O Mukanda wa Kayadi ku Akwa Tesalonika 3:1-18
3 Mu kyenyiki jiphange jami, sulukenu mu ku tutumbula mu misambu yenu, phala o maka ma Jihova m’asuluke ni ku dimwanga ni lusolo lwoso, ni kufumana mwaxaxi ka mundu, kala kimwene mubhanga kyá.
2 Sambenu we phala Nzambi a tubhulule ku isweya ni ku akwa phulu, mukonda ki athu oso ala ni kixikanu.
3 Maji Ngana muthu wa fiyele, mwene wanda miswinisa ni ku milanga kwa Kadya-phemba.*
4 Twa midyelela mwa Ngana kwila, mwa mubhanga o ima i twa mitendelesa ni kwila, mwanda suluka mu ku ibhanga jinga.
5 Ngana asuluke mu kwendesa o mixima yenu, phala muzole Nzambi ni mu kolokote mwa Kidistu.
6 Enu akwetu jiphange jetu, twa mu mitendelesa mudijina dya Ngana yetu Jezú Kidistu kwila, kimwende ni jiphange abhukumuka, yó ka mukayela o itendelesu i mwa tambula* kokwetu.
7 Enu mwejiya kyebhi ki mwatokala kukayela o phangu yetu, mukonda kitwexile ni wendelu wayibha mwaxaxi kenu.
8 Kitwadi we kudya kwa muthu mu kingoho.* Maji, twakalakala ni nguzu ni kuswina kwoso usuku ni mwanya, mu kudikila o ibhindamu yetu phala ki tu mitalese hadi.
9 Ki kwila ki twa fwama kutambula kima kokwenu, maji twa mesenene ku mixila phangu yambote phala ku ikayela.
10 Mu kidi, kyoso kitwakexile mwaxaxi kenu, twakexile mu mibhana o kitendelesu kiki: “Se muthu kamesena kukalakala, katokala we kudya.”
11 Mukonda twevu kwila, sayi athu mudyenu, kala ni wendelu wambote mwaxaxi kenu, kawabhela kukalakala, maji awabhela kudita mu maka a ngene ka atokala.
12 Mudijina dya Ngana Jezú Kidistu, twa mu tendelesa o athu yá kwila, akalakale ni kubatama kwoso, nadye o kudya kwijila mu kikalakalu kyâ.
13 Maji enu-phe jiphange, kanenu kubhwila mu kubhanga o mbote.
14 Se bhu kala muthu udituna kubelesela o njimbu yala mu mukanda yu, dilangyenu ni muthu yu, kanenu kudilunga nê, phala jisonyi ji mu kwate.
15 Kanenu ku mumona kala nguma yenu, maji sulukenu mu ku mudimuna kala phangyenu.
16 O Ngana ya paze, a mibhane o kutululuka mu maukexilu oso. O Ngana akale ni enu.
17 Yu o umenekenu wami, eme ngi Phawulu, u ngasoneka ni lukwaku lwami, kiki kyene o kijimbwete mu mikanda yami yoso, kyene kingene musoneka.
18 O ngalasa ya Ngana yetu Jezú Kidistu, ikale ni enu.
