Divulu Dya Kayadi Dya Samuwele 4:1-12
4 Kyoso Ixibozete mon’â Sawulu kyeza mu kwijiya kwila, Abinele wafu ku Hebolone, mwene ukala ni wôma.* O mundu woso wa Izalayele anga ukala we ni wôma wavulu.
2 Kwexile mayala ayadi atokalele kwa mon’a Sawulu, ene exile ku pholo dya kibuka kya mayala exile mutambula o ima ya akwa. Diyala dimoxi amwixanene Bahana, o mukwa dijina dyê Lekabe, Kiyadi kya exile ana a Limone mukwa Behelote watokala ku mwiji wa Bejamí. (Kuma Behelote watokalele we kwa Bejamí.
3 O akwa Behelote alengela ku Ngitayimu, atungu kwenyoko kate mu izuwa yalelu.)
4 Jonatá mon’â Sawulu wexile ni mona wexile kinema kya inama. Mwene wexile ni mivu itanu kyoso kyatambula o njimbu ya kwila Sawulu ni Jonatá afu ku Jezelele. Mu kithangana kyenyokyo, o kiledi kyê wa muzangula ni lusolo, maji mu kulenga mwene ubwa bhoxi anga ukituka kinema. O mona yu dijina dyê Mefibozete.
5 Lekabe ni Bahana o twana twa Limone mukwa Behelote, ayi kate mu inzo ya Ixibozete mu ola yene mutwa kyavulu o mwanya, kyoso Ixibozete kyexile mu nyoha, ku mediya.
6 Ene abokona monzo, edile kala exile muya mutakana tiliku, ya a muxuka ni phoko mu mala. Mukusuluka, Lekabe ni phang’yê Bahana alenge.
7 Kyoso ene kyabokona monzo, Ixibozete wexile muzeka mu xilu dyê, mu hama yê. Ene a muxuka ni phoko, ya a mujibha, mukusuluka a mubatula o mútwe. Kyenyiki, ambata o mútwe anga enda njila usuku woso mu kikoka kya Halabá.
8 Kyabhixila ku Hebolone, ambata o mútwe wa Ixibozete kwa sobha Davidi ya a mwambela, exi: “Yú wene o mútwe wa Ixibozete, mon’â Sawulu o nguma yé wamesenene ku kujibha. Lelu Jihova wavutula o phonzo bhu kididi kyé u sobha, kwa Sawulu ni ku mbutu yê.”
9 Kyenyiki, Davidi wambela Lekabe ni phang’yê Bahana o twana twa Limone mukwa Behelote, wixi: “Kala Jihova kyene ku mwenyu, wa ngibhulula* mu jiphaxi jami joso,
10 kyoso kikwejile diyala yu wa ngitangela kwila ‘Sawulu wafu,’ mu kuxinganeka kwila wexile mu ngitudila njimbu yambote, eme nga mukwata, eme nga mujibha ku Zikilake. Yiyi yene o futu i ngabhana kwa yó wa ngitudila o njimbu!
11 Kwambe dingi o mayala yá ayibha, ajibha muthu kexile ni kikuma monzo yê, mu hama yê! O kwila kingatokala ku mikaxtikala ni ku mijibha kulu dya mundu mukonda dya manyinga a diyala didi?”
12 Kyenyiki, Davidi watumu o mayala mê kwa jibha. Ene a abatula o maku ni inama, ya anyenge o mikutu yâ bhu mbandu a kixima kya menya ku Hebolone. Maji-phe akwata o mútwe wa Ixibozete ya a ufunda mu mbila ya Abinele ku Hebolone.