabhi ni saku ja jimbutu jabete ku diyala dya Nzambi yakidi. Kyenyiki, Elizewu wambe: “Bhana-naku ku mayala, n’adye.”
43 Maji o mukwatekexi wê wa mwambela: “O kudya kuku kikwanda soka phala o hama ya mayala. Elizewu anga u mwambela, wixi: “Bhana-naku ku mayala phala adye, mukonda Jihova wambe kiki: ‘Ene anda dya maji kwene kwanda subhuka hanji.’”
44 Kyenyiki, wa atudila o kudya, ene adi, maji o kudya kwasubhuka hanji, kala kyambe Jihova.
Footnotes
^ Mba, “bhu homba yé”
