Divulu Dya Kayadi Dya Samuwele 5:1-25
5 Mu kubhita thembu, o miji yoso ya Izalayele ayi kate kwa Davidi ku Hebolone, ya a mwambela, exi: “Etu enyoso tu jiphange jé .*
2 Mu ukulu, kyoso Sawulu kyexile o sobha yetu, eye ngana wexile muya ku pholo* dya ita ya Izalayele. Jihova wazwelele, wixi: ‘Inga Izalayele o mundu wami, anga ukale u mutwameni wa Izalayele.’”
3 Kyenyiki, o adyakime a Izalayele ayi muzwela ni Davidi ku Hebolone. Sobha Davidi anga uta nawu kikutu ku Hebolone ku pholo ya Jihova. Mukusuluka, ene a undu Davidi kala sobha ya Izalayele yoso.
4 Davidi wexile ni makwinyi atatu a mivu kyoso kyakituka sobha, yu watumina mu makwinyi awana a mivu.
5 Mu Hebolone mwene watumina o Judá yoso mu sambwadi dya mivu ni mbeji jisamanu. Mu Jeluzaleme mwene watumina mu makwinyi atatu ni kitatu kya mivu mu Izalayele yoso ni mu Judá.
6 O sobha ni mayala mê, ayi kate mu Jeluzaleme phala kubhânga ni akwa Jebuze atungile mu mbanza yenyoyo. Ene axongwena Davidi mukwamba: “Eye nuka wanda bokona mu mbanza yiyi! Kate mwene o ifofo ni inema anda kukaya.” Ene akexile mubanza kwila Davidi, nuka weji bokona mu mbanza yiyi.
7 Kyenyiki, Davidi watambula o mbanza ya Ziyone, lelu a ixana mbanza ya Davidi.
8 Mu kizuwa kyenyokyo Davidi, wambe: “O yó andaya mulwa o ita ni akwa Jebuze, atokala kuyila mu mulombo wa menya, phala kujibha o ifofo ni inema yazembele Davidi.” Kiki kyene kyabhangesa kuta o sabhu yamba: “O ifofo ni inema, nuka anda bokona mu kididi kiki.”
9 Kyenyiki, Davidi wayi mutunga mu mbonge a iluku o dijina dya* mbanza ya Davidi. Davidi umateka kutunga o ilumbu ni jisabhalalu, tunde ku mulundu* hé uya ni kutunga kate moxi a mbanza.
10 Kyenyiki, o kutena kwa Davidi kwexile mu dibandekesa, kuma Jihova Nzambi ya ifuxi wakexile-nê.
11 Hilamu sobha ya Tilu watumikisa akunji kwa Davidi. Watumikisa we mabaya a sedulu, asongi a mabaya, atungi ajinzo, phala kutunga o ilumbu, anga atunga we o inzo* ya Davidi.
12 Davidi watongolola kwila Jihova wa mukolesa kala sobha ya Izalayele yu wazangeleka o utuminu wê mukonda dya mundu Wê, Izalayele.
13 Kyoso kyatundu ku Hebolone Davidi weza mukala dingi ni jisayí ni ahatu mu Jeluzaleme. O ahatu avwala dingi ana amala ni ana ahatu.
14 Yá ene o majina an’â Davidi a avwalela mu Jeluzaleme: Xamuwa, Sobabe, Natane, Solomá,
15 Ibale, Elisuwa, Nefege, Jafiya,
16 Elixama, Eliyada ni Elifelete.
17 Kyoso akwa Fidíxa kyeza mu kwijiya kwila Davidi a mu undu kala sobha mu Izalayele, enyoso ayi musota Davidi. Davidi kya kivu, wayi mudisweka mu kididi kya kondama.
18 Kyenyiki, akwa Fidíxa eza, ya adimwange mu honga ya Lafayime.
19 Davidi webhwidisa Jihova: “O kwila ngitena kuya mubhânga ni akwa Fidíxa? O kwila wanda kwabhakula bhu makwami?” Jihova watambwijila Davidi, wixi: “Ndé! Mukonda nganda bhakula akwa Fidíxa bhu maku mé.”
20 Kyenyiki, Davidi wayi kate ku Bahale-Pelazimi yu wa ajibha. Mukiki Davidi wambe: “Jihova watolola o jinguma jami kala o menya kya bula o ilumbu.” Mukonda dyakiki o kididi kyokyo akiluku o dijina dya Bahale-Pelazimi.
21 Akwa Fidíxa axisa kwenyoko o iteka yâ, Davidi ni mayala mê anga ayambata.
22 Ku pholo dya kwenda, akwa Fidíxa avutuka dingi, ya adimwange mu honga ya Lafayime.
23 Davidi webhwidisa Jihova, mwene wa mutambwijila, wixi: “Kyoso kiwandaya mubhânga nawu, kana kuyila kupholo yâ. Ukondoloka kudima dyâ, anga wa akwatela mu isasa.
24 Kyoso kiwanda kwivwa o jibuya jamutunda mu isasa, eye mateka ni ita mukonda Jihova wa kutwamenena ku pholo phala kujibha o kifuxi kya masoladi akwa Fidíxa.”
25 Kyenyiki, Davidi wabhange kala kya mutumina Jihova, yu watolola akwa Fidíxa tunde ku Jeba kate ku Ngezele.
Footnotes
^ Mu Heba.: “tu xitu yê, tu kifuba kyê.”
^ Mu Heba.: “eye wakexile mu twamenena Izalayele mu kutunda ni mu kubokona.”
^ Mba nange, “mwene wa iluku.”
^ Mba, “Milo.” O kizwelu kiki mu Hebalayiku kilombolola, “kwizalesa.”
^ Mba, “mbonge.”
