Divulu Dya Kayadi Dya Samuwele 9:1-13
9 Kyenyiki, Davidi webhwidisa, wixi: “O kwila kwasubhuka hanji muthu ku dibhata dya Sawulu, phala ngi mu idikise henda mukonda dya Jonatá?”
2 Kwexile selevende mu dibhata dya Sawulu, dijina dye Nziba. Mwene amwixana kwa Davidi. Kyoso kyabhixila kwenyoko, sobha wa mwibhwidisa: “Eye u Nziba?” Mwene watambwijila: “Xe! eme mwene ngana, ngi selevende yé.”
3 O sobha wa mwibhwidisa wixi: “Kwa subhuka hanji muthu ku dibhata dya Sawulu, phala ngi mu idikise henda ya Nzambi?” Nziba watambwijila o sobha, wixi: “Kwa subhuka hanji mona umoxi wa diyala wa Jonatá, mwene kinema kya inama iyadi.”
4 O sobha wa mwibhwidisa wixi: “Mwene wala kwebhi?” Nziba watambwijila: “Mwene wala mu dibhata dya Makidi mon’â Amiyele ku Londebale.”
5 Mu kithangana kyenyokyo, sobha Davidi watumu ku mutakana mu dibhata dya Makidi mon’â Amiyele ku Londebale.
6 Kyoso Mefibozete mon’â Jonatá, mon’â Sawulu, kyabhixila kwa Davidi wafukama ni pholo bhoxi. Davidi anga u mwambela wixi: “Mefibozete!” Mwene watambwijila wixi: “Emyu ngana yami.”
7 Davidi wa mwambela wixi: “Kukale ni wôma! Kuma nganda kukwatela henda mukonda dya tat’é Jonatá. Nganda kuvutwila o ibhela yoso ya kukwé Sawulu, eye wanda kala jinga mudya* ku meza yami.”
8 Kyenyiki, mwene wafukama yu wambe: “Ngana, o selevende yé nanyi mwene phala ku ngisuwa, eme ngedi kala ngi imbwa yadifwila?”
9 Bhenyobho, sobha watumu kwixana Nziba o mukwatekexi wa Sawulu yu wa mwambela: “Ima yoso yatokalele kwa Sawulu ni dibhata dyê, ngi dibhana ku mulawula a ngana yé.
10 Eye ni twana twé ni jiselevende jé mwanda dima o mabhya, ni kubhongolola o idima, phala kubhana o kudya ku mulawula wa ngana yé. Maji-phe, Mefibozete mulawula a ngana yé, wanda dya jinga ku meza yami.”
Nziba wexile ni kwinyi ni kitanu kya twana ni makwinyi ayadi a jiselevende.
11 Kyenyiki Nziba wambela o sobha, wixi: “O selevende yé wanda bhanga yoso i watumu eye u ngana yami u sobha.” Kyenyiki, Mefibozete wasuluka ni kudya jinga bhu meza a Davidi,* kala mona a sobha we.
12 Mefibozete wexile we ni mona wofele amwixana Mika. Enyoso atungile mu dibhata dya Nziba, akituka jiselevende ja Mefibozete.
13 Maji Mefibozete watungile mu Jeluzaleme, yu wexile mudya jinga ku meza a sobha. Mwene wexile kinema kya inama iyadi.
