Mukanda wa Kayadi ku Akwa Kolindu 12:1-21
12 Sumbala kinganda tambula kima mu kudinanza kwami, maji ngatokala kudinanza. Kindala nganda zwela o isumwa ni njimbu i ngatambula kwa Ngana.
2 Ngejiya diyala, dixibulu dya Kidistu. Kwabhiti kyá kwinyi ni kiwana kya mivu tundé kya mwambatele ku dyulu dya katatu, ki ngejiya se amwambata ni mukutu wê wa xitu, mba kana. Maji Nzambi ngó wa k’ijiya.
3 O diyala didi nga mwijiya mwene, maji se a mwambata ni mukutu wê wa xitu, mba kana, eme ki nga k’ijiya. Maji Nzambi wa k’ijiya.
4 Mwene a mwambata ku palayízu, yu wevu izwelu o athu katokala kwívwa, né ku itangela akwâ.
5 Nganda dinanza mukonda dya diyala didi, ki mukonda dyami-eme kana, maji nganda dinanza ngó mu kuzoza kwami.
6 Né mwene se ngandalele kudizangeleka, kikyeji kala wôwa, mukonda o ima i ngeji zwela yeji londekesa kwila nga muzwela o kidi. Maji ki ngi dizangeleka phala ki bhukale muthu uxinganeka kwila, o ima i nga mubhanga ya betakota, o ya mu kwívwa ni ku ngimona kubhanga, ndenge,
7 mukonda ngitambula jinjimbu javulu kwa Ngana.
Phala ki ngi dizangeleke kyavulu, sayi kibhidi kya mu ngitatesa kala minya mu xitu. O kibhidi kiki, kyeza kala mukunji wa Satanaji, wa mu ngibhana jihuxi phala ki ngi dizangeleke kyavulu.
8 Lutatu nga dyondela kwa Ngana n’a ngi katule o kibhidi kiki.
9 Maji mwene wa ng’ambela, wixi: “O ngalasa i nga kukwatela ya kusoko kyá, mukonda kyoso ki uzoza, o nguzu yami kokwé i betakota.” Kyenyiki, nganda dizangeleka ni kusanguluka kwoso, phala o kutena kwa Kidistu kunangenene kokwami.*
10 Mu kiki, ngi sanguluka kyoso kingizoza, kyoso kingikala ni ibhindamu, kya ngi zukutisa, kyoso ki ngibhita mu ibhidi mukonda dya Kidistu. Kuma kyoso kingizoza, kyene kingikala dingi ni nguzu.
11 Nga kituka ngi kyôwa. Énu mwa ngi bhangesa kukala ngi kyôwa, mukonda mwatokalele kuzwela o kidi kyalungu n’eme. Sumbala ki ngala ngi kima, maji o jipoxolo jenu ja katunda ki jala kota, eme ndenge.
12 O ima ilondekesa kwila eme ngi poxolo, yamoneka mwaxaxi k’enu bhukaxi ka kukolokota, ijimbwete, isumwa ni madiwanu.
13 Eme ki nga mibhingile kima, mukonda dya kiki, enu ki mwasokela ni ilunga yéngi. O kwila mu kubhanga kiki, nga lweza? Se nga lweza, mu ngiloloka.
14 Talesenu phe, yiyi yene o veji ya katatu i nga mesena kwiza ku mi kunda, eme ki nganda ku mi bhinga kima. Mukonda ki ngandala o jimbote jenu, maji nga myandala enu, kuma o jitata ka lundula o ima ya twana, maji o twana éne alundula o ima ya jitata.
15 Ku mbandu yami, nganda ngastala yoso i ngala nayu ni kudibhakula ni muxima woso phala o mbote yenu. Se eme nga mi zolo kyavulu, o kwila mwa tokala ku ngi zola bhofele?
16 Né mwene kiki, ki nga mi bhingi kima. Maji enu muzwela kwila “nga mi nganala” ni kwila nga mi kwata ku “mubhetu”.
17 O kwila nga mi nyana kima bhukaxi ka athu u nga mitumikisa?
18 Eme ngabhingile kwa Titu phala kuya ku mikunda kumoxi ni phange ya mukwâ. O kwila Titu wa mi nyana kima? O kwila ka mu twendesa mu nzumbi imoxi? O wendelu wetu kiwene umoxi ngó?
19 Nange mwa mu banza kwila twa mu dizokela mudyetu, maji kikyene. Kuma tu akayedi a Kidistu, twa muzwela o kidi bhu pholo ya Nzambi. Enu akwetu jiphange jetu jakazola, yoso itubhanga, twa mu ibhanga phala ku mi swinisa.
20 Ngala ni hele ya kwila kyoso ki ngibhixila kwenyóko, ngi misanga kwila o wendelu wenu ki wala kala ki ngamesena, anga ngibhanga we o ima mu ukexilu ki mwa u mesena. Nange ngi misanga ni jimvunda, difuba, jinjinda, kuzoka, kuditatela, jimbwembwe, kudizangeleka, ni kavwanza.
21 Nange kyoso kinganda vutuka, Nzambi yami u ngi tolesa bhwa xaxi k’enu, anga ngi kala ni dilamba mukonda dya athu avulu atele ituxi m’ukulu, akambe kudyela o ufusa wâ, o undumbu,* ni uhabhu* woso wabhange.
Footnotes
^ Mu Ngel.: “o kutena kwa Kidistu kunangenene ku thandu dyami kala balaka.”
^ Mu Ngeleku, por·nei′a. Tala o Dilombolwelu.
^ Mu Ngeleku, asélgeia. Tala o Dilombolwelu.
