Dya Kayadi Dya Jisobha 7:1-20
7 Elizewu wambe: “Ivwenu o kizwelu kya Jihova. Jihova wambe kiki: ‘Mungu mu ola kala yiyi, bhu mwelu* wa mbanza ya Samadiya, o seya* imoxi ya fadinya yafina, anda isumbisa mu xikulu* imoxi. O seya jiyadi ja sevada anda jisumbisa mu xikulu imoxi.’”
2 Kyenyiki, o kabhitangu ka sobha, yó a mudyelele kwa sobha, wambela o diyala dya Nzambi yakidi, wixi: “Né mwene se Jihova wajikwile o dyulu,* o kwila kiki* kyeji bhita mwene?” Elizewu wa mutambwijila: “Kyoso kyanda bhita o ima yiyi, wanda imona mwene ni mesu mé, maji kwanda dya-ku.”
3 Kwexile mayala awana exile ni dibhute, akexile bhu mwelu wa mbanza, ene a dyambela mudyâ, exi: “Mukonda dyahi twanda xikama bhabha kate ki tufwa?
4 Se tubokona mu mbanza, twanda fwila mwenyomo mukonda mu mbanza mwala nzala. Maji se tuxikama bhabha, twanda fwila we bhabha. Kyenyiki-phe, tuyetu kate bhwala o jibalaka ja akwa Sídya. Se ene a tu kwatela henda, twanda kala ni mwenyu, maji se atujibha, kwabhu-phe tufwe.”
5 Kyoso ki kwavundile kya, atundu ya ayi kate ku jibalaka ja akwa Sídya. Kyabhixila bhu kididi bhwexile o jibalaka ja akwa Sídya, amono kwila kikwexile muthu.
6 Mukonda Jihova wabhangesa akwa Sídya kwivwa jibuya ja makalu a ita ni jibuya ja jikabalu, kifwa, jibuya ja kifuxi kyonene kya masoladi. Mukonda dyakiki akwa Sidya adibakanesa mudyâ, exi: “Talenu! O sobha ya Izalayele wexana o jisobha ja akwa Hiti ni jisobha ja akwa Ijitu phala kwiza mubhânga n’etu.”
7 Ene alenge kyoso kikwexile kya muvunda, axisa o ima yâ yoso. Axisa o jibalaka, o jikabalu ni jijumendu jâ, ya alenge phala kubhulula o myenyu yâ.
8 Kyoso o mayala exile ni dibhute kyabhixila bhwexile o jibalaka, abokona mu balaka imoxi ya amateka kudya ni kunwa. Akatula mwenyomo phalata, ulu ni izwatu, ya ayi mu isweka. Atundu, ayi mu balaka yengi, mwenyomo akatula-mu we ima, ya ayi mu isweka.
9 Mukusuka-ku, ene adizwelesa mudyâ, exi: “O kima ki twa mubhanga ki kima kyambote. Lelu kizuwa kya njimbu yambote! Se tudixibha ni tukingila kate ki kukya, anda tu kaxtikala. Tuye mwene kindala ku inzo ya sobha ni tu mutangele.”
10 Kyenyiki, ayi, exana o alangidi a mwelu wa mbanza, ya a atangela exi: “Etu twayile ku jibalaka ja akwa Sídya maji kitusange-ku muthu, né ngo kwivwa-ku dízwi. Twasange ngo o jikabalu ni jijumendu jokute. O jibalaka jexile kala kya jixisa.”
11 Mu kithangana kyenyokyo, o alangidi atudila o njimbu ku akwa dibhata dya sobha.
12 O sobha wabalumuka ni lusolo lwoso mu usuku wenyó, yu watangela o jiselevende jê, wixi: “Nganda mitangela yabhange akwa Sídya. Ene ejiya kwila etu twala ni nzala, ya afunyu ndunge ya kutunda mu jibalaka jâ ni kuswama mu yangu, mu kwamba: ‘Ene anda tunda mu mbanza, etu twanda ku akwata ni tubokone mu mbanza yâ.’”
13 Maji selevende imoxi, wa mwambela: “Twakudyondo, ehela mayala kuya-ku ni jikabalu jitanu jasubhuka mu mbanza. O mayala yá, anda fwa we kala kyanda fwa o mundu wa Izalayele wanda xala bhabha. Ene anda fwa we kala kyafu amoxi ku kifuxi kya Izalayele. Twehele ku atumikisa n’a tale ihi yabhiti.”
14 Kyenyiki, o mayala akatula makalu ayadi a ita ni jikabalu, o sobha wa atumikisa bhwexile o jibalaka ja akwa Sídya, yu wambela: “Ndenu ni mutale.”
15 Ene a akayela kudima kate ku Njolodá. Ene asange o izwatu ni ima ya mukwa yasonona akwa Sídya mu njila kyoso kyayi ni kulenga mukonda dya wôma. O akunji avutuka, ya ayi mutangela o sobha.
16 Mukusuluka, o mundu watundu ya ayi mukatula o ima ya akwa Sídya. Mukyenyiki-phe, o seya imoxi ya fadinya exile mu isumbisa mu xikulu imoxi, o seya jiyadi ja sevada, exile mu jisumbisa mu xikulu imoxi, kala kyazwelele Jihova.
17 O kabhitangu a mudyelele kwa sobha, a mutumu kwa sobha kulangidila o mwelu wa mbanza. Maji o mundu walundula o kabhitangu ya a mudyota-dyota bhu mwelu, anga ufwa kala kyazwelele o diyala dya Nzambi yakidi kwa sobha, kyoso kyayi mudisanga-nê.
18 Yoso yabhiti kala kyazwelele o diyala dya Nzambi yakidi kyoso kyambele kwa sobha: “Mungu mu ola kala yiyi, bhu mwelu wa mbanza ya Samadiya, o seya imoxi ya fadinya yafina, anda isumbisa mu xikulu imoxi. O seya jiyadi ja sevada anda jisumbisa mu xikulu imoxi.”
19 Kuma o kabhitangu wazwelele ku diyala dya Nzambi yakidi: “Né mwene se Jihova wajikwile o dyulu,* o kwila kiki* kyeji bhita mwene?” Elizewu wa mutambwijila: “Wanda mona ni mesu mé, maji kwanda dya-ku.”
20 Kiki kyene kyabhiti ni mwene, mukonda o mundu wa mu dyota-dyota bhu mwelu wa mbanza, yu wafu.
Footnotes
^ Mba, “mu ithanda.”
^ O seya imoxi, yasokele 7.33 ya jilitulu. Tala o Kiba. B14.
^ Xikulu imoxi, yasokele 11.4 ya jigrama. Tala o Kiba. B14.
^ Mba, “o mabhitu a dyulu.”
^ Mu Heba.: “o kizwelu kiki.”
^ Mba, “o mabhitu a dyulu.”
^ Mu Heba.: “o kizwelu kiki.”
