Divulu Dya Kayadi Dya Samuwele 3:1-39
3 O akwa dibhata dya Sawulu asuluka mulwa ita ni akwa dibhata dya Davidi mu mivu yavulu. O dibhata dya Davidi dyexile mukala dingi ni kutena, maji o kutena kwa dibhata dya Sawulu kwexile mubhwa.
2 O ana a Davidi a avwalela ku Hebolone enyá: O wadyanga dijina dyê Aminone mon’â Ahinowa, mukwa Jezelele.
3 O mona wa kayadi, Kileyabe, mon’â Abingayíle mutudi wa Nabale mukwa Kalumelu. O mona wa katatu, Abisalone mon’â Mahaka, mon’â Talamayi, sobha ya Jesule.
4 O mona wa kawana, Adoniya mon’â Hajiti, o mona wa katanu, Sefatiya mon’â Abitale.
5 O mona wa kasamanu, Iteleyamu mon’â Ekala muhatu wa Davidi. Tutu twene o twana twa Davidi a avwalela ku Hebolone.
6 Kyoso o masoladi a Sawulu ni masoladi a Davidi kyayi ni kulwa o ita, o kutena kwa Abinele kwayi ni kudibandekesa dingi mu inzo ya Sawulu.
7 Sawulu wexile ni muhatu wengi amwixana Dízipa, mon’â Aya. Sayi kizuwa Ixibozete webhwidisa Abinele, wixi: “Mukonda dyahi eye wazeka ni muhatu wa tat’etu?”
8 Abinele njinda ya mukwata mukonda dya ima yazwela Ixibozete, yu wa mwambela: “O kwila eme ngi imbwa* ya Judá? Mu ithangana yoso yiyi ngene mulondekesa henda ku inzo ya Sawulu tat’enu, ni ku jiphange jé ni ku makamba mé. Eme we kingakubhakula bhu maku a Davidi. Né kiki, lelu wa mu ngixana phala ku ngifundisa mukonda dya kuzeka ni muhatu?
9 Nzambi a ngikaxtikale, akibhange kinene, se eme ngikamba kubhanga o kima kyakanena Jihova kwa Davidi.
10 Kifwa, kukatula o utuminu mu inzo ya Sawulu, ni kubhana o ungana kwa Davidi phala kutumina mu Izalayele ni mu Judá tunde ku Dane kate ku Beleseba.”
11 Ixibozete kazwela dingi kima kwa Abinele, mukonda wexile ni wôma wa mwene.
12 Abinele ni lusolo lwoso, watumikisa akunji phala kutangela Davidi, wixi: “O ixi yatokala kwa nanyi?” Yu wabandekesa dingi, wixi: “Bhanga kikutu n’eme. Eme nganda bhanga yoso i ngatena* phala kubheka o Izalayele yoso ku mbandu yé.”
13 Davidi watambwijila, wixi: “Kyambote, nganda bhanga kikutu n’eye. Maji nganda kubhinga ngo kima: Kyoso kiwanda kwiza mudisanga n’eme, wiza ni Mikala mon’â Sawulu.”
14 Kyenyiki, Davidi watumikisa akunji phala kutangela Ixibozete mon’â Sawulu, wixi: “Ngibhane muhatu wami Mikala, nga mulembele mu hama ya inyunga ya akwa Fidíxa.”
15 Kyenyiki, Ixibozete watumu kutambula o muhatu kwa mwadi wê Palatiyele mon’â Layíxi.
16 Maji o mwadi wê wa mukayela kudima ni kudila kate ku Bahudimi. Mu kyenyiki Abinele wa mutangela: “Vutuka kubhata dyé!” Mwene anga uvutuka.
17 Kyenyiki, Abinele watumikisa o njimbu ku adyakime a Izalayele, wixi: “Enu mwa mesenene kya kwila, Davidi ukala sobha yenu.
18 Kindala bhangyenu kyenyiki, mukonda Jihova wambela Davidi, wixi: ‘Bhukaxi ka Davidi selevende yami, nganda bhulula o mundu wami wa Izalayele bhu maku ma akwa Fidíxa ni bhu maku a jinguma jâ joso.’”
19 Abinele wazwela ni akwa Bejamí. Abinele wayi we kate ku Hebolone phala kuzwela ni Davidi ni ku mutangela o kima kyasolo akwa Izalayele ni dibhata dyoso dya akwa Bejamí.
20 Kyoso Abinele ni makwinyi ayadi a mayala exile-nê kumoxi, kyayi kate kwa Davidi ku Hebolone, Davidi wabhange fesa phala Abinele ni mayala exile-nê kumoxi.
21 Abinele wambela Davidi, wixi: “Ngehele ngiye mubhongolola o mundu wa Izalayele phala abhange kikutu n’eye. Eye u ngana, wanda tumina o ixi yoso.” Kyenyiki, Davidi wa musulu, mwene anga uya ni kutululuka.
22 Mu kithangana kyenyokyo, Jowabe ni mayala a Davidi exile mutunda mulwa o ita, exile mubheka imbamba yavulu. Abinele Kexile dingi kumoxi ni Davidi ku Hebolone mukonda Davidi wamusulu, yu wayi ni kutululuka.
23 Kyoso Jowabe kyabhixila ni masoladi, a mwambela exi: “Abinele mon’â Nele weza muzwela ni sobha, maji o sobha wa musulu yu wamweha kuya ni kutululuka.”
24 Kyenyiki, Jowabe wayi kate kwa sobha yu wa mwambela: “Ihi iwabhange? Abinele weza muzwela n’eye, eye ngana wamwehela mwene kuya kiki ni kutululuka?
25 Ngana, wejiya kyambote Abinele mon’â Nele! Mwene weza ngo bhabha phala ku kulonda ni kwijiya kyebhi kyamuya o ima ni yoso i wa mubhanga.”
26 Mukusuluka Jowabe watundu ku pholo ya Davidi, yu watumikisa akunji kudima dya Abinele, maji Davidi kejidile kima. Kyoso o akunji kyatangela Abinele phala kuvutuka, mwene wexile kya mu kixima kya Silá.
27 Kyoso Abinele kyavutuka ku Hebolone, Jowabe wa mwambata ubheka we kate ku dibhitu dya mbanza phala kuzwela-nê. Kyabhixila kwenyoko mwene wa muxuka phoko mu mala, mwene anga ufwa. Jowabe wabhange kiki mukonda Abinele wajibhile phang’yê Azayele.
28 Mukusuluka, kyoso Davidi kyeza mu kwijiya o ima yabhiti, mwene wambe: “Mu dijina dya Jihova, eme ni mundu wami kitwala ni kikuma kya manyinga a Abinele mon’â Nele kate ku hádya ni hádya.
29 O kikuma kikale kuthandu dya Jowabe ni ku dibhata dyoso dya tat’ê. Mu dibhata dya Jowabe kibhukambe muthu ukala ni kibhubhe kya manyinga, mukwa dibhute, kinema mba muthu ufwila ku xibhata mba muthu ubhita nzala.”
30 Kyenyiki, Jowabe ni phang’yê Abizayi ajibha Abinele mukonda mwene wajibhile phang’yâ Azayele mu ita, ku Ngibiyone.
31 Davidi wambela Jowabe ni mayala exile-nê kumoxi, wixi: “Tandujulenu o izwatu yenu, zwatenu izwatu ya jisaku, mudile Abinele.” Sobha Davidi wexile mukayela we kudima dya kimbi.
32 Abinele a mufundu ku Hebolone, o sobha wadidi ni dízwi dyaswina bhu mbandu a mbila ya Abinele. O mundu woso wadidi we.
33 O sobha wembi o mwimbu wathambi phala Abinele, mu kwamba:
“Mukonda dyahi Abinele wafu kala kyowa?
34 O maku mê ka akutile,o inama yê ka ikutile we ni malubhambu.
Eye wafu kala o muthu a mujibha ku isweya.”
Kyenyiki, o mundu woso wadidi dingi kumoxi ni mwene.
35 Ande dya dikumbi kuboba, o athu ambata mbolo kwa Davidi phala ku mukonda o malamba, maji Davidi waloko, wixi: “Nzambi a ngikaxtikale, akibhange kinene, se ngidya mbolo mba kima kyoso-kyoso ande dya dikumbi kuboba.”
36 O athu awabhela o kima kyabhange o sobha. Mukidi o mundu wa wabhela o kima kiki, ni ima yoso yexile mubhanga o sobha.
37 Mu kizuwa kyenyokyo, o mayala a Davidi ni Izalayele yoso eza mu kwijiya kwila, o sobha ki mwene wexile ni kikuma kya kufwa kwa Abinele mon’â Nele.
38 Kyenyiki, sobha wambela o jiselevende jê, wixi: “Ijiyenu-kyu kwila, lelu mu Izalayele mwafu kilamba, diyala dyaswina.
39 Sumbala a ngi undu kala ngi sobha, maji lelu kingala ni kutena. O mayala yá, o twana twa Zeluya ijibhanganga yamakota. Jihova avutule ku kisweya kala kyafwama mu usweya wê.”
