Divulu Dya Kayadi Dya Samuwele 16:1-23
16 Davidi wexile mu kulumuka o mulundu, yu wadisange ni Nziba o mukwatekexi wa Mefibozete, wexile mu mukingila kwenyoko ni jijumendu jiyadi jezala ni kudya. Hama jiyadi ja jimbolo, hama ya jibolo jobhange ni jiuva, hama ya jibolo jobhange ni jifiku ni ibundu ya jitamala ni mbinda ya vinyu.
2 O sobha webhwidisa Nziba, wixi: “Mukonda dyahi weza ni ima yiyi?” Nziba wa mutambwijila, wixi: “O jijumendu phala yó atokala ku inzo ya sobha kusambela-ku, o jimbolo ni ibundu, phala o mayala kujidya, o vinyu phala yó anda bhwila mu kikangalakata.”
3 O sobha wa mwibhwidisa: “Mefibozete mon’â* ngana yé wala kwebhi?” Nziba watambwijila o sobha, wixi: “Mwene waxala mu Jeluzaleme mukonda wambe, wixi: ‘Mu kizuwa kyalelu, o dibhata dya Izalayele dyanda ngibhana dingi o utuminu wa tata yami.’”
4 O sobha wambela Nziba, wixi: “Yoso yatokala kwa Mefibozete, kindala ya kutokala.” Nziba wambe: “Eme ngi kufukamena ni ujitu woso. Ngisange ngalasa ku pholo yé, eye u ngana, u sobha.”
5 Kyoso sobha Davidi kyabhixila ku Bahudimi, sayi diyala watokala ku mwiji wa Sawulu amwixana Ximeyi mon’â Jela, weza ku mbandu yé anga umateka ku muxinga.
6 Mwene wexile mutakula matadi kwa sobha Davidi ni ku jiselevende joso ja sobha Davidi ni ku athu ni ku mayala exile indanda, exile ku mbandu ya kadilu ni ku mbandu ya kyasu ya sobha.
7 Mu kuxinga Davidi, Ximeyi wexile muzwela kiki: “Tunda bhabha! tunda bhabha! U diyala wala ni kikuma kya manyinga. U diyala wakambe valolo.
8 Jihova wa mubhangesa kwila eye ukala ni kikuma kya manyinga mukonda dya dibhata dya Sawulu, kuma wa mutumina bhu kididi kyê. Jihova wa mubhana o utuminu bhu maku a mon’é Abisalone. Kindala o dilamba dyeza kutandu dyé, mukonda eye wala ni kikuma kya manyinga.”
9 Kyenyiki, Abisayi mon’â Zeluya wambela o sobha, wixi: “Mukonda dyahi twa mukwehela o imbwa yiyi ya difwila, kuxinga ngana yami o sobha? Ngehele kuya-ku ni ngi mubatule o mútwe.”
10 O sobha wambe wixi: “Ihi i mwamesena, enu mu an’â Zeluya? Mwehele a ngixinge, kuma Jihova wambe wixi: ‘Lokela Davidi!’ Mu kyenyiki, nanyi utena ku mwibhwidisa: ‘Mukonda dyahi wa mubhanga o kima kiki?’”
11 Davidi wambela Abizayi ni jiselevende jé joso wixi: “Se mon’ami u nga muvwala wamesena ku ngijibha, abha o mukwa Bejamí? Mwehelyenu na ngixinge, kuma Jihova wa mwambela phala kubhanga kiki.
12 Nange Jihova umona o kutata kwami, Jihova a ngibesowale muveji dya ku ngibhekela o ima yayibha ya muzwela Ximeyi mu kizuwa kyalelu.”
13 Kyenyiki, Davidi ni mayala mê asuluka mukwendela mu kikoka. Maji Ximeyi wexile ku mulundu mu ku mukayela ni ku muxinga, ku mutakula matadi ni mavu.
14 Mukusuka-ku, o sobha ni athu exile nê kumoxi, abhixila bhu kididi kyâ. Ene atohokele, anga anyoha.
15 Abisalone ni mayala oso akwa Izalayele abhixila mu Jeluzaleme. Ahitofele wexile we kumoxi ni mwene.
16 Kyoso Husayi mukwa Alaki, dikamba dya Davidi kyabhixila ku pholo ya Abisalone, Husayi wadikola kwa Abisalone, wixi: “Tanaku sobha! Tanaku sobha!”
17 Kyenyiki, Abisalone webhwidisa Husayi, wixi: “Yú wene o ukexilu wa kulondekesa henda kwa kamba dyé? Mukonda dyahi ki wayi kumoxi ni kamba dyé?”
18 Husayi wambela Abisalone, wixi: “Eme kingeji bhanga o kima kiki, ngala bhu mbandu ya yó a musolo kwala Jihova, ku mundu ni ku mayala oso akwa Izalayele. Eme nganda kala ku mbandu yé.
19 Ngi kwambela dingi: Nanyi ngatokala ku musidivila? Kingatokala kusidivila o mona? Kala ki ngasidivila tat’é, kyene we ki nganda kusidivila.”
20 Abisalone wambela Ahitofele, wixi: “Ngibhane ndunge, ihi i ngatokala o kubhanga?”
21 Ahitofele wambela Abisalone, wixi: “Zeka ni ahatu a tat’é, yó a axisa phala kulanga o dibhata.* Kyoso akwa Izalayele kyanda kwiza mukwijiya kwila o tat’é wa kuzembe kya,* enyoso ala ku mbandu yé anda swina dingi.”
22 Kyenyiki, ayudika balaka kutala dya inzo, Abisalone anga uzeka ni ahatu a tat’ê ku pholo ya Izalayele.
23 Mu izuwa yenyoyo, o ndunge yexile mubhana Ahitofele exile mu itala kala* o kizwelu kya Nzambi yakidi. Davidi ni Abisalone, kyene we kyexile mumona o jindunge ja Ahitofele.
Footnotes
^ Mba, “mulawula.”
^ Mba, “mbonge.”
^ Mba, “wadibhange udizumba dyayibha phala tat’ê.”
^ Mba, “muthu wakexile musota.”