Divulu Dya Kayadi Dya Samuwele 7:1-29
7 Kyoso sobha kyatungile kya mu inzo* yê, Jihova wa mubhana kutululuka ku jinguma jê joso ja mu kondolokele.
2 O sobha wambela polofeta Natane, wixi: “Tala, eme ngatungu mu inzo yafwama yobhange ni mixi ya sedulu, maji o Álaka ya Nzambi yakidi yala mu balaka.”
3 Kyenyiki, Natane watambwijila o sobha, wixi: “Bhanga yoso ya kukala ku muxima mukonda Jihova wala n’eye.”
4 Mu usuku wenyo, Jihova wambela Natane, wixi:
5 “Ndé, wambela o selevende yami Davidi, wixi: ‘Kiki kyene kyambe Jihova: “Mukonda dyahi weji ngitungila inzo ni ngikala-mu?
6 Eme nuka ngatungile mu inzo, tunde o kizuwa ki ngakatula o mundu wami wa Izalayele mu Ijitu, kate mu kizuwa kyalelu. Maji ngene mutunda* kididi anga ngiya kididi kyengi mu jitenda ni mu jibalaka.
7 Mu mivu yoso i ngexile ni akwa Izalayele* o kwila sayi kizuwa ngebhwidisa ku atwameni a miji ya Izalayele u nga asolo phala kudikila o mundu wami wa Izalayele, ‘se mukonda dyahi kangitungila inzo ni mixi ya sedulu?’”’
8 Kyenyiki tangela kiki kwa selevende yami Davidi: ‘Jihova dya ifuxi wambe kiki: “Eme ngakukatula mu kwinga ni kulanga o kibhanga kya jimbudi phala kukala u mutwameni wa mundu wami wa Izalayele.
9 Eme nganda kala n’eye bhwoso bhu uditela, nganda bwika o jinguma jé joso, nganda fumanesa o dijina dyé, kala o athu ala ni fuma mu ngongo.
10 Eme nganda sola kididi phala o mundu wami wa Izalayele, ene anga atunga mwenyomo. Ene anga atunga mu kididi kyenyiki, kibhwanda kala dingi muthu u azukutisa. O athu ayibha kanda kwatalesa dingi hadi, kala kyakexile mubhanga mu ukulu,
11 tunde mu kizuwa ki ngasolo o afundixi phala kulanga o mundu wami wa Izalayele. O jinguma jenu kanda mizukutisa dingi.
“‘“Jihova wakwambela we kiki: Jihova wanda tunga dibhata* phala eye.
12 Kyoso ki wanda fwa kala kyafu o jikuku jé, nganda bhangesa kwila ku mbutu yé, o mon’ê mwene* u kubhingana ku usobha, nganda kolesa o utuminu wê.
13 Mwéne wanda tunga o inzo yanda fumanesa o dijina dyami. Eme nganda bhangesa kwila o utuminu wê unangenena kate ku hádya ni hádya.
14 Eme nganda kituka ngi tat’ê, mwene anga ukituka mon’ami. Kyoso kyanda bhanga kima kyayibha, nganda mubeta ni mbangala yene mu beta nayu o athu, anga ngi mubhana jixikote ja ana athu.*
15 Eme nganda mulondekesa jinga o henda, ki nganda mubhana dikunda kala ki ngabhange ni Sawulu. Yó nga mukatula ku ungana, eme nga kubhinganesa bhu kididi kyê.
16 Yalungu n’eye, o inzo yé ni utuminu wé wanda nangenena kate ku hádya ni hádya. O ungana wé wene wanda kalelaku.”’”
17 Natane watangela o izwelu yoso ni kisuma kyoso kiki kwa Davidi.
18 Kyenyiki, sobha Davidi wabokona anga uxikama ku pholo ya Jihova, yu wasambe: “Eme nanyi eye u Ngana Sukeku, Jihova? O mwiji wami nanyi, phala ku ngibhixidisa kate bhabha?
19 Eye u Ngana Jihova Sukeku, mu ima yoso yiyi wate-ku dingi, mukwamba kwila o inzo ya selevende yé yene yanda xalela-ku kate ku hádya ni hádya. Ngana Jihova Sukeku, kiki kikale kitumu* phala o athu oso mu ngongo.
20 Ihi i ngatokala kuzwela dingi eme ngi selevende yé? Kuma eye wa ngijiya kyambote, u Ngana Jihova Sukeku.
21 Mukonda dya kizwelu kyé ni muxima wé,* eye wabhange o ima yoso yiyi yamakota, eye wa itangela kwa selevende yé.
22 Mukonda dyakiki eye ngo u muthu wonene, u Ngana Jihova Sukeku. Kana-ku muthu wasoko n’eye. Kana-ku Nzambi yengi, kikale ngo eye. Kuma yoso itwevu ilondekesa o kidi kiki.
23 Kifuxi kyebhi mu ixi kyasokela ni mundu wé, Izalayele? Nzambi wa abhulula ku Ijitu kala mundu wé. Mukonda dya ene, wafumanesa o dijina dyé mu kubhanga ima yamakota ikwatesa wôma.
24 Eye wasolo o kifuxi kya Izalayele, phala kukala mundu wé kate ku hádya ni hádya. Eye u Jihova wadibhange u Nzambi yâ.
25 “Kindala, u Jihova Nzambi, kumbidila o kikanenu ki wabhange ku selevende yé ni ku dibhata dyê kate ku hádya ni hádya, anga ubhanga jinga kala ki wakanena.
26 O dijina dyé adiximane kate ku hádya ni hádya, phala o athu azwele: ‘Jihova dya ifuxi mwéne o Nzambi ya Izalayele.’ O inzo ya selevende yé Davidi a itumbike kate ku hádya ni hádya.
27 Kuma eye Jihova dya ifuxi u Nzambi ya Izalayele watungununa o kikutu kyé ku selevende yé, mu kwamba: ‘Nganda kutungila dibhata.’* Kiki kyene kyabhangesa o selevende yé kukala ni nguzu ya kubhanga o musambu yú phala eye.
28 Ngana Jihova Sukeku, eye u Nzambi yakidi, o izwelu yé yakidi. Eye wakanena o ima yiyi yambote ku selevende yé.
29 Kyenyiki, se kyala mu vondadi yé, besowala o inzo ya selevende yé ni kwila inangenene kate ku hádya ni hádya, kuma eye u Ngana Jihova Sukeku wa kikanena. Ni kwila o dibhata dya selevende yé a dibesowale kate ku hádya ni hádya ni dibesá dyé.”
Footnotes
^ Mba, “mu mbonge yê.”
^ Mu Heba.: “mu kwenda.”
^ Mu Heba.: “an’â Izalayele.”
^ Mba, “mwiji.”
^ Mu Heba.: “muthu wanda tunda moxi dyê mwene.”
^ Mba nange, “an’â Adá.”
^ Mba, “milongi.”
^ Mba, “mu vondadi yé.”
^ Mba, “mwiji.”
