Divulu Dya Kayadi Dya Samuwele 13:1-39
13 Abisalone mon’â Davidi wexile ni phang’yê ya muhatu amwixana Tamala. Mwene wa wabhele kyavulu, Aminone mon’â Davidi wamateka ku mu wabhela.
2 Aminone wathandanganyele kyavulu kate wakatele, mukonda dya phang’yê Tamala. Kuma Tamala wexile muzeletete, mwene wamono kwila kyeji bhonza ku mubhanga kima.
3 Aminone wexile ni dikamba amwixanene Jonadabe mon’â Ximeyá phange’a Davidi. Jonadabe wexile diyala dya dimuka kyavulu.
4 Jonadabe wa mwibhula: “Mukonda dyahi eye u mon’â sobha, wa luwala izuwa yoso? Ngitangele yamubhita, ngakudyondo.” Aminone wa mutambwijila: “Nga muwabhela Tamala, ndenge a phang’yami Abisalone.”
5 Jonadabe wa mwambela, bhanga kiki: “Zeka mu hama yé wila kala wa mukata. Kyoso Tat’enu kyanda kwiza mu ku kunda, u mutangela: ‘Nga kudyondo, ehela phang’yami Tamala kwiza mu ngikunda ni ku ngibhana kama ka kudya. Se mwene u ngilambela o kudya kwa jihaxi ku pholo yami, eme nganda dya bhu maku mê.’”
6 Kyenyiki, Aminone wazeka bhu hama yê, yu wadibhange kala wamukata. O sobha anga wiza mu mukunda. Aminone wambela o sobha: “Ngakudyondo, ehela phang’yami Tamala kwiza phala ku ngibhangela tumbolo tuyadi bhabha ku pholo yami n’a ngibhane-tu ni ngidye.”
7 Kyenyiki, Davidi watumu kwambela Tamala, wixi: “Ngakudyondo, ndé mu inzo ya phang’yé Aminone u mulambele kakudya.”
8 Tamala wayi mu inzo ya phang’yê Aminone, mwazekele mwene. Mwene wakwata o fadinya, wabhange o jimbolo, yu wa joha.
9 Mukusuluka, mwene wakwata o imbya yu wa musidivila, maji Aminone waditunu o kudya, yu wambe: “Tumenu o athu oso kutunda.” Ene oso anga atunda.
10 Aminone wambela Tamala, wixi: “Za ni mbolo mu xilu yami phala u ngidise.” Kyenyiki, Tamala wakwata o jimbolo jabhangele yu wajambata mu xilu ya phang’yé Aminone.
11 Kyoso Tamala kya mwambatela o jimbolo, Aminone wa mukwata, yu wambe: “Phang’yami, za uzeke n’eme.”
12 Maji Tamala wa mwambela: “Kana phang’yami! Kana ku ngibhitisa jisonyi, mukonda mu Izalayele kene mubhanga-mu o kima kiki. Kana kubhanga o kima kiki kibhekela jisonyi.
13 O kwila o athu eji jimba o kima kiki kyeji ngibhekela jisonyi? Eye we o athu oso mu Izalayele eji kumona kala u diyala wakambe kilunji. Ngakudyondo, zwela ni sobha, mukonda mwene kanda dituna se u mubhinga phala ngikale ngi muhat’wé.”
14 Maji Aminone waditunu ku mwivwa. Kyenyiki, wa mukwata ni nguzu, yu wa mujijidika kuzeka-nê. Mukubhanga kiki, mwene wa mubhitisa jisonyi.
15 Aminone anga umateka ku muzemba kyavulu. Mwene wabetele-kota o ku muzemba, o henda yakexile nayu kwa mwene ku dimatekenu, ndenge. Mwene wa mwambela: “Balumuka, tunda bhabha!”
16 Tamala wixi: “Kukibhange phang’yami. O ku ngikaya kwayibha dingi, o kima ki wa ngibhange ndenge.” Maji mwene kamubhana mátwi.
17 Kyenyiki, mwene wexana o munzangala wexile mu musidivila, anga u mwambela: “Katula o muthu yú mu inzo yami, jika o dibhitu!”
18 (Tamala wazwatele divunga dya katunda, mukonda o ana sobha exile mizeletete akexile muzwata o izwatu yiyi.) Kyenyiki, o selevende ya Aminone wa mutubhula bhu kanga yu wajika o dibhitu.
19 Tamala wadite uthôkwa mu mútwe yu watandula o divunga dyê. Mwene wayi ni kudila ni dízwi dyaswina ni maku mu mútwe.
20 Kyabhiti o ima yiyi, Abisalone anga u mwibhwidisa: “Phang’yé Aminone mwene wa kubhange kiki? Phang’yami, kana kutangela o maka yá ku muthu wengi, mwene phang’yé, kana kuthandanganya ni maka yá.” Mukyenyiki, Tamala utunga mu inzo ya Abisalone. Tamala kexile mudisanga dingi ni athu engi.
21 Kyoso Davidi kyeza mu kwijiya o maka yá njinda ya mukwata. Maji mwene kamesenene kuluwalesa mon’ê Aminone, mukonda wa muzolele kyavulu, mukonda mwéne o mona wa dyanga.*
22 Abisalone kazwela né ngo kima kimoxi kwa Aminone, kikale kyawabha mba kyayibha, mukonda wa muzembele kyavulu. Mukonda Aminone wabhangele ufusa kwa phang’yê Tamala.
23 Mu kubhita mivu iyadi, o akwa kubhuta o jimbudi ja Abisalone akexile ku Bahale-Hazole bhwa zukama ni Efalayíme. Abisalone anga wixana o twana twoso twa sobha phala kuya kwenyoko.
24 Kyenyiki, Abisalone wayi kwa sobha yu wa mwambela, wixi: “O selevende yé wa mubhuta o jimbudi. Ngakudyondo sobha, zá kumoxi ni jiselevende jé.”
25 O sobha wambela Abisalone, wixi: “Kana mon’ami. Se etu enyoso tuya-ku, kwanda kubhonza kyavulu. Sumbala Abisalone wa mujijidika maji o sobha waditunu.
26 Abisalone wambe, wixi: “Se kumesena kuya, ehela phag’yami Aminone kuya kumoxi n’etu.” O sobha wa mwibhula: “Mukonda dyahi Aminone watokala kuya kumoxi n’eye?”
27 Maji Abisalone wajiji, mukyenyiki o sobha watumu Aminone ni twana twoso twa sobha kuya kumoxi ni mwene.
28 Abisalone watendelesa o jiselevende jê, wixi: “Tongininyenu kyambote Aminone. Kyoso kimwanda mona kwila o muxima wê wasanguluka mukonda dya vinyu, eme nganda mitangela: ‘Jibhenu Aminone!’ Kyenyiki, mwatokala ku mujibha. Kimukale ni wôma, eme nga mu mituma. Swinenu, kalenu mu indanda.”
29 O jiselevende ja Abisalone ajibha Aminone kala kya atumine Abisalone. Kyenyiki, o twana twamukwa twa sobha abalumuka, amondala mu jimula* jâ ya alenge.
30 Kyoso ene kyexile hanji mu njila, sobha Davidi watambula o njimbu ya kwila, “Abisalone wajibha o twana twoso twa sobha, kikwasubhuka muthu.”
31 Kyenyiki, o sobha wabalumuka watandula o izwatu yê yu waditakula bhoxi. O jiselevende joso ja sobha exile-nê kumoxi atandula we o izwatu yâ.
32 Maji Jonadabe mon’â Ximeyá phang’yâ Davidi, wambe: “Ngana yami, kana kubanza kwila o minzangala yoso o twana twa sobha afu, mukonda kwafu ngo Aminone. Kiki kyabhiti mukonda Abisalone mwene watumu kukibhanga, kuma mwene wakitele kya ku muxima tunde Aminone kyabhange ufusa kwa phang’yê Tamala.
33 Kyenyiki, ngana yami u sobha, kana kubhana mátwi mu njimbu ya kwila o ana oso a sobha afu, mukonda Aminone ngo wafu.
34 Maji Abisalone walenge. Ku pholo dya kwenda, o mulangidi wa mbanza wamono kwila athu avulu exile mu kwijila mu kikoka kyakexile kudima dyê, bhwa zukama ni mulundu.
35 Kyenyiki, Jonadabe wambela o sobha, wixi: “Tala! O an’â sobha avutuka. Kyabhiti mwene kala kyazwela o selevende yé.”
36 Kyoso mwene kyazubha kuzwela, o twana twa sobha abokona ni kudila ni dízwi dyaswina. O sobha ni jiselevende jê joso anga adila we kyavulu.
37 Abisalone walengela kwa Talamayi mon’â Amihudi sobha ya Jesule. Davidi wabhiti izuwa yavulu mu kudila mon’ê.
38 Kyoso Abisalone kyalengela ku Jesule, mwene wabhange-ku mivu itatu.
39 Mukusuluka, sobha Davidi wamesenene kyavulu kuya mumona Abisalone, mukonda o malamba a kufunda Aminone abhitile kya.
Footnotes
^ Mba, “mon’a phandekumbi.”
^ Mu Hebalayiku, o kizwelu kiki kilombolola o mukaji wa kyama akixana bulu.
