Divulu Dya Kayadi Dya Samuwele 10:1-19
10 Mukubhita thembu, o sobha ya akwa Amone wafu, o mon’ê Hanune mwene wakituka sobha bhu kididi kyê.
2 Kyenyiki, Davidi wambe: “Nganda londekesa henda kwa Hanune mon’â Nahaxi, kala tat’ê kya ngilondekesa henda.” Kyenyiki, Davidi watumikisa o jiselevende jê phala ku mukonda o malamba mukonda dya kufunda tat’ê. Maji-phe, kyoso o jiselevende ja Davidi kyabhixila-ku,
3 o ilamba ya akwa Amone ambela Hanune ngana yâ, exi: “Eye wa mufika kwila Davidi watumikisa o mayala ya phala kujingisa tat’é mu ku kukonda o malamba? Davidi watumikisa o jiselevende jê phala kulonda o mbanza ni ku ijiya kyambote, phala ku ibwika.”
4 Mukusuluka, Hanune wakwata o jiselevende ja Davidi wa abhutu mbandu ya mwezu, wabatula o izwatu yâ kate mu mbunda anga wa akaye.
5 Kyoso kya kitangela kwa Davidi, ni lusolo lwoso mwene watumikisa mayala phala kudisanga ni jiselevende jê mukonda a akwatesa jisonyi javulu. O sobha wa ambela: “Kalenu hanji ku Jedikó kate myezu yenu ki yanda kula.”
6 Mu kubhita thembu, akwa Amone amono kwila ene abhangesa Davidi kukala ni njinda. Kyenyiki, akwa Amone atumikisa akunji phala kufuta makwinyi ayadi a masoladi akwa Sídya ya Bete-Lehobo ni Sídya ya Zoba phala ku akwatekesa mu ita. Afutu we sobha ya Mahaka ni midi ya mayala ni dikwinyi ni kiyadi kya mayala* akwa Ixitobe.
7 Kyoso Davidi kyeza mukwijiya o maka ya, mwene watumikisa Jowabe ni kifuxi kyoso kya masoladi, kate mwene ni masoladi exile dingi ni uhete.
8 O akwa Amone atundu ya adisokejeka bhu dibhitu dya mbanza, maji o akwa Sídya ya Zoba ni akwa Bete-Lehobo kumoxi ni akwa Ixitobe* ni Mahaka, adisokejeka ku mbandu yengi ku mukáwu.
9 Kyoso Jowabe kyamono kwila o jinguma jexile mu kwiza ku pholo ni mu jimbandu phala kubhânga nawu, mwene wasolo o masoladi a Izalayele exile dingi ni uhete, yu wa asokejeka phala kubhânga ni akwa Sídya.
10 O masoladi amukwa, mwene wa axisa ni* phang’yê Abizayi, phala kwasokejeka n’a bhânge ni akwa Amone.
11 Kyenyiki, Jowabe wambe: “Se akwa Sídya a ngitunda mu nguzu, eye wiza mu ngikwatekesa, maji se akwa Amone akutunda mu nguzu, eme nganda kwiza mu kukwatekesa.
12 Twatokala kukolokota ni kubhânga ni kuswina, mukonda dya mundu wetu ni jimbanza ja tubhana Nzambi yetu. Jihova wanda bhanga o kima kya mu wabhela.”
13 Kyenyiki, Jowabe ni mayala mê ayi mubhânga ni akwa Sídya, o akwa Sídya anga alenga.
14 Kyoso akwa Amone kyamono kwila akwa Sídya alenge, ene alenge we Abizayi, ya avutuka mu mbanza. Kyoso kyazubha kulwa ni akwa Amone, Jowabe wavutuka mu Jeluzaleme.
15 Akwa Sídya kyamono kwila a atolola ku akwa Izalayele, ene adibhongolola dingi.
16 Mukusuluka, Hadadezele wexana akwa Sídya akexile mu mbambe ya ngiji ya Ewufalate. Ene eza ku Helamu mu kwa endesa kwala Sobaki o mutwameni wa kifuxi kya masoladi kya Hadadezele.
17 Kyoso Davidi kyeza mukwijiya o maka, mwene wabhongolola Izalayele yoso, wazauka o ngiji ya Njolodá, yu wabhixila ku Helamu. Akwa Sídya adisokejeka ya abhânge ni Davidi.
18 Kyenyiki, akwa Sídya alenge akwa Izalayele. Davidi wajibha-ku hama asambwadi a mayala endela mu makalu a ita, ni makwinyi awana a midi akwa Sídya endela mu jikabalu. Wajibha we Sobaki o mutwameni wa masoladi.
19 Kyoso o jisobha joso ni jiselevende ja Hadadezele kyamono kwila a atolola kwala akwa Izalayele, ene abhange paze ni akwa Izalayele anga amateka kwatumina kwala akwa Izalayele. Akwa Sidya anga akala ni wôma wa kukwatekesa dingi akwa Amone.
