Divulu Dya Kayadi Dya Samuwele 19:1-43
19 Jowabe amutangela kwila “o sobha wamudila, wala ni dilamba mukonda dya Abisalone.”
2 Mu kizuwa kyenyokyo o kikowe* kyabhiluka malamba phala o mundu woso, mukonda eza mu kwijiya kwila o sobha wa mutala hadi mukonda dya mon’ê.
3 Mu kizuwa kyenyokyo o masoladi avutuka mu mbanza sé kudikola mba kuzwela kima. Edile kala kifuxi kya masoladi kyala ni jisonyi mukonda a lenge o ita.
4 O sobha wavungine o pholo yê, yu wakexile mudikola; “Wawé mon’ami Abisalone! Abisalone mon’ami, mon’ami tata!”
5 Kyenyiki, Jowabe wabokona monzo mwexile o sobha yu wa mwambela, wixi: “Eye wa mukwatesa jisonyi ku masoladi mé oso abhulula o mwenyu wé lelu, o mwenyu wa twana twé ni wa ahat’wé oso.
6 Ngana, eye wazolo yó akuzembe, wazembe yó akuzolo. Kuma lelu eye wejidisa ku atwameni ni ku jiselevende jé kwila, ene kala ni valolo ku mesu mé. Ni kidi kyoso, se Abisalone wabhulukile, anga etu enyoso twafwile, ki weji kala ni dilamba ku muxima.
7 Kindala balumuka, uye muswinisa* o jiselevende jé, mukonda mu dijina dya Jihova, se kukibhange, séku muthu wanda kala n’eye mu usuku yú. O kima kiki kyanda kala kima kyayibha kinene, nuka kya kubhitile tunde mu unzangala wé kate kindala.
8 Kyenyiki, o sobha wabalumuka yu wayi mu xikama bhu mwelu wa mbanza, anga atangela o mundu kwila o sobha waxikama bhu mwelu wa mbanza. Mukusuluka, o mundu woso weza kate kwa sobha.
Maji o mayala akwa Izalayele alengele, kala muthu ku dibhata dyê.
9 O miji yoso ya akwa Izalayele, akexile mudikwata mudya ni kwamba: “O sobha watubhulula ku jinguma jetu akwa Fidíxa maji walenge mu ixi mukonda dya Abisalone.
10 Abisalone, o muthu u twamusolo kala sobha, wafu mu ita. Mukyenyiki, mukonda dyahi kimubhange kima phala o sobha n’a vutuke?”
11 O sobha Davidi watumikisa njimbu ku akunji, Zadoke ni Abiyatale, mu kwamba: “Tangelenu o adyakime a Judá: ‘Mukonda dyahi enu mwanda sukidila kubhangesa o sobha kuvutuka kubhata, se o ima ya muzwela o athu oso mu Izalayele yabhixila kya kwa sobha?
12 Enu mu jiphange jami, twatokala ku mwiji umoxi.* Mukonda dyahi énu mwanda sukina kubhanga kima phala o sobha n’a vutuke?’
13 Mwatokala kutangela Amasa, mu kwamba: ‘Etu kitutokala ku mwiji umoxi?* Nzambi a ngikaxtikale, akibhange kinene se kukituka u kabhitangu ka masoladi bhu kididi kya Jowabe.’”
14 Mukubhanga kiki, o sobha Davidi wabhangesa o mayala oso a Judá ku muxikina.* Ene anga a mwambela, exi: “Vutuka ni jiselevende jé joso.”
15 O sobha wavutuka yu wabhixila ku ngiji ya Njolodá, o mayala a Judá abhixila ku Jidingale, phala kudisanga ni sobha n’a mu xinjikila mu kuzauka o ngiji ya Njolodá.
16 Kyenyiki, Ximeyi mon’â Jela mukwa Bejamí ya Bahudimi, ni mayala akwa Judá, ayi ni lusolo lwoso mudisanga ni sobha Davidi.
17 Wayi we kumoxi ni midi a mayala akwa Bejamí. Nziba o mukalakadi wa dibhata dya Sawulu kumoxi ni kwinyi ni kitanu kya an’ê, ni makwinyi ayadi a jiselevende jê, ayi we ni lusolo lwoso ku ngiji ya Njolodá, mwene wabhixila ande dya sobha kubhixila-ku.
18 Mwene* wazauka o ngiji, bhu kididi bhwene mu zaukila o athu, phala kubheka o athu atokalele kwa sobha ni kubhanga yoso yamesenene o sobha. Maji kyoso sobha kyakexile phala kuzauka o ngiji ya Njolodá, Ximeyi mon’â Jela, wafukamena o sobha.
19 Mwene wambela o sobha: Ngana, kana kungifika kwila ngala ni kikuma, kana kulembalala o kima kyayibha kyabhangele o selevende yé mu kizuwa kyoso ngana yami u sobha ki watundile mu Jeluzaleme.
20 Kuma o selevende yé wakijiya kwila wate kituxi. Mukyenyiki ku dibhata dyoso dya Zuze éme nga dyangela kwiza mudisanga n’eye u ngana yami, u sobha.”
21 Maji mu kithangana kyenyokyo, Abizayi mon’a Zeluya, wambe: “Kuma Ximeyi walokele o muthu a musolo kwa Jihova, o kwila katokala ku mujibha?”
22 Mukyenyiki Davidi wambe: “Ihi inga mibhange enu mu an’â Zeluya? Mukonda dyahi mwa ngilungulukila? O kwila lelu mu Jeluzaleme atokala kujibha-mu muthu? O kwila kingejiya kwila lelu ngavutuka mu kukala dingi sobha ya Izalayele?”
23 Mukusuluka, sobha wambela Ximeyi, wixi: “Eye kiwanda fwa.” O sobha wabhange kikanenu phala kulondekesa kwila mwene weji kumbidila o izwelu yê.
24 Mefibozete mulawula wa Sawulu, wayi we phala kudisanga ni sobha. Mwene kakexile musukula o inama, né kubhuta o mwezu mba kusukula o izwatu yê, tunde o kizuwa kyayi o sobha, kate kyavutuka ni kutululuka.
25 Kyoso Mefibozete kyabhixila mu Jeluzaleme phala kudisanga ni sobha, o sobha wa mwibhwidisa: “Mefibozete, mukonda dyahi eye kuyi n’eme?”
26 Mwene watambwijila: “Ngana yami u sobha, o selevende yami wa ngi nganala. Eme ngi selevende yé, nga mwambela: ‘Nganda tuma kusokejeka o ima ku jumendu yami, phala ngiye kumoxi ni sobha, kuma ngi kinema.’
27 Maji mwene-phe wa ngitatela makutu, ngana yami. Maji ngana yami u sobha, eye wedi kala u anju ya Nzambi yakidi. Mukiki bhanga yoso ya kuwabhela ku mesu mé.
28 Athu oso atokala ku inzo ya tata yami, hinu eji kwajibha kwa ngana yami u sobha. Maji ne kiki o sobha wa ngisolo eme ngi selevende yé phala kudya ku meza mé. Kyenyiki, o kwila ngafwama hanji kubhinga kima kwa sobha?”
29 Maji o sobha wa mwambela, wixi: “Kana kuzwela dingi kima. O kima ki ngasolo kyenyiki: Eye ni Nziba mwanda wanuna o dibhya.”
30 Mukusuluka Mefibozete wambela o sobha, wixi: “Mwene axale ni ima yoso. Mukonda o sobha wavutuka kubhata ni kutululuka.”
31 Badizilayi mukwa Ngiliyade watundu ku Lokelimi, yu weza phala kuxinjikila o sobha kate ku ngiji ya Njolodá.
32 Badizilayi wakukile kya kyavulu, mwene wexile ni makwinyi a nake a mivu. Mwéne wadikila o ibhindamu ya sobha, kyoso o sobha kyakexile ku Manayime, kuma mwene wakexile mvwama.
33 O sobha wambela Badizilayi, wixi: “Zá kumoxi n’eme. Eme nganda kudikila mu Jeluzaleme.”
34 Maji Badizilayi watambwijila o sobha, wixi: “Mivu ikuxi* ya ngikambe hanji phala ngiye kumoxi ni sobha mu Jeluzaleme?
35 Eme ngala kya ni makwinyi anake a mivu. O kwila ngitena hanji kutungula o ima yawabha mu yiyi yayibha? O kwila ngitena hanji kwivwa o kutowala kwa kudya ni kyoso ki nginwa? O kwila ngitena hanji kwivwa o dízwi dya jingimbidi ja mala ni ja ahatu? Kyenyiki, mukonda dyahi eme ngi selevende yé, ngeji kubhana dingi o kikalakalu kyoso kiki, eye u sobha?
36 O selevende yé wasanguluka kya mu ku kuxinjikila kate mu Njolodá. Mukonda dyahi weji ngibhangela o mbote yoso yiyi?
37 Ngakudyondo ngehele kuvutuka. Ngehele ni ngifwile mu mbanza yami, bhwa zukama ni mbila ya tat’etu ni ya mam’etu. O selevende yé Kimamu yu bhabha. Mwene utena kuya kumoxi n’eye u sobha, mubhange yoso ya kuwabhela ku mesu mé.”
38 Mukusuluka, o sobha wambe, wixi: “Kimamu wandaya kumoxi n’eme. Nganda bhanga kala ki wamesena. Nganda bhanga we yoso i wa ngibhingi.”
39 O mundu woso anga amateka kuzauka o ngiji ya Njolodá. Kyoso sobha kyakexile phala kuzauka, wabhana nzobole kwa Badizilayi, yu wa mubesowala. Badizilayi anga uvutuka kubhata dyê.
40 Kyoso sobha kyazauka yu wayi ku Jidingale, Kimamu wayi kumoxi ni mwene. O mayala a Judá ni mayala oso a Izalayele azauka we ni sobha.
41 Kyenyiki, o mayala oso akwa Izalayele ayi kwa sobha ya a mwibhwidisa, exi: “Mukonda dyahi o jiphange jetu, o mala akwa Judá, ayi mutakana o sobha mukaswekele, ya abhangesa kwila o sobha ni dibhata dyê dyoso ni masoladi mê oso, azauka o ngiji ya Njolodá?”
42 O mala oso akwa Judá atambwijila o mala akwa Izalayele, exi: “Twakibhangela mukonda o sobha ndandu yetu. Mukonda dyahi enu mwala ni njinda? O kwila o sobha watubhana kima kya kudya? Inga watubhana ujitu?”
43 Kyenyiki o mayala akwa Izalayele atambwijila o mayala akwa Judá, exi: “Etu twala tu dikwinyi dya miji, kyenyiki Davidi wala dingi sobha yetu enu ndenge. Mukonda dyahi enu mwatubhana dikunda? K’etu tweji dyangela kutakana o sobha yetu?” Maji o mayala akwa Judá ene alungu mu ima yazwela, o akwa Izalayele kana.
Footnotes
^ Mba, “kubhuluka.”
^ Mu Heba.: “kuzwela ku mixima yâ.”
^ Mu Heba.: “mu ifuba yami, mu xitu yami.”
^ Mu Heba.: “enu ki mu ifuba yami, ki mu xitu yami?”
^ Mu Heba.: “kubheteka o mixima.”
^ Mba nange, “ene azauka.”
^ Mu Heba.: “izuwa ikuxi ya mivu.”
