Divulu Dya Kayadi Dya Samuwele 14:1-33
14 Jowabe mon’â Zeluya, weza mu kwijiya kwila, o sobha wexile ni ngunzu ya Abisalone.
2 Kyenyiki, Jowabe watumu ku mubhekela muhatu wala njimu mukwa Tekowa, yu wa mwambela: “Ngakudyondo, dibhange kala muthu wala ni malamba, ta izwatu ya mutudi. Kana kudiwaya máji a dizumba ku mukutu, dibhange kala u muhatu wa mudila mukonda dya kufunda muthu.
3 Mukusuluka, ndé kwa sobha, u mwambela o ima i nganda kutangela.” Kyenyiki, Jowabe wa mutangela yoso yatokalele o kuzwela.
4 O muhatu mukwa Tekowa wayi kate ku pholo ya sobha, ufukama ni pholo bhoxi anga u mudyondela, wixi: “Ngakudyondo sobha, ngikwatekese!”
5 O sobha wa mwibhwidisa: “Maka ebhi u wala nawu?” Mwene wa mutambwijila wixi: “Eme ngi mutudi, mwadi wami wafu.
6 Mwene wa ngixisa ni twana tuyadi, ene exile mudibeta, kibhwexile muthu phala kwa zokela. Umoxi wajibha mukwa.
7 Kindala o mwiji woso wa ngilungulukila, ya a muzwela, exi: ‘Tubhane yó wajibha phang’yê. Etu twanda mujibha, phala mwene n’a fute o mwenyu wa phang’yê, ne mwene se kiki kilombolola kujibha o mulundudi!’ Ene andala kujima o dikala dyami dya túbhya dya xala-ku,* o munum’yami n’a kale se dijina, se mbutu mu ngongo.”
8 O sobha wambela o muhatu, wixi: “Ndé kubhata dyé, eme nganda tuma kubatula o maka mé.”
9 Kyenyiki, o muhatu mukwa Tekowa wambela o sobha, wixi: “Eye u ngana yami u sobha, o kikuma kikale n’eme ni ku dibhata dya tata yami. Eye u sobha ni utuminu wé ki mukale ni kikuma.”
10 O sobha wa mutambwijila, wixi: “Se bhukala dingi muthu uzwela n’eye o maka enya, u mubheka kokwami, mwene nuka dingi wanda kubhanga kima.”
11 Kyenyiki, o muhatu wambe, wixi: “Ngakudyondo sobha, lembalala Jihova Nzambi yé phala o muzokedi wa manyinga kabhange kima kyayibha anga ujibha mon’ami.” Mwene wa mutambwijila, wixi: “Mu dijina dya Jihova wene ku mwenyu, ku mútwe wa mon’é kikwanda lawuka ne ngo lundemba lumoxi.”
12 O muhatu wambe dingi, wixi: “Ngakudyondo, ehela o selevende yé kuzwela-ku ngo dingi kima, kwa ngana yami u sobha.” O sobha wa mutambwijila, wixi: “Zwelé!”
13 O muhatu wambe, wixi: “Kyenyiki-phe, mukonda dyahi eye wabanze kubhanga o kima kiki ku mundu wa Nzambi? Mu kuzwela kiki, o sobha wa mudibelesa, kuma wakaye mon’é, eye walembwa ku mutuma kuvutuka.
14 Mukidi etwenyoso twanda fwa, twanda difwangana kala o menya o lundulule bhoxi katena kwa katula dingi. Mu kyenyiki, Nzambi keji batula mwenyu wa muthu, maji se o muthu a mubalakala, mwene usota o kima kyeji bhangesa o muthu a mubalakala ku muzukama dingi.
15 Ngeza kate bhabha muzwela ni sobha, mukonda ngexile ni wôma wa mundu, kuma selevende yé wabanze: ‘Ngandaya muzwela ni sobha, nange o sobha ubhanga o kima kyanda mubhinga o mubhik’é.
16 O sobha nange wívwa, anga ubhulula o mubhik’ê bhu maku a diyala wamesena ku ngijibha ni kujibha monami umoxi, o undundu wa ngibhana Nzambi.’
17 O selevende yé waxinganeka we: ‘O kizwelu kya ngana yami o sobha, ki ngitululukise.’ Kuma o ngana yami wedi kala anju ya Nzambi yakidi, utena kutongolola kyawabha ni kyayibha. Jihova Nzambi yé akale n’eye.”
18 Kyenyiki, o sobha wambela o muhatu, wixi: “Kana kungiswekela kima, ku yoso i nganda kwibhwidisa.” O muhatu wa mutambwijila, wixi: “Ngakudyondo ngana yami u sobha, zwelé.”
19 Kyenyiki, sobha wa mwibhwidisa, wixi: “Jowabe mwene wakutumu kuzwela o ima yiyi?” O muhatu wa mutambwijila, wixi: “Kala eye ngana yami u sobha wene ku mwenyu, kidi mwene ki wazwela. O selevende yé Jowabe mwene wa ngilongo o ima yoso yiyi.
20 Selevende yé Jowabe wa kibhangela phala kulungulula o ukexilu wé wakutala o maka, maji o ngana yami njimu kala o anju ya Nzambi yakidi. Wejiya yoso ya mubhita mu ixi yetu.”
21 Mukusuluka, o sobha wambela Jowabe, wixi: “Kyawabha, nganda bhanga o kima kiki. Ndé, u ngibhekele o munzangala Abisalone.”
22 Kyenyiki, Jowabe uditakula bhoxi anga u fukama, uximana o sobha. Jowabe wambe: “Lelu o selevende yé wejiya kwila, wasange favolo kumesu a ngana yami u sobha. Mukonda o sobha wabhange o kima kya mubhingi o selevende yé.”
23 Mukiki-phe Jowabe wabalumuka yu wayi kate ku Jesule, anga wiza ni Abisalone mu Jeluzaleme.
24 Kyenyiki, o sobha wambe: “Mwene avutuke kubhata, maji katokala kwiza phala kudisanga n’eme.” Abisalone anga uvutuka kubhata, maji kayi mudisanga ni sobha.
25 Mu Izalayele yoso, kibhwexile diyala exile mu muximana kyavulu mukonda dya kufwama kwê kala Abisalone. Tunde ku inama kate ku mútwe, ki kwa monekene kitote mba kisemu.
26 Kyoso kyexile mubhuta o ndemba, (mwene watokalele kukibhanga kudisukilu dya muvu mukonda yexile munema.) O ndemba yexile munema hama jiyadi ja jixikulu,* kala kyexile o pezu mu inzo ya sobha.*
27 Abisalone wexile ni twana tutatu twa mayala ni mona umoxi wa muhatu. Mwene a mwixanene Tamala, wexile muhatu wafwama kyavulu.
28 Abisalone watungu mu Jeluzaleme mu mivu iyadi ya muvimba. Maji mwene kamoneka ku pholo ya sobha.
29 Kyenyiki, Abisalone watumu kwixana Jowabe phala n’a mutumikise kwa sobha, maji Jowabe waditunu kwiza. Ku pholo watumu dingi kwixana Jowabe, maji ne kiki mwene waditunu kwiza.
30 Mukusukaku, Abisalone wambela o jiselevende jê, wixi: “O dibhya dya Jowabe dya zukama ni dibhya dyami. Mwene wakunu sevada ku dibhya dyê, ndenu mu dite túbhya.” Kyenyiki, o jiselevende ja Abisalone, ate túbhya mu dibhya dya Jowabe.
31 Mukonda dyakiki, Jowabe wayi kate ku dibhata dya Abisalone, yu wa mwibhwidisa, wixi: “Mukonda dyahi o jiselevende jé ate túbhya mu dibhya dyami?”
32 Abisalone watambwijila Jowabe, wixi: “Eme nga kutumikisa o njimbu yiyi: ‘Zá ngi kutumikise phala wibhwidise kwa sobha mu kwamba: “Mukonda dyahi ngatundu ku Jesule? Kikyeji beta-kota se ngaxalele kwenyoko? Kindala ngehele ngimone o sobha, se ngala ni kikuma mwene a ngijibhe.”’”
33 Kyenyiki, Jowabe wayi kwa sobha yu wa mutangela o maka enya. O sobha wexana Abisalone, mwene anga wiza kwa sobha ufukama, udyondela o sobha ni pholo bhoxi. O sobha anga ubhana nzobole kwa Abisalone.
Footnotes
^ Kifwa, o kidyelelu ki ngexile nakyu kya kukala ni mbutu.
^ Mba, “2,3 ya jigrama.” Tala o Kiba. B14.
^ O kizongelu kiki kyexile ngo mu mbonge ya sobha, ki kyadifwile mba ki kisokele ni izongelu yamukwa.
