Divulu Dya Kayadi Dya Samuwele 24:1-25
24 O njinda ya Jihova yeza dingi kuthandu dya Izalayele, kyoso o athu kyaswinisa Davidi mu kwamba: “Ndé, wijiye se o mundu wa Izalayele ni wa Judá watenesa kikuxi.”
2 Kyenyiki, sobha wambela Jowabe o kabhitangu ka masoladi wexile ni mwene, wixi: “Ndé ku miji yoso ya Izalayele, tunde ku Dane kate ku Beleseba u kwate o konda ya mundu phala ni ngijiye se o mundu woso atenesa kikuxi.”
3 Mukyenyiki Jowabe wambela o sobha, wixi: “Jihova Nzambi yé abandekese mu luhama o mundu, eye ungana u sobha, umone ni mesu mé. Maji mukonda dyahi eye ngana u sobha, wamesena kubhanga o kima kiki?”
4 Maji-phe sobha waditunu kwivwa Jowabe ni jikabhitangu ja masoladi. Kyenyiki, Jowabe ni jikabhitangu jamukwa ja masoladi atundu ku pholo ya sobha, ya ayi mukondala o mundu wa Izalayele.
5 Azauka o ngiji ya Njolodá ya emana ku Alowele ku mbandu ya kadilu* ka mbanza yexile bhukaxi ka honga, ya ayi kate ku Ngade ni ku Jazele.
6 Mukusuluka, ayi ku Ngiliyade ni mu ixi ya Tatimi-Hodixi. Atundu kwenyoko, ya ayi ku Dane-Jahana ni ku Sidónya.
7 Ene ayi we ku mbonge ya Tilu ni mu jimbanza joso ja Mahivi ni ku akwa Kanana. Mukusuka-ku, abhixila ku Beleseba o mbanza yexile ku Nengebe ya Judá.
8 Kyenyiki, anyungu o ixi yoso, ya avutuka mu Jeluzaleme mu kubhita divwa dya jimbeji ni makwinyi ayadi a izuwa.
9 Jowabe wabhana kwa sobha o dyalwilu dya athu oso a asoneka. Mu Izalayele mwakexile hama anake a jimidi a masoladi exile ni jixibhata, ku Judá kwexile hama jitanu ja jimidi ja mayala.
10 Maji kyoso kyazubha kukondala o mundu, o kitongolwelu* kya Davidi kyamateka ku mufundisa. Davidi anga wambela Jihova, wixi: “Ngate kituxi kyadikota mu kubhanga o kima kiki. Kindala Jihova ngakudyondo, loloka o kituxi kya selevende yé, kuma ngabhange kima kya wowa.”
11 Kyoso Davidi kyabalumuka mu kamene kaselu, Jihova wambela polofeta Ngade, wixi:
12 “Ndé, wambele Davidi wixi: ‘Jihova wambe kiki : “Ngikubhana ima itatu, sola-bhu kima kimoxi ki ngatokala kubhanga kokwe.”’”
13 Kyenyiki, Ngade wayi kate kwa Davidi yu wa mwibhwidisa, wixi: “Ihi i wamesena? Sambwadi dya mivu ni nzala mu ixi? Kubhita mbeji jitatu ni kulenga o jinguma jé, kyoso ene kyaya ni ku kukaya? Inga izuwa itatu ya dibhebhu mu ixi yenu? Kindala xinganeka kyambote ni u ngitangele yoso i ngatokala kuzwela kwa Yó wa ngitumikisa.”
14 Mukusuluka Davidi wambela Ngade, wixi: “O kima ki wa ngitumu o kusola kyabhonzo kinene, muveji dya kwehela o mayala ku tu kaxtikala, kota se Jihova mwene u tu kaxtikala, kuma o henda Yê yadikota.”
15 Mukyenyiki, Jihova watumikisa dibhebhu mu Izalayele. Tunde mu kamene kate o kithangana kyoxinde, kwafu makwinyi asambwadi a midi a athu, tunde ku Dane kate ku Beleseba.
16 Kyoso o anju ki yaleka o maku phala kubwika Jeluzaleme, Jihova wadyela* o windwa wabheka, yu wambela o anju yexile mubwika o mundu, wixi: “Kwabhu kyá! Tulula o lukwaku.” O anju ya Jihova yexile bhwa zukama ni kibhela kya Alawuna ku Jebuze.
17 Mu kumona o anju kujibha o mundu, Davidi wambela Jihova, wixi: “Éme ngalweza, éme ngate o kituxi kiki kyadikota. Maji ihi yabhange o mundu* yu? Ngakudyondo, o wíndwa yu wize kokwami ni ku dibhata dya tata yami.”
18 Mu kizuwa kyenyokyo, Ngade wayi kate kwa Davidi yu wa mutangela wixi: “Ndé kate ku kibhela kya Alawuna, o mukwa Jebuze, utunge-ku kalatódyu phala Jihova.”
19 Kyenyiki, Davidi wabhange yoso kala kya mutumu Jihova bhukaxi ka Ngade.
20 Kyoso Alawuna kyamono kwila, o sobha ni jiselevende jê exile mukwiza bhwexile mwene, Alawuna watundu ni lusolo, yu wafukamena o sobha ni pholo bhoxi.
21 Alawuna wa mwibhwidisa, wixi: “Mukonda dyahi eye u ngana weza muzwela ni selevende yé?” Davidi wa mutambwijila, wixi: “Ngeza musumba o kibhela kyé, phala ngitunge-bhu kalatódyu ka Jihova, phala o dibhebhu didi dyeza kuthandu dya mundu ni dibhwe.”
22 Kyenyiki, Alawuna wambela Davidi, wixi: “Xala ni kibhela kiki ngana yami u sobha, ni ubhakule yoso i wamesena.* Tambula o jingombe jiji phala kubhana jisata ja kwoha. Tambula we o mabaya exile mu asunga ku jingombe phala kuzuka o jimbutu, o mabaya akutile mu xingu a jingombe, akale phala kubhanga jihwinyi.
23 Ima yoso yiyi ngi* ibhana kwa ngana yami u sobha.” Alawuna wambela dingi o sobha, wixi: “Jihova Nzambi yé a kukwatele henda.”
24 Mukyenyiki, o sobha wambela Alawuna, wixi: “Kana, ku kibhange! Eme nganda kisumba mwene. Kinganda bhakula kwa Jihova Nzambi yami, jisata ja kwoha ji ngakambe o kujisumba, kana.” Kyenyiki, Davidi wasumbu o kibhela kya Alawuna ni jingombe, mu makwinyi atanu a jixikulu* ja phalata.
25 Davidi watungu kwenyoko kalatódyu phala Jihova, yu wabhakula jisata ja kwoha ni jisata ja paze. Kyenyiki, Jihova wevu o kudyonda kwalungu ni ixi. O dibhebhu dyexile kuthandu dya Izalayele dyabhu.
Footnotes
^ Mba, “ku lwiji.”
^ Mu Heba.: “muxima wa.”
^ Mba, “wa akwatela henda mukonda dya.”
^ Mu Heba.: “jimbudi jiji.”
^ Mu Heba.: “yoso yakuwabhela ku mesu mé.”
^ Mu Heba.: “alawuna ubhana.”
^ Xikulu imoxi ya sokele ni 11,4 ya jigrama. Tala o Kiba. B14.
