Divulu Dya Kayadi Dya Samuwele 6:1-23
6 Davidi wongeka dingi o masoladi abetele kota kukala ni uhete mu Izalayele, mwene wongeka midi jitatu ja mayala.
2 Kyenyiki, Davidi ni mayala oso exile-nê kumoxi ayi ku Bahale ya Judá, mutakana o Alaka ya Nzambi ya kidi, bhwene mukola o dijina dya Jihova ya ifuxi, waxikama ku kyandu kyê, kyala ku thandu a* jikelubini.
3 Maji ene ate o Álaka ya Nzambi yakidi mu dikalu dya ubhe phala ku ikatula mu inzo ya Abinadabe yala ku kamulundu. Uzá ni Ahiyo an’â Abinadabe ene exile mu kwendesa o dikalu.
4 Kyenyiki, akatula o Álaka ya Nzambi yakidi mu inzo ya Abinadabe, yexile ku kamulundu. Ahiyo wexile mukwenda ku pholo dya Álaka.
5 Davidi ni akwa Izalayele yoso asangulukile ku pholo ya Jihova, anga aya ni kuxika o iselekete yoso yobhange ni mabaya ni jimbánza ni tungoji ni jingoma ni misaxi.
6 Maji kyoso kyabhixila mu kididi kya kubhyatela, ku Nakome, Uzá wasununa o lukwaku lwê phala kukwata o Álaka ya Nzambi yakidi, mukonda o jingombe jejibhangesa o Álaka kubwa bhoxi.
7 Kyenyiki, o njinda ya Jihova yeza kuthandu dya Uzá, o Nzambi yakidi anga u mujibha kwenyoko mukonda dya kukamba kuxila o kitumu kya Nzambi. Mwene anga ufwa bhenyobho bhu mbandu ya Álaka ya Nzambi yakidi.
8 Maji Davidi ukala ni njinda* mukonda o njinda ya Jihova yeza kuthandu dya Uzá. Kyenyiki, kate mu kizuwa kyalelu, o kididi kyenyokyo akixana Peleza-Uzá.*
9 Mu kizuwa kyenyokyo, Davidi ukala ni wôma wa Jihova, anga wamba, wixi: “Kyebhi kinganda kwambata o Álaka ya Jihova mu mbanza yami?”
10 Davidi kamesenene dingi kwambata o Álaka ya Jihova mwatungile mwene, mu mbanza ya Davidi. Muveji dyakiki, Davidi watumu kwambata o Álaka mu inzo ya Obede-Edomo, mukwa Ngate.
11 O Álaka ya Jihova anga ixala mu inzo ya Obede-Edomo, mukwa Ngate mu mbeji jitatu. Jihova wexile mubesowala Obede-Edomo ni athu oso atokala ku dibhata dyê.
12 Davidi a mutangela, exi: “Jihova wabesowala o athu mu inzo ya Obede-Edomo ni yoso yala nayu, mukonda dya Álaka ya Nzambi ya kidi.” Kyenyiki, Davidi ni kusanguluka kwoso wayi mu inzo ya Obede-Edomo mutakana o Álaka ya Nzambi ya kidi, phala ku yambata mu mbanza ya Davidi.
13 Kyoso o yó akexile mu kwambata o Álaka ya Jihova kyateku ngo makanda asamanu, Davidi wasatela ngombe imoxi ni kangombe kanete.
14 Davidi wexile mukina ku pholo ya Jihova ni nguzu yoso. Mwene wazwatele efode ya linyu.
15 Davidi ni mundu woso wa Izalayele exile mu kwambata o Álaka ya Jihova ni kudikola kwa kusanguluka ni kuxika jikoloneta.
16 Maji kyoso o Álaka ya Jihova ki yabhixila mu mbanza ya Davidi, Mikala mon’â Sawulu wazongola mu njanena anga umona sobha Davidi kutuka-tuka ni kukina ku pholo ya Álaka ya Jihova. Mikala anga umateka ku musebhulula ku muxima wê.
17 Kyenyiki, ambata o Álaka ya Jihova mu balaka yabhangele Davidi, anga a itula mu kididi kyê. Mukusuluka Davidi wabhakula jisata ja kwoha ni jisata ja paze ku pholo ya Jihova.
18 Kyoso Davidi kyazubha kubhakula o jisata ja kwoha ni jisata ja paze, mwene wabesowala o mundu mu dijina dya Jihova dya ifuxi.
19 O mundu woso ni athu oso mu Izalayele kikale mayala ni ahatu, wa wanena we mbolo yobhange mu ukexilu wa nela, jibolo jobhange ni jitamala, ni jibolo jobhange ni jiuva. Mukusuluka o mundu woso anga umwangana, kala muthu uya ku dibhata dyê.
20 Kyoso Davidi kyavutuka phala kubesowala akwa dibhata dyê, Mikala mo’nâ Sawulu wayi mudisanga-nê. Mwene wa mwambela: “Lelu o sobha ya Izalayele wadijingisa mu kuzula ku pholo ya abhika a jiselevende jê kala kibhanga o muthu wakambe sonyi.
21 Kyenyiki, Davidi wambela Mikala, wixi: “Eme ngexile mu kwimba ni kukina ku pholo ya Jihova, wa ngisolo eme muveji dya kusola tat’enu ni yó atokala ku dibhata dya tat’enu, wa ngitumbika kala ngi sobha ya mundu wa Jihova, Izalayele. Mukonda dyakiki, nganda sanguluka jinga ku pholo ya Jihova,
22 nganda ditulula mwene ni kuditolesa dingi bhu mesu mami. Maji o abhika yá u wazwela, ene anda ngizangeleka.”
23 Kyenyiki, Mikala mon’â Sawulu kavwala mona, kate mu ufwilu wê.
