Divulu Dya Kayadi Dya Samuwele 22:1-51
22 Davidi watumbula o izwelu ya mwimbu yú kwa Jihova, mu kizuwa kyoso Jihova kya mubhulula bhu maku a jinguma jê joso ni bhu maku a Sawulu.
2 Mwene wambe:
“Jihova mwéne o ndanji yami, o mbonge yami, o mubhuludi wami.
3 Nzambi yami mwéne o ditadi dyami, kwene ku ngilengela.Mwéne o ngubu yami, wala ni kutena kwa ku ngibhulula.* Mwéne o dilengelu dyami dya kondama,*O kididi kyami kya kudisweka, o mubhuludi wami. Eye u ngibhulula ku uswéya.
4 Ngidikola kwa Jihova, yó wafwama kutambula o kiximanu.Mwene wanda ngibhulula ku jinguma jami.
5 O mabhuku a kufwa akexile phala ku ngibobesa,A ngizukutisa ku ndumba dya mayala ayibha.
6 O mikolo ya kufwa* ya ngikutile,O kalunga keji ngikwata mu mubhetu.
7 Mu kutata kwami, ngadikola kwa Jihova.Ngadikola kwa Nzambi yami.
Mukyenyiki, tunde mu tembulu yê, mwene wevu o dízwi dyami,Mwene wevu o kudyonda kwami, kyoso ki nga mubhingi kikwatekesu.
8 O ixi yamateka kutunguta anga izamba.O madisesa a dyulu azambe,Anga amateka kutunguta mukonda njinda ya mukwata.
9 Mu mazulu mê mwatundu dixi.Mu dikanu dyê mwatundu túbhya tujikinisa.Mwa mwene mwatundu makala awama.
10 Mwene wabhangesa o dyulu kuzenzama yu watuluka.Bhoxi a inama yê, bhwexile kitombe kyedile bwí.
11 Mwene weza ni kutuka ku thandu dya kelubini,
Wamoneka ku mabhabha a anju.*
12 Mwene wabhangesa o kitombe kukala o balaka yê,Kwakexile matuta a menya a mvula a vundu.
13 O kubhenya kwakexile ku pholo yê, kuwika makala a túbhya.
14 Kyenyiki, Jihova wamateka kunuma ku dyulu.O Sukeku wabhangesa o athu kwivwa o dízwi dyê.
15 Mwene watakula o mifula yê, yu wa amwange.*Ni jinzaji, wa abhangesa kuthandanganya.
16 O koxi a kalunga kwa dimonekena,O madisesa a ixi a dimonekena mukonda dya kibazelu kya Jihova.Mukonda dya muha watundu mu mazulu mê.
17 Tunde bhulu wasununa o lukwaku lwê,Wa ngikwata yu wa ngikatula koxi a menya.
18 Mwene wa ngibhulula ku nguma yami yaswinine kinene,Ni ku athu a ngizembele, abetele kota mu nguzu eme ndenge.
19 Ene eza mubhânga n’eme mu kizuwa kya divuwa dyami,Maji Jihova wa ngikwatekesa.
20 Mwene wa ngambata mu kididi kyakondama.Mwene wa ngibhulula mukonda wa ngizolo.
21 Jihova u ngibesowala mukonda dya kubhanga ima yayuka;Wa ngifutu mukonda o mak’wami kala ni kikuma.*
22 Ngene mubelesela o itumu ya Jihova.Ki ngite o kituxi kya kubhana dikunda kwa Nzambi yami.
23 O jingonge jê joso, ngajibhake ku muxima wami,Kinganda bhukumukina o itumu yê.
24 Nganda suluka kala ngi muthu wakambe kikuma ku pholo yê,Kinganda xikina kuta kituxi.
25 Jihova a ngifute mukonda dya kuyuka kwami,Kuma kingala ni kikuma ku pholo yê.
26 O muthu wala fiyele, eye u mukala fiyele;O muthu wayuka, waswina, eye u mutalatala ni kuyuka.
27 O akwa kubhanga o mbote, eye u abhangela mbote,Maji o muthu wayibha, eye wanda mutobhesa.*
28 O walenduka u mubhulula,Maji o mesu mê ala ku thandu a yó a dizangeleka, phala ku atulula kate bhoxi.
29 Jihova eye ukandeya kami.Jihova mwéne u ngimwikina mwavundu.
30 Ni kikwatekesu kyê ngitena kubhânga ni mazonda.Ni kutena kwa Nzambi ngitena kuhaba ilumbu.
31 O njila ya Nzambi yakidi, yayuka,O kizwelu kya Jihova kyakidi.
Mwene wedi kala ngubu phala yó alengela kwa mwene.
32 Séku Nzambi yengi kikale ngo Jihova.
O kwila sayi-ku ndanji yengi? Ki mwene ngo o Nzambi yetu?
33 O Nzambi yakidi mwéne o mbonge yami,Mwene wanda yukisa o jinjila jami.
34 Mwene ubhangesa o inama yami kukala kala ya mbambiU ngimanesa mu ididi yadileka.
35 Mwene u ngilonga kubhânga mu ita,Ni mak’wami ngitena kufumba o mufula wa ngondo.
36 Eye u ngibhana o ngubu yê ya kubhuluka.O kulenduka kwê ku ngizangeleka.
37 U sanzumuna o njila phala ngendele-mu.O inama yami ki yanda xalumuka, kana.
38 O jinguma jami nganda ku azukutisa ni kwabwika.Kinganda vutuka kate ki nganda ku ajibha.
39 Nganda ku ajibha, nganda kwasasujula, kibhukala muthu ubalumuka.Ene anda bwila mu inama yami.
40 Wanda ngibhana nguzu phala kubhânga mu ita,Wanda bhangesa kwila o jinguma jami abwa ku pholo yami.
41 Eye wanda bhangesa kwila o jinguma jami a ngilenga.Nganda bwika oso a ngizembe.
42 Ene adikola mu kubhinga kikwatekesu, maji séku muthu u abhulula.Adikola kate mwene kwa Jihova, maji mwene ka atambwijila.
43 Nganda kwa tutujula kate kyakituka kala fufuta,Ni kwa dyota-dyota kala malowa mu kikoka.
44 Wanda ngibhulula ku mundu wami wene mu ngitatela.
Wanda ngilanga phala ngikale mutwameni wa ifuxi,O mundu ki ngawijiya wanda ngisidivila.
45 Akwa jixi jengi anda kwiza kokwami ni kuteketa.O ima yanda kwivwa yalungu n’eme, yanda kwabhangesa ku ngitumaka.
46 Akwa jixi jengi kanda swina dingi,*Anda tunda ni kuteketa mu jimbonge jâ.
47 Jihova wene ku mwenyu! O ndanji yami a muximane!
Nzambi yami a mujingise, mwéne o ndanji yami ya kubhuluka.
48 O Nzambi yakidi mwéne uvutula o phonzo ku jinguma jami.Mwene ubhangesa o mundu ku ngibelesela.
49 Mwene u ngibhulula ku jinguma jami.
Eye u ngizangeleka ku thandu dya yó amesena ku ngibhanga kyayibha.Eye u ngibhulula bhu maku a kiswéya.
50 Mukonda dyakiki, nganda kusakidila bhukaxi ka ifuxi, eye u Jihova.Nganda ximana o dijina dyé ni mwimbu.*
51 Eye ubhulula* o sobha wa musolo,Eye ulondekesa henda kwa yó wa musolo,Kwa Davidi ni mbutu yé, kate ku hádya ni hádya.”
Footnotes
^ Mu Heba.: “lungela lwa kubhuluka.” Tala o Dilombolwelu, “Lungela.”
^ Mba, “dilengelu mu kididi kyadileka.”
^ Mba, “Seol.” Tala o Dilombolwelu.
^ Mba, “ya kithembu.”
^ Kifwa wamwange o jinguma.
^ Mu Heba.: “azele.”
^ Mba nange, “u mubhanga ima ya wowa.”
^ Mba, “anda lela kala yangu.”
^ Mba, “nganda kwimba mimbu.”
^ Mba, “ubhana kikowe kya dikota kwa.”
