Dya Kayadi Dya Jisobha 5:1-27
5 Nahamane, o kabhitangu ka kifuxi kya masoladi a sobha ya Sídya, wexile muthu wadikota bhu pholo ya ngana yé. O ngana yê wexile we mu muxila kyavulu, mukonda Jihova wabhana kikôwe* ku akwa Sídya bhukaxi ka mwene. Sumbala Nahamane wexile mukwa dibhute,* maji wexile dizonda.
2 Sayi kizuwa kyoso akwa Sídya kyayile mulwa ita ni akwa Izalayele, akutu-ku kamona ka muhatu, yu wakituka selevende ya muhatu wa Nahamane.
3 O kana ka muhatu, wambela ngana yê ya muhatu, wixi: “Se o ngana yami uya musota o polofeta wala ku Samadiya, mwene wanda saka o uhaxi wê wa dibhute.”
4 Mukusuluka, mwene* wayi yu watangela ngana yê o ima yoso ya mwambela o kamona ka muhatu mukwa Izalayele.
5 Bhenyobho, o sobha ya Sídya wambela Nahamane, wixi: “Ndé kindala mwene! Nganda tumikisa mukanda kwa sobha ya Izalayele.” Mukiki-phe mwene wayi, wambata dikwinyi dya jitalendu* ja phalata ni midi jisamanu a jixikulu ja ulu ni dikwinyi dya izwatu.
6 Mwene wambata mukanda kwa sobha ya Izalayele. O mukanda wambele kiki: “Ni mukanda yu, nga mutumikisa selevende yami Nahamane phala ku musaka o uhaxi wê wa dibhute.”
7 Kyoso, sobha ya Izalayele kyazubha kutanga o mukanda, watandujula o izwatu yê, yu wambe: “O kwila eme ngi Nzambi phala kujibha mba kubhulula mwenyu wa muthu? Mwene wa ngitumikisa o diyala didi, yu wa mu ngitangela phala ku musaka o uhaxi wê wa dibhute. Talenu, o diyala didi dya musota mvunda n’eme.”
8 Maji kyoso Elizewu, o diyala dya Nzambi yakidi kyevu kwila o sobha ya Izalayele watandujula o izwatu yê, watumu kwambela o sobha ni lusolo, wixi: “Mukonda dyahi eye ngana watandujula o izwatu yé? Ngakudyondo, ehela o diyala kwiza kokwami, phala ejiye kwila mu Izalayele sayi-mu polofeta.”
9 Kyenyiki, Nahamane wayi ni jikabalu jê ni makalu mê a ita, yu wemana bhu mwelu wa inzo ya Elizewu.
10 Mukyenyiki, Elizewu watumikisa mukunji phala ku mutangela: “Ndé, udisukule lusambwadi mu ngiji ya Njolodá, eye wanda disanza.”
11 Mukiki-phe, Nahamane njinda ya mukwata, anga usola kuvutuka ku ixi yê, yu wambe, wixi: “Ngabanzele kwila mwene weji tunda ni kwimana bhu pholo yami ni kudikola mu dijina dya Jihova Nzambi yê, mu kubhitisa o maku ku dibhute dyami ni dyeluke.
12 O ngiji Abana ni ngiji Falapa, jala ku Damasku kijibeta-kota o menya oso a Izalayele ndenge? O kwila kingitena kudisukula-ku ni ngizele?” Kyenyiki, mwene wa abhana dikunda yu wayi ni njinda.
13 O jiselevende jê a muzukama, ya a mwambela, exi: “Ngana yami,* se o polofeta wa kubhingile kubhanga kima kyabhonzo, kiweji kibhanga? Abha-phe mwene wa kwambela ngo: ‘Ndé, udisukule ni udisanze.’”
14 Kyenyiki, mwene wayi mudibonda* mu ngiji ya Njolodá mu lusambwadi, kala kyatumu o diyala dya Nzambi yakidi. Mukusuluka o xitu yê ibwingita dingi kala ya mona-ndenge, he u disanza.
15 Kyabhiti o ima yiyi, mwene ni athu oso exile-nê kumoxi avutuka ku diyala dya Nzambi yakidi. Mwene wemana bhu pholo ya polofeta, yu wa mwambela: “Kindala ngejiya kwila, séku Nzambi yengi mu ngongo yoso, kikale ngo mu Izalayele. Kyenyiki-phe ngakudyondo, tambula o ujitu* wami eme ngi selevende yé.”
16 Maji Elizewu wa mwambela, wixi: “Kala Jihova yó u ngene ku musidivila* kyene ku mwenyu, kinganda xikina o ujitu yú.” Nahamane wa mujijidika ku utambula, maji mwene waditunu.
17 Mukusukaku, Nahamane wambe: “Kuma kuxikina, ngakudyondo, bhana kwa selevende yé o mavu a ixi yiyi atena kwa ambata ku mula* jiyadi, kuma o selevende yé kanda bhakula dingi jisata ja kwoha ku jinzambi jengi, kikale ngo kwa Jihova.
18 Maji-phe Jihova a ngiloloke eme ngi selevende yê, mu kima kiki: Kyoso ngana yami, o sobha, kyabokona mu inzo* ya Limone phala ku mu fukamena, mwene wene muxamenena ku lukwaku lwami. Eme-phe ngibhetama mu inzo ya Limone. Kyoso ki ngibhetama mu inzo ya Limone, Jihova aloloke o selevende yé mu kima kiki.”
19 Kyenyiki, Elizewu wa mwambela, wixi: “Ndé ni kutululuka.” Kyoso Nahamane kyayi, mukwenda kadikanga,
20 Jeyazi o mukwatekexi wa Elizewu, o diyala dya Nzambi yakidi, wabanze: ‘O ngana yami wehela Nahamane mukwa Sídya kuya, kaxikina o ujitu wabheka mwene. Kala Jihova kyene ku mwenyu, ngandaya ni kulenga kate kwa mwene n’a ngibhane kima.’
21 Kyenyiki, Jeyazi wayi kwa Nahamane ni kulenga. Kyoso Nahamane kyamono muthu wa mukwiza kudima dyê ni kulenga, mwene watuluka mu dikalu dyê dya ita, wayi mudisanga-nê yu wa mwibhwidisa: “Kwala maka?”
22 Mwene watambwijila: “Séku maka. Ngana yami wa ngitumikisa phala ku kutangela kiki: ‘Kindala mwene, kweza minzangala iyadi ku twana twa jipolofeta twatundu ku milundu ya Efalayíme. Ngakudyondo, bhana-wu talendu imoxi ya phalata ni izwatu iyadi.’”
23 Nahamane wambe: “Tambula talendu jiyadi.” Mwene wa mujijidika kutambula talendu jiyadi ja phalata ni izwatu iyadi, wajite mu saku jiyadi, yu wajibhana ku akwatekex‘yê. Ene a mwambatela na-ju, o Jeyazi yu wexile mu akayela kudima.
24 Kyoso Jeyazi kyabhixila ku Ofele,* watambula o jisaku jexile bhu maku mâ, yu wajibhake m’onzo yê. Mukusuluka, mwene watumu o mayala kuvutuka. Kyoso o mayala kyayi,
25 mwene wabokona yu wemana bhu pholo ya ngana yê. Kyenyiki, Elizewu wa mwibhwidisa: “Jeyazi, wa mutunda kwebhi?” Mwene wa muvutwila, wixi: “O selevende yé kayi kididi kyoso-kyoso.”
26 Elizewu wa mwambela, wixi: “Eme ngejiya kwila eye wayi mudisanga ni Nahamane. Mwene watuluka mu dikalu dyê dya ita, yu weza muzwela n’eye. O kwila kiki kithangana phala kuxikina phalata, izwatu, mabhya a midiva ni mabhya a mividi, jimbudi, jingombe ni jiselevende ja mala mba ja ahatu?
27 Kyenyiki, eye ni mbutu yé mwanda kwata o uhaxi wa dibhute wa Nahamane kate ku hádya ni hádya.” Mu kithangana kyenyokyo, Jeyazi watundu bhu pholo yê ni uhaxi wa dibhute, o mukutu wê wedile phée.
Footnotes
^ Mba, “ubhulukilu.”
^ Mba, “wexile ni uhaxi wa kikonda.”
^ Nange, kya mulombolola Nahamane.
^ Talendu imoxi yasokele 34.2 ya jikilu. Tala o Kiba. B14.
^ Mu Heba.: “tata yami.”
^ Mba, “wadibondo.”
^ Mu Heba.: “dibesá dya.”
^ Mu Heba.: “U ngemana ku pholo yê.”
^ Kibhaku kyadifu ni kabalu.
^ Mba, “mu tembulu.”
^ Kididi kyala ku Samadiya, mba nange, mulundu mba kimbaka.
