Divulu Dya Kayadi Dya Samuwele 8:1-18
8 Mu kubhita thembu, Davidi wabhânge ni akwa Fidíxa yu wa atolola. Davidi watambula Metenge-Amá bhu maku a akwa Fidíxa.
2 Mwene watolola akwa Mowabe yu wa azonga ni mukolo. Wa azekesa bhoxi anga u azonga mikolo iyadi ya kujibha, mukolo umoxi wa kwaxisa ni mwenyu. Akwa Mowabe anga akala mubhikila Davidi, enda ni ku mufuta lubhaku.
3 Davidi watolola Hadadezele mon’â Lehobo sobha ya Zoba, kyoso mwene kyakexile dingi ni ungana wa kutumina o athu atungile mu mbambe ya ngiji ya Ewufalate.
4 Davidi wakwata midi ni hama sambwadi a mayala endela mu jikabalu, ni makwinyi ayadi a midi a mala endela bhoxi, atokalele kwa Hadadezele. Kyenyiki, Davidi wabatula o mixibha ya jikabalu jisunga o makalu a ita, hé uxisa-ku ngo hama ya jikabalu.
5 Kyoso akwa Sídya atokala ku Damasku kyeza mu kwatekesa Hadadezele, sobha ya Zoba, Davidi wajibha-ku makwinyi ayadi ni kiyadi a midi a masoladi akwa Sídya.
6 Kyenyiki, Davidi watula masoladi ku Sídya ya Damasku, o akwa Sídya akituka jiselevende ja Davidi anga aya ni ku mufuta malubhaku. Jihova wexile mubhulula Davidi kabasa kididi kyakexile muditela.
7 Davidi wakwata we o jingubu jatokalele ku jiselevende ja Hadadezele, yu weza naju mu Jeluzaleme.
8 Ku Beta ni ku Belotayi, o jimbanza ja Hadadezele, sobha Davidi watambula-ku we nzungule ya ngondo.
9 Toyi, sobha ya Mahamati, weza mu kwijiya kwila Davidi watolola o kifuxi kyoso kya masoladi kya Hadadezele.
10 Kyenyiki, Toyi watumikisa mon’ê Jolamu kwa sobha Davidi phala ku mu menekena ni ku mutanesa mu kutolola Hadadezele, kuma ithangana yoso Hadadezele wakexile mulwa ita ni Toyi. Jowamu wambata ima ya phalata, ya ulu ni ya ngondo kwa Davidi.
11 O ima yoso yiyi sobha Davidi wa isatela kwa Jihova kumoxi ni phalata ni ulu yasatele, yatambwile ku ifuxi yoso yatolola mwene,
12 kala akwa Sídya, akwa Mowabe, akwa Amone, akwa Fidíxa ni akwa Amaleke ni ima yoso yatambwile kwa Hadadezele mon’â Lehobo, sobha ya Zoba.
13 Davidi wafumana dingi, kyoso kyajibha kwinyi ni dinake dya midi a masoladi akwa Idomo mu Honga ya Mongwa.
14 Mwene watula masoladi ku Idomo yoso. O akwa Idomo akituka jiselevende ja Davidi. Jihova wakexile mubhulula Davidi, kabasa kididi kyaditela.
15 Davidi utumina mu Izalayele yoso. Mwene wakexile mutumina ni kuyuka phala o mbote ya mundu wê woso.
16 Jowabe mon’â Zeluya wexile o mutwameni wa kifuxi kya masoladi. Jozafate mon’â Ahilude wexile o musoneki wa sobha.
17 Zadoko mon’â Ahitube ni Ahimeleke mon’â Abiyatale éne exile o akunji, Selayiya wexile o musoneki.
18 Benaya mon’â Jehoyada mwéne wexile mutumina akwa Makeleti ni akwa Mapelete. O an’â Davidi éne exile dingi ni kutena.*
Footnotes
^ Mu Heba.: “akituka akunji.”
