Divulu Dya Kayadi Dya Samuwele 1:1-27
1 O kyabhiti o kufwa kwa Sawulu ni kyoso Davidi kyavutuka mu kutolola* akwa Amaleke, Davidi wabhange izuwa iyadi ku Zikilake.
2 Mu kizuwa kya katatu, kweza diyala watundu ku masoladi a Sawulu, ni izwatu yatandujuka ni mavu ku mútwe. Kyoso mwene kyazukama kwa Davidi, wafukama yu waditakula bhoxi.
3 Davidi wa mwibhwidisa: “Eye wa mutunda kwebhi?” Mwene watambwijila: “Ngalenge mu kifuxi kya masoladi kya Izalayele.”
4 Davidi wa mwibhwidisa dingi: “Ihi yabhiti?” Mwene watambwijila: “O masoladi alenge* mu ita, avulu a akwama ya afu. Kate mwene Sawulu ni Jonatá afu we.”
5 Davidi webhwidisa ku diyala dya mubhekela o njimbu, wixi: “Kyebhi ki wejiya kwila Sawulu ni mon’ê Jonatá afu?”
6 O diyala wa mutambwijila, wixi: “Eme ngexile ku mulundu wa Jilibowa, eme ngamono Sawulu waxamenena ku sosa yê, o makalu a ita ni mayala endela ku jikabalu exile mu muzukama.
7 Kyoso mwene kyatale kudima, wa ngimono yu wa ngixana. Eme nga mutambwijila: ‘Eme bhabha!’
8 Mwene wa ngibhwidisa: ‘Eye nanyi?’ Eme nga mutambwijila: ‘Eme ngimukwa Amaleke.’
9 Kyenyiki mwene wambe: ‘Zá bhabha u ngijibhe, mukonda ngatate kyavulu, sumbala ngala hanji ni mwenyu.’
10 Mukonda dyakiki ngayi kate bhwakexile mwene, eme nga mujibha mukonda ngamono kwila mwene a mukwama kyavulu, kejitena kubhuluka. Ngakwata o kitundu kyakexile ku mútwe ni musanga wexile mu lukwaku, eme nga kubhekela-u, eye u ngana.”
11 Bhenyobho Davidi watandula o izwatu yê, o mayala oso akexile-nê kumoxi kyene we kyabhange.
12 Ene adidi, adikwata mukondo, ajejuwala mukonda dya Sawulu ni mon’ê Jonatá ni mundu wa Jihova ni mukonda dya inzo ya Izalayele afu ku xibhata.
13 Davidi webhwidisa o diyala wa mubhekela o njimbu, wixi: “ Eye u mukwa kwebhi?” Mwene watambwijila: “Ngi mon’a musonyi mukwa Amaleke.”
14 Davidi wa mwibhwidisa: “Mukonda dyahi eye kiwakexile ni wôma wa kujibha o muthu a mu undu kwa Jihova?”
15 Kyenyiki, Davidi wexana o disoladi dyê, yu wa mutumina: “Zá bhabha, jibha o diyala didi.” Bhenyobho mwene wajibha o diyala.
16 Davidi wambe: “Éye wala ni kikuma kya kufwa kwé. Mukonda o dikanu dyé, dyene dya kubalakala, kyoso kiwambe: ‘Eme ngajibha o muthu a mu undu kwa Jihova.’”
17 Kyenyiki, Davidi wembi mwimbu wa thambi mukonda dya Sawulu ni mon’ê Jonatá.
18 Davidi wambe kwila o mwimbu yú atokalele ku ulonga ku mundu wa Judá. O mwimbu yú, awixana “Mufula.” A usoneka mu divulu dya Jexele, wene wamba:
19 “O kijingu kyé u Izalayele, kyadibotela ku milundu.
O mazonda adibhale!
20 Kimukitangele kwa Ngate;Kimukifumanese mu ikoka ya akwa Axikilone,Phala o an’a ahatu, akwa Fidíxa kasanguluke.Phala o an’a* ahatu a yó akambe ku asaya kakembe.
21 Enu mu milundu ya Jilibowa,Kikulawuke mbundu mba kunoka mvula ku thandu dyenu.Né mavu abhana idima phala jisata,Mukonda koko, o ngubu ya mazonda ka ixila.O ngubu ya Sawulu kiyamubhenya dingi ni máji.
22 O mufula wa Jonatá kiwakexile mulweza,O xibhata ya Sawulu kiyexile muvutuka sé kikowe.O mufula ni xibhata yexile mu jibha o mazunda a masoladi ni kwizala ni manyinga.
23 Sawulu ni Jonatá a azolele kyavulu ku mwenyu wâ woso.Kate mwene mu kufwa ka asandula.
Mu kulenga, ene abetele dingi kota o jiholokoko ndenge.Abetele kota mu nguzu, o jihoji ndenge.
24 Enu mu an’a ahatu a Izalayele, dilenu Sawulu,Wa mizwikile o izwatu yakusuka yu wa ifwamesa.Wafwamesa o izwatu yenu ni ulu.
25 O makwenze abwila mu ita!
Jonatá wafu, o kimbi kyê kyala ku milundu!
26 Ngala ni kikote* ku muxima mukonda dya eye, phang’yami Jonatá.Eye wexile u dikamba dya kazola.
O henda i wa ngikwatela yabetele-kota, o henda ya ahatu ndenge.
27 O mazonda metu adibhale,O mata a ita adiboto!”
