Divulu Dya Kayadi Dya Samuwele 17:1-29
17 Ahitofele wambela Abisalone, wixi: “Ngakudyondo, sola kwinyi ni kiyadi kya midi a mayala, ni tuye mukayela Davidi mu usuku yú.
2 Nganda mukwata kyoso mwene kyanda bhwila, anga ukala se nguzu. Nganda mubhangesa kuthandanganya, enyoso ala ku mbandu yê anda lenga. Eme nganda jibha ngo o sobha.
3 Mukusuluka nganda bhangesa o mundu woso kuvutuka kokwe. Maji kiki kyanda bhita ngo kyoso o diyala di wamusota kyanda fwa. O mundu woso wanda vutuka kokwe, o athu oso anda kala ni kutululuka.”
4 Abisalone ni adyakime oso a Izalayele, awabhela o ndunge yiyi.
5 Maji Abisalone wambe: “Twixane we Husayi mon’â Alaki ni twivwe we yoso yanda zwela mwene.”
6 Kyenyiki, Husayi weza kate kwa Abisalone. Abisalone wa mwambela: “Yiyi o ndunge yabhana Ahitofele, o kwila twatokala kukayela o ndunge yiyi? Se uxinganeka kwila kana, tutangele itwatokala o kubhanga.”
7 Mukusuluka Husayi wambela Abisalone, wixi: “Muveji yiyi o ndunge yabhana Ahitofele, ki ndunge yambote.”
8 Husayi wa mwambela dingi: “Eye wejiya kwila, tat’é ni mayala ala-nê mazonda. Ni kwila ene ala ni njinda kala o ulusu ya texika o twana twê mu muxitu. Mwene we disoladi, mukiki, kanda bhita o usuku kumoxi ni mundu.
9 Mu kithangana kiki, mwene nange wadisweka kya mu dikungu mba mu kididi kyoso-kyoso. Se mwene udyanga kwiza mubhânga n’etu, o yó wanda kwiza mu kwijiya o maka ya wanda zwela: ‘O akwatekexi a Abisalone a atolola.’
10 Kate mwene o diyala dyaswina kala hoji, wanda botomoka mukonda dya wôma. Kuma o Izalayele yoso yejiya kwila tat’é dizonda, ni kwila o mayala oso ala-nê, mayala a nguzu mu ita.
11 O ndunge yami yenyiyi: “Ongeka o mayala oso akwa Izalayele tunde ku Dane ndu ku Beleseba. Ene atokala kuvula kala museke wala bhu mbandu a kalunga. Eye watokala kwa atumina mu ita.
12 Etu twandaya mubhânga-nê kabasa kididi kyaditela, twandaya mubhânga-nê ni masoladi kala o mbundu ilawuka ku thandu a mavu. Séku muthu wanda subhuka, kikale mwene mba o masoladi mê.
13 Kabasa mbanza yadiswekela, utwehela kuya ni Izalayele yoso phala kubwika o mbanza. O ilumbu ya mbanza anga tu isunga kate mu honga, kikwanda subhuka ne ngó ditadi dimoxi.
14 Mukusuluka, Abisalone ni mayala oso akwa Izalayele ambe: “O ndunge ya Husayi mukwa Alaki, yabeta-kota o ndunge ya Ahitofele ndenge.” Jihova wabhangesa kwila o ndunge yabhana Ahitofele ka ikayele. Jihova wabhange kiki phala kubheka divuwa kwa Abisalone.
15 Husayi anga wambela o mukunji Zadoke ni mukunji Abiyatale, wixi: “Yiyi o ndunge yabhana Ahitofele kwa Abisalone ni ku adyakime a Izalayele, maji eme nga abhana o ndunge yiyi.
16 Kyenyiki-phe, tumikisa kindala o njimbu yiyi kwa Davidi: ‘Mu usuku yú, ki muzeke mu ididi mwene mu zaukila o athu, bhwa zukama o kikangalakata, maji zaukenu ku sambwa dya ngiji. Se kikyene, o sobha ni mundu woso anda kwajibha.’”
17 Jonatá ni Ahimaze akexile mukingila o selevende ya muhatu ku Ene-Lojele phala ku atangela o njimbu, ene nayi mu itangela kwa sobha Davidi. Kuma kamesenene ku amona kubokona mu mbanza phala kate o myenyu yâ mu kilwezu.
18 Maji sayi munzangala wa amono, yu wayi mutangela Abisalone. Kyenyiki, Jonatá ni Ahimaze, atundu ni lusolo, ya abhixila mu inzo ya diyala mukwa Bahudimi, wakexile ni kixima mu kithádi kya inzo yê. Ene anga adisweka mu kixima.
19 O muhatu wa diyala dyenyidi, wafutu o kixima, anga uta o jimbutu jazuku ku thandu, séku muthu weza mu kwijiya o kima kiki.
20 O jiselevende ja Abisalone ayi kate ku muhatu, ya a mwibhwidisa: “Kwebhi kwala Ahimaze ni Jonatá?” O muhatu watambwijila, wixi: “Ene abhiti bhabha maji aditela ku ngiji.” Kyenyiki, ayi mwa akenga maji ka amono, mukiki-phe, ene avutuka mu Jeluzaleme.
21 Mukusuluka, kyoso o mayala ejile mwakenga kyayi, Ahimaze ni Jonatá atundu mu kixima ya ayi mutangela o njimbu kwa sobha Davidi. Ene a mwambela: “Ndenu, zaukenu o ngiji mukonda Ahitofele wambe o ima yiyi yalungu n’enu.”
22 Ni lusolo lwoso, Davidi ni athu oso akexile-nê azauka o ngiji ya Njolodá. Mu kamene kikwaki, ki kwexile muthu wakambele kuzauka o ngiji ya Njolodá.
23 Kyoso Ahitofele kyamono kwila o ndunge yabhana ka ixikina, mwene wasambela ku jumendu yê, yu wayi ku dibhata dyê, mu mbanza yê. Mukusuluka wabhana o itendelesu ku akwa dibhata dyê yu wadinyenga. Kyenyiki mwene wafu, a mufundu mu mbila ya jikuku jê.
24 Kyenyiki, Davidi wayi ku Manayime, Abisalone wazauka o Njolodá ni mala oso a Izalayele.
25 Abisalone watula Amasa bhu kididi kya Jowabe phala kutumina o kifuxi kya masoladi. Amasa wexile mon’â Ithala, o diyala mukwa Izalayele, wazekele ni Abingayíle, mon’â Nahaxi phang’ya Zeluya, man’â Jowabe.
26 Abisalone ni mayala a Izalayele anga akala mu ixi ya Ngiliyade.
27 Kyenyiki, Davidi wabhixila ku Manayime, Sobi mon’â Nahaxi mukwa Laba ya akwa Amone ni Makidi mon’â, Amiyele mukwa Londebale ni Badizilayi mukwa Ngiliyade ya Lokelimi,
28 eza ni jihama ni jimbasiya, ni jimbya ja mavu, ni tiliku ni Sevada ni fadinya ya tiliku ni fejá ni lendilya* ni jimbundu ja kukuta.
29 Eza we ni wiki ni mandeka ni jimbudi ni jikeju, ima yoso yiyi a ibheka kwa Davidi ni mundu wakexile nawu phala kudya. Kuma ambe exi: “O mundu wala ni nzala, wala ni dinyota, watohoka mu kikangalakata.”
Footnotes
^ Mba, “jimbundu ja difu ni fejá.”
