Mukanda wa Kayadi ku Akwa Kolindu 6:1-18
6 Mu kukalakala kumoxi ni Nzambi, tu mi tangela kwila, xikinenu o ngalasa ya Nzambi. Kuma yene mwa itambula kyá, ki mu yehele dingi kudibota.
2 Mukonda Nzambi wambe: “Mu kithangana ki wa bhindamene, eme nga kwívu, nga ku kwatekesa mu kizuwa kya kubhuluka. Kindala kyene o kithangana kya Nzambi ku twivwidila. Kindala kyene o kithangana kya ku tubhulula kwa Nzambi!
3 Ki tubhangese muthu kudibhala mu kima kyoso-kyoso, phala o athu ka zwele kyayibha yalungu ni ukunji wetu,
4 maji tu dijidisa ku athu oso kwila tu akunji a Nzambi, mu kukolokota mu jihadi javulu, mu izukutisu, mu ithangana ya ibhindamu ni mu ibhidi.
5 Tu kolokota kyoso kya tubeta, tu kolokota we kyoso kya tuta mu jikaleya, mu kudibhana ni athu akwa jimvunda, mu kukalakala kyavulu, mu kubhita mausuku sé kuzeka, ni mu ithangana ya nzala.
6 O wendelu wetu wazele, twala ni kwijiya kwa kidi, tulondekesa o mwanyu, twala ni muxima wambote, twa mu kwehela o nzumbi ikôla kwendesa o myenyu yetu, ki tulondekesa henda ya makutu.
7 Tuzwela ima ya kidi, tudyelela mu kutena kwa Nzambi. Ni lukwaku lwetu lwa kadilu* ni lwa kyasu,* tu kwata o mauta metu ma kuyuka.
8 O athu a tubhana kijingu, a tusebhulula, a tuzwela kyayibha, maji a tuximana we. A tumona kala tu akwa makutu, sumbala twene muzwela o kidi.
9 Ka twijiya ku athu, maji Nzambi wa twijiya. Sumbala o athu a tumona kwila twa fwama o kufwa, maji twala ku mwenyu, sumbala a tubeta,* maji ki tufu.
10 Athu a tumona kwila tu akwa malamba, maji tu sanguluka jinga, a tumona kwila tu jingadyama, maji tubhana ima yavulu ku akwetu. A tumona kwila kitwala ni kima, maji twala ni ima yavulu.
11 Enu akwetu mu akwa Kolindu, mu kuzwela ni enu twa mi tangela o kidi, etu twa mi zolo kyavulu.*
12 Etu ki twa mi jikila o mixima yetu, maji énu mwa tujikila o mixima yenu.
13 Kyenyiki, ngi myambela kala mu an’ami, bhangenu we kala ki twa mi bhange, jikulenu o mixima yenu.
14 Ki mudite* ni yó kaxikana Ngana. O kwila o kuyuka kutena kukala kumoxi ni kuyibha? O kwila o mukengeji utena kudilunga ni kitombe?
15 O kwila Kidistu utena kudilunga ni Kadya-phemba?* O muthu waxikana Ngana, utena kudilunga ni yó kaxikana Ngana?
16 O iteka ki itokala kukala mu tembulu ya Nzambi. Etu-phe, twala tu tembulu ya Nzambi ya mwenyu, kala kyambe mwene, wixi: “Nganda kala mwaxaxi kâ, ni kwenda mwaxaxi kâ, nganda kala ngi Nzambi yâ, ene anda kala mundu wami.”
17 Jihova wambe, wixi: “Tundenu mwaxaxi kâ, mu disandule. Kanenu kukwata mu ima yaxidi, eme nganda mi tambulula.”
18 Jihova o Muteni wa Yoso wambe dingi: “Eme nganda kala ngi tata yenu, enu mwanda kala mu twana twami twa mala ni twa ahatu.”
Footnotes
^ Nange, phala kubhânga.
^ Nange, phala ku di fikidila.
^ Mba, “a tu kaxtikala.”
^ Mba, “twa mi jikwila kyambote o mixima yetu.”
^ Mba, “ki mu di bunde.”
^ Mba, “Beliyale,” dijina dya tokala kwa Satanaji.
