Dya Kayadi Dya Jisobha 6:1-33
6 O an’a jipolofeta ambela Elizewu, exi: “Kala ki wa mumona, o kididi mu twatungu n’eye kyatolo phala etu enyoso.
2 Twakudyondo, twehele kuya ku Njolodá. Kwenyoko, kala muthu mudyetu wanda batula-ku mixi phala tutunge kididi ni tukale kwenyoko.” Mwene wa atambwijila: “Ndenu.”
3 Umoxi mudyâ wambe, wixi: “Twakudyondo, za ni jiselevende jé.” Mwene wambe: “Kyambote tuye.”
4 Mukiki, mwene wayi kumoxi ni ene. Kyabhixila ku Njolodá, ene amateka kubatula o mixi.
5 Kyoso polofeta imoxi kyexile mubatula o muxi, o dikuwa dyabu mu menya, mwene wadikola, wixi: “Wawe ngana yami, o dikuwa didi ngadisobho!”
6 O diyala dya Nzambi yakidi wa mwibhwidisa: “Dyene dyabwila kwebhi?” Mwene wa mulondekesa o kididi bhu dyabwila. Mukyenyiki, Elizewu wabatula kamuxi, yu wa katakula mu menya bhu kididi kyenyokyo. Mwene anga ubhangesa o dikuwa kubanda ku thandu a menya.
7 Mwene wambe: “Kwata-dyu.” O diyala wasununa o lukwaku yu wadikwata.
8 O sobha ya Sídya wayi mubhânga ni akwa Izalayele. Mwene wabhingi kayula ku jiselevende jê, yu wa atangela: “Nganda kala kumoxi ni enu bhu kididi bhu mwanda ta o jibalaka jenu.”
9 Mukiki, o diyala dya Nzambi yakidi watumu kutangela o sobha ya Izalayele, wixi: “Dilange, kana kubhita bhu kididi kyenyokyo, mukonda kwene kwamuyila akwa Sídya.”
10 Kyenyiki, o sobha ya Izalayele watumu kudimuna o mundu wê watungile bhu kididi kyenyokyo kyazwelele o diyala dya Nzambi yakidi. Elizewu wasuluka ni kudimuna o sobha, mwene-phe mu ididi yenyoyo kexile mubhita-mu dingi. Kiki kyabhiti muveji javulu.
11 Kiki kyabhangesa o sobha* ya Sídya kukala ni njinda yavulu, wongeka o jiselevende jê, yu wambe: “Ngitangelyenu, nanyi bhabha wala ku mbandu ya sobha ya Izalayele?”
12 Selevende imoxi wa mutambwijila, wixi: “Ngana yami, séku muthu mudyetu wala ku mbandu ya sobha ya Izalayele. O polofeta Elizewu wala mu Izalayele, mwéne wene muzwela kwa sobha ya Izalayele o ima i uzwela muxilu dyé.”
13 Mwene wambe: “Ndenu, sotenu kwijiya kwebhi kwala mwene phala ngitume mayala ku mukuta.” Ku pholo dya kwenda a mutangela: “Mwene wala ku Dotane.”
14 Mu kithangana kyenyokyo, sobha watumikisa-ku kifuxi kyadikota kya masoladi ni jikabalu ni makalu a ita. Ene abhixila-ku mu usuku, ya akondoloka o mbanza.
15 Kyoso o mukwatekexi* wa diyala dya Nzambi yakidi kyabalumuka kamene ka selu yu watundu, wamono kifuxi kyadikota kya masoladi kyakondoloka o mbanza ni jikabalu ni makalu a ita. Mu kithangana kyenyokyo, mwene wambela Elizewu, wixi: “Wawe ngana yami, twanda bhanga kyebhi?”
16 Mwene wa mutambwijila, wixi: “Kana kukala ni wôma! Mukonda ala n’etu avulu dingi, ala ni ene ndenge.”
17 Bhenyobho, Elizewu wamateka o kusamba, mu kwamba: “Jihova tata, ngakudyondo, mujikule o mesu n’a mone.” Mu kithangana kyenyokyo, Jihova wajikula o mesu a mukwatekexi. Mwene anga umona kwila o mulundu woso wezala ni jikabalu ni makalu a túbhya akondoloka Elizewu.
18 Kyoso akwa Sídya kyexile mu kulumuka bhwa kexile Elizewu, mwene wasambe kwa Jihova, yu wambe: “Ngakudyondo, bhangesa o mundu yú kukala ifofo.” Kyenyiki, Nzambi wabhangesa o mundu kukala ifofo, kala kyabhingile Elizewu.
19 Elizewu wa ambela, wixi: “Yiyi kiyene o njila, yiyi kiyene o mbanza. Ngikayelyenu, nganda myambata bhwala o diyala di mwa musota.” Kyenyiki, mwene wa ambata kate ku Samadiya.
20 Kyoso kyabhixila ku Samadiya, Elizewu wambe, wixi: “Jihova, ngakudyondo, jikula o mesu mâ n’a mone.” Bhenyobho-phe, Jihova wa ajikula o mesu, ene anga amono kwila ala mukaxi ka mbanza ya Samadiya.
21 Kyoso sobha ya Izalayele kya amono, webhwidisa Elizewu, wixi: “Ngana yami, ngatokala kwajibha? O kwila ngatokala kwajibha?”
22 Maji mwene watambwijila: “Kana kwajibha. Se wakwatele masoladi mu ita, o kwila weji kwajibha? U abhana mbolo ni menya phala n’adye, n’anwe, n’a vutuke kwa ngana yâ.”
23 Kyenyiki, o sobha wa abhana kudya kwavulu. Ene adi, anu, yu wa atumu kuvutaka kwa ngana yâ. Tunde mu kizuwa kyenyokyo, o masoladi akwa Sídya kavutuka dingi mu ixi ya Izalayele.
24 Mukubhita thembu, Bene-Hadade sobha ya Sídya wongeka o masoladi mê, wabande ku Samadiya wakondoloka o mbanza.
25 Mu Samadiya anga mukala nzala yadikota, mukonda o masoladi akondolokele o mbanza mu izuwa yavulu. Kate kyasuku mu kusumbisa o mútwe wa jumendu mu makwinyi anake a mabele a phalata. O mbandu ya kawana ya kabu* ya tuji twa dyembe, exile mu isumbisa mu mabele atanu a phalata.
26 Kyoso sobha kyexile mukwenda ku thandu a ilumbu, sayi muhatu wadikola ni dízwi dyaswina, wixi: “Ngana yami, sobha, ngikwatekese.”
27 Kyenyiki, o sobha wa mwambela, wixi: “Se Jihova ka mu kukwatekesa, kwebhi kunganda sanga o kikwatekesu phala eye? O kwila mu kididi mwene mubhyatela o idima mba mwene mubhangela-mu o vinyu ni máji mwasubhuka-mu hanji kima?”
28 O sobha wa mwibhwidisa: “Ihi ya mu kutatesa?” Mwene watambwijila: “O muhatu yú wa ng’ambela: ‘Bhana mon’é ni tu mudye lelu, o mungu twanda dya mon’ami.’
29 Mukiki, twalambe mon’ami etu twa mudi. Mu kizuwa kyakayela, ngamwambela: ‘Bhana mon’é ni tu mudye,’ maji mwene wa musweka.”
30 Kyoso sobha kyevu o izwelu ya muhatu, watandula o izwatu yê. Kyayi ni kwenda ku thandu a ilumbu, o mundu wamono kwila mwene watele jisaku* moxi a izwatu yé.
31 Mukiki, mwene wambe, wixi: “Nzambi a ngikaxtikale kinene, se lelu ngikamba kubatula o mútwe wa Elizewu mon’a Safate.”
32 Elizewu waxikamene mu inzo yê kumoxi ni adyakime. O sobha watumikisa mukunji phala ku mu twamenena, maji ande dya mwene kubhixila, Elizewu wambela o adyakime a mbanza, wixi: “Talenu! O mon’a kijibhangânga yú, watumu ku ngibatula o mútwe. Kyenyiki, dilangyenu. Kyoso o mukunji kyanda bhixila, jikenu o dibhitu ni mu dikwate phala mwene kabokone. Ki mwa mukwivwa o jibuya ja makanda a ngana yê kudima dya mwene?”
33 Kyoso Elizewu kyakexile hanji muzwela, o mukunji wabhixila. Mukusuluka o sobha wabhixila we yu wambe: “Jihova mwene wa mubheka o divuwa didi. Mukonda dyahi ngeji suluka mu kukingila kwa Jihova?”
Footnotes
^ Mu Heba.: “o muxima wa sobha.”
^ Mba, “selevende ya.”
^ Kabu imoxi yasokele 1.22 ya jilitulu. Tala o Kiba. B14.
^ Tala o Dilombolwelu.
