Divulu Dya Kayadi Dya Samuwele 21:1-22
21 Mu izuwa ya Davidi, kwexile nzala mu mivu itatu ya muvimba. Kyenyiki, Davidi wasoto o kibanzelu kya Jihova. Jihova wa mutambwijila, wixi: “Sawulu ni dibhata dyê ala ni kikuma kya manyinga, mukonda wajibha akwa Ngibiyone.”
2 Mukyenyiki, sobha wexana akwa Ngibiyone yu wazwela nawu. (Akwa Ngibiyone katokalele ku kifuxi kya Izalayele, ene a subhukile ku akwa Mamodi. O akwa Izalayele abhangele kikanenu, ya aloko kwila keji kwajibha. Maji mukonda dya kuswina kwê mu kulanga o mundu wa Izalayele ni wa Judá, Sawulu wasoto kwajibha.)
3 Davidi webhwidisa akwa Ngibiyone, wixi: “Ihi ingitena kubhanga ni kyebhi ki ngitena kufuta o kikuma kitwate, ni mu besowale o mundu* wa Jihova?”
4 Akwa Ngibiyone atambwijila, exi: “O maka utwala nawu ni Sawulu ni dibhata dyê, kalungu ni phalata mba ni ulu mba kujibha muthu mu Izalayele.” Kyenyiki, Davidi wa ambela, wixi: “Kabasa kima ki mubhinga nganda mibhana-kyu.”
5 Ene ambela o sobha, exi: “Yalungu ni diyala wamesenene kutujibha, wafunyu ndunge ya ku tubwika mu Izalayele,
6 eye ukwata sambwadi dya an’ê a mala, utubhana nawu. Twanda nyenga o mikutu yâ* ku pholo ya Jihova ku Ngibeya ya Sawulu, o muthu a mu undu kwa Jihova.” O sobha wambe, wixi: “Nganda mibhana nawu.”
7 Maji o sobha wakwatela henda ya Mefibozete mon’â Jonatá, mulawula wa Sawulu, mukonda dya kikanenu kyabhangele Davidi ni Jonatá mon’â Sawulu ku pholo ya Jihova.
8 Kyenyiki, sobha wakwata Alumoni ni Mefibozete o twana tuyadi twa Dízipa mon’â Aya, twavwalele ni Sawulu. Wakwata we o twana tutanu twa Mikala* mon’â Sawulu, twavwalele ni Adiyele mon’â Badizilayi mukwa Abele-Mehola.
9 Ene a abhakula ku akwa Ngibiyone, ene anga a nyenga o mikutu yâ ku mulundu bhu pholo ya Jihova. O sambwadi afwila kumoxi, a ajibha mu izuwa ya dyanga ya kubhongolola o idima, kifwa, ku dimatekenu dya kubhongolola o sevada.
10 Kyenyiki, Dízipa mon’â Aya, wakwata jisaku yu wajizale ku ndanji. Tunde kudimatekenu dya kubhongolola kate o mvula ki yeji sonoka ku imbi, mwene kehela o jinjila kutula ku imbi mu mwanya, né ngo kwehela o yama ya mixitu kuzukama ku imbi mu usuku.
11 Kyenyiki, atangela kwa Davidi o kima kyabhange Dízipa mon’â Aya muhatu wa Sawulu.
12 Davidi wayi mutakana o ifuba ya Sawulu ni ya mon’ê Jonatá yexile ni atwameni* akwa Jabezi ya Ngiliyade. Ene anyanene o mikutu bhu kididi bhwene mu bhongolokela o athu ku Betesane, bhwa nyenge o mikutu ku akwa Fidíxa, mu kizuwa kyajibha Sawulu ku Jilibowa.
13 Mwene weza ni ifuba ya Sawulu ni ya mon’ê Jonatá, weza we ni ifuba ya mayala a ajibhile kwenyoko.
14 Mukusuluka, afundu o ifuba ya Sawulu ni ya mon’ê Jonatá ku Zela mu ixi ya Bejamí mu mbila ya Kiji, tat’ê. Kyoso kyazubha kubhanga o ima ya atumu o sobha, Nzambi wevu o kudyonda kwâ kwalungu ni ixi.
15 Akwa Fidíxa alwu dingi ita ni akwa Izalayele. Kyenyiki, Davidi ni mayala mê ayi mulwa o ita ni akwa Fidíxa, maji Davidi watohokele* kyavulu.
16 Sayi diyaIa watokalele ku mwiji wa Lafayime, amwixanene Ixibi-Benobi, wexile ni sosa ya ngondo yexile munema hama jitatu ya jixikulu,* wexile we ni xibhata ya ubhe. Mwene wexile phala kujibha Davidi.
17 Ni lusolo lwoso, Abizayi mon’â Zeluya wabhulula Davidi, yu wajibha o mukwa Fidíxa. Mu kyenyiki o mayala a Davidi abhange kikutu mu kwamba: “Eye ngana, nuka wanda kwiza dingi n’etu mu ita, phala o kandeya ka Izalayele ki kajime!”
18 Mukusuluka, alwu dingi ita ni akwa Fidíxa, ku Ngobe. Mu ita yiyi, Sibekayi mukwa Huzata wajibha Safi watokala ku mwiji wa akwa Lafayime.
19 Alwu dingi ita ni akwa Fidíxa ku Ngobe, Ele-Hanane mon’â Jayíle-Odejimi mukwa Beleme, wajibha Ngoliya mukwa Ngate, wexile ni sosa yadikota.
20 Kwexile dingi ita, muveji yiyi ku Ngate. Kwenyoko kwexile kidiyala kyadikota, o lukwaku lumoxi lwexile ni milembu isamanu, o lwamukwa we milembu isamanu, o mu inama kyene we kimoxi, kifwa, yenyoso yatenesa makwinyi ayadi ni kiwana kya milembu. Mwene watokalele we ku mwiji wa akwa Lafayime.
21 Mwene wexile muxongwena akwa Izalayele, mukonda dyakiki, Jonatá mon’â Ximeyi, phang’yâ Davidi wa mujibha.
22 O kiwana kiki, atokalele ku mwiji wa Lafayime atungile ku Ngate. Davidi ni mayala mê ene a ajibha.
Footnotes
^ Mu Heba.: “undundu wa Jihova.”
^ Mu Heba.: “twanda kwalondekesa.” Kifwa, ni inama ni maku o bukujule.
^ Mba nange, “Melabe.”
^ Mba nange, “o jingana ja mabhya.”
^ Mba, “wabhwila.”
^ Kifwa 3,42 ya jikilu. Tala o Kiba. B14.
