Dya Kayadi Dya Jisobha 9:1-37
9 Polofeta Elizewu wexana muthu umoxi ku ana a jipolofeta, yu wa mwambela, wixi: “Kuta o divunga dyé mu mbunda, ambata o ngalafa yiyi ya máji, uye ni lusolo ku Lamote-Ngiliyade.
2 Kyoso ki wanda bhixila-ku, sota Jehú mon’a Jozafate, mon’a Nimisi, u mubalumuna mwaxaxi ka jiphange jê, u mwambata mu dixilu.
3 Mukusuluka, ukwata o ngalafa ya máji, u azunzumwina mu mútwe wê, anga u mwambela: ‘Jihova wambe kiki: “Nga mu ku unda kala u sobha ya Izalayele.’” Mukusuluka, ujikula o dibhitu, utunde ni lusolo.”
4 Mukiki, o mukwatekexi wa polofeta wayi ku Lamote-Ngiliyade.
5 Kyoso kyabhixila-ku, wasange o jikabhitangu ja masoladi axikama. Mwene wambe, wixi: “Kabhitangu, ngala ni njimbu phala kukutudila.” Jehú wa mwibhwidisa: “Phala nanyi mudyetu?” Mwene wa mutambwijila: “Phala eye mwene ngana.”
6 Kyenyiki, Jehú wabalumuka yu wabokona m’onzo. O mukwatekexi wa muzunzumwina o máji mu mútwe, yu wa mwambela, wixi: “Kiki kyene kyambe Jihova o Nzambi ya Izalayele: ‘Nga mu ku unda kala u sobha ya mundu wa Jihova, Izalayele.
7 Jibha o athu oso atokala ku dibhata dya ngana yê Akabe. Eme nganda muvutwila phonzo mukonda dya jiselevende jami, o jipolofeta ni mukonda dya jiselevende joso ja Jihova ja jibha Jezabele.
8 Enyoso atokala ku dibhata dya Akabe anda fwa. Nganda jibha mu Izalayele o mayala* oso atokala ku dibhata dya Akabe, nganda bwika enyoso, kate mwene ni yó kala ni valolo mu Izalayele.
9 Nganda bhanga ku inzo ya Akabe kala ki ngabhange ku inzo ya Jelobowamu mon’a Nebate ni ku inzo ya Bahasa mon’a Ahiya.
10 Yalungu ni Jezabele, o jimbwa jene janda mudya mu kibhela kyala ku Jezelele, séku muthu wanda mufunda.’” Kyenyiki, mwene wajikula o dibhitu yu watundu ni kulenga.
11 Kyoso Jehú kyavutuka kwexile o jiselevende ja ngana yê, ene a mwibhwidisa, exi: “Wala kyambote? Mukonda dyahi o dilaji didi dyeza muzwela n’eye?” Mwene wa atambwijila: “Enu mwejiya kyambote o mayala ya ni ihi yene muzwela.”
12 Maji-phe ene a mwambela: “Eye wa mututangela makutu! Twakudyondo, twijidise ya kutangela.” Mwene wa atambwijila, wixi: “Mwene wazwela kiki ni kyokyo yu wabandekesa-ku, wixi: ‘Kiki kyene kyambe Jihova: “Nga mu ku unda kala u sobha ya Izalayele.”’”
13 Mu kithangana kyenyokyo, kala muthu mudyâ wakwata o divunga dyê yu wadizale mu maxikata bhu pholo yê, axiki o koloneta ya ambe, exi: “Jehú wakituka sobha!”
14 Mukusuluka, Jehú mon’a Jozafate, mon’a Nimisi, walungulukila Jeholamu.
Jeholamu wayile ku Lamote-Ngiliyade kumoxi ni mundu woso wa Izalayele phala kuzokela o mbanza ya Lamote bhu maku a Hazayele sobha ya Sídya.
15 Ku pholo dya kwenda, sobha Jeholamu wavutuka ku Jezelele phala kudisanza, mukonda akwa Sídya a mukwamene kyoso mwene kyabhânge ni Hazayele sobha ya Sídya.
Jehú wambe wixi: “Se kya miwabhela, kimwehele muthu kutunda mu mbanza, phala kuya mutangela o maka ya ku Jezelele.”
16 Mukusuluka, Jehú wahabe mu dikalu dyê dya ita, yu wayi ku Jezelele, mukonda Jeholamu wayile kwenyoko phala kudisanza ku jifidila jê. Akaziya sobha ya Judá, wayile we mukunda Jeholamu.
17 Kyoso o mulangidi wexile mulanga o ilumbu ya Jezelele kyamono mayala avulu a mukwiza ni Jehú, mu kithangana kyenyokyo mwene wambe: “Nga mumona mayala avulu a mukwiza.” Jeholamu wambe, wixi: “Ixana muthu mukwa kwenda ni jikabalu ni u mutumikise-ku n’a ebhwidise: ‘O kwila o kwiza kwenu kwa kutululuka?’”
18 Kyenyiki, o mukwa kwendela mu jikabalu wayi mutakana ni Jehú yu wambe: “Sobha webhwidisa ‘O kwiza kwenu kwa kutululuka?’” Maji Jehú wa mutambwijila, wixi: “Maka yá kakutokala, bhita kudima dyami u ngikayele.”
O mulangidi wa atudila o njimbu mu kwamba: “O mukunji wabhixila kwa ene, maji kavutuka dingi.”
19 Kyenyiki, o sobha watumikisa diyala dyengi mukwa kwendela ni jikabalu. Kyoso o diyala kyabhixila bhwakexile ene, wa ambela: “Sobha webhwidisase ‘o kwiza kwenu kwa kutululuka.’” Maji Jehú wa mutambwijila, wixi: “Maka yá kakutokala, bhita kudima dyami u ngikayele.”
20 O mulangidi wambe, wixi: “O mukunji wabhixila-ku, maji kavutuka dingi. O ukexilu wa mukwendesa o dikalu dya ita, ngafika kwila Jehú, mulawula* wa Nimisi, mukonda mwene wendesa kala dilaji.”
21 Jeholamu wambe: “Sokejekenu o dikalu dyami dya ita!” Kyenyiki, asokejeka o dikalu dyê dya ita, Jeholamu sobha ya Izalayele ni Akaziya sobha ya Judá, kala muthu wabande ku dikalu dyê dya ita. Ene anga atunda phala kudisanga ni Jehú, ene adisange-nê mu kibhela kya Nabote ku Jezelele.
22 Kyoso Jeholamu kyamono Jehú, wa mwibhwidisa: “O kwila o kwiza kwê kwa kutululuka?” Mwene wa mutambwijila, wixi: “Kyebhi ki kwanda kala kutululuka se o undumbu ni ima ya wanga ya mam’enu Jezabele yajiji?”
23 Mu kithangana kyenyokyo, Jeholamu wabhiluka ni dikalu dyê dya ita, phala kulenga yu wambela Akaziya: “Akaziya, a tulungulukila!”
24 Jehú wakwata o mufula yu wa utakula, o musongo watula ku dikunda dya Jeholamu, wabokona kate ku phumbulu, mwene anga ubwa ku dikalu dyê dya ita.
25 Mukusuluka, Jehú wambela o kabhitangu kê Bidikale, wixi: “Mukwate, mutakule mu kibhela kya Nabote, o mukwa Jezelele. Lembalala kwila, eye n’eme, twexile mukwendesa kumoxi o makalu a ita, mu kukayela Akabe tata ya Jeholamu, kyoso Jihova kyambe yalungu ni mwene, wixi:
26 ‘“Jihova wambe kiki: “Kala ki ngamono maza o manyinga a Nabote ni manyinga a an’ê,” eme nganda kuvutwila phonzo bhu kibhela kiki, bhu wabhange o ima yiyi.” Kiki kyene kyambe Jihova.’ Mukiki-phe, mukwate ni u mutakule mu kibhela kala kyambe Jihova.”
27 Kyoso Akaziya sobha ya Judá kyamono o ima yexile mubhita, mwene walenge mu njila iya ku njaludim. (Ku pholo dya kwenda, Jehú wa mukayela yu wambe: “Jibhenu we o diyala didi!” Kyenyiki, kyoso Akaziya kyexile mu dikalu dyê mu kubanda ku mbanza ya Ngule, ya zukama ni mbanza ya Ibelayime, a mutakula sosa ya a mukwama. Maji mwene wasuluka ni kulenga kate ku Mejidu, anga ufwila kwenyoko.
28 Kyenyiki, o jiselevende jê a mwambata mu dikalu dya ita kate mu Jeluzaleme, anga a mufunda mu mbila yê bhu mbandu bhwa fundile o jikuku jê, mu Mbanza ya Davidi.
29 Akaziya a mutumbikile ku usobha mu Judá ku muvu wa dikwinyi ni kamoxi, wa utuminu wa Jeholamu mon’a Akabe.)
30 Kyoso Jehú kyabhixila ku Jezelele, Jezabele kya kivu, wayi mu fwamesa o mesu ni kolo ya xikatela, wayudika o ndemba yu wayi mutalela mu njanena.
31 Kyoso Jehú kyabhixila bhu mwelu wa mbanza mwene wa mwambela wixi: “O kwila Nzidi waditundu kyambote mu kujibha ngana yê?”
32 Jehú watalela bhu njanena yu wambe: “Nanyi wala ku mbandu yami? Nanyi mwene?” Mu kithangana kyenyokyo, jifixiyadi jiyadi mba jitatu ja sobha atale bhoxi bhwexile mwene.
33 Mwene wambe: “Mutakulyenu bhoxi!” Kyenyiki, ene a mutakula, o manyinga mê atula ku phalelu ni ku jikabalu, Jehú wa mudyota ni dikalu.
34 Mukusuluka, mwene wabokona m’onzo, wadi yu wanu, anga wamba, wixi: “Kwatenu o muhatu yú mukwa phulu ni mu mufunde, mukonda mwene mon’a sobha.”
35 Maji kyoso kyayi phala ku mufunda, ene kasange-ku kima, kikale ngo o kiholongonyo kya mútwe, o inama ni maku.
36 Kyoso kyavutuka ya a mutangela, mwene wambe, wixi: “Kya mu dikumbidila o kizwelu kya Jihova kyazwela mwéne bhukaxi ka selevende yê Elija mukwa Tejibita, kyoso kyambe: ‘O jimbwa janda dya o xitu ya Jezabele mu kibhela kyala ku Jezelele.
37 O kimbi kya Jezabele kyanda kala kala matobe ku mabhya mu kibhela kya Jezelele, phala o athu kazwele kwila: “Yú Jezabele.”’”
Footnotes
^ Mu Heba.: “oso yó asusa mu ilumbu. Mu Hebalayiku o kizwelu kiki kilombolola kusebhulula, kyene kyalungu ni mayala.”
^ Mu Heba.: “mon’a diyala.”
