O Mukanda wa Kayadi kwa Timote 1:1-18
1 Eme Phawulu ngi poxolo ya Kidistu Jezú mu vondadi ya Nzambi, bhukaxi ka kikanenu kya mwenyu kijila mwa Kidistu Jezú.
2 Nga mu sonekena Timote monami wakazola:
O ngalasa ya Nzambi ikale n’eye, ni henda ni paze itunda kwa Nzambi o Tata, ni kwa Kidistu Jezú, Ngana yetu.
3 Ngisakidila Nzambi, yó ngene mu musidivila ni kitongolwelu kyazele, kala kyabhangele o jikuku jami, kingene mufula ku kutumbula mu misambu yami suku ni mwanya.
4 Kyoso ki ngilembalala o masoxi mé, ngikala ni hânji ya kukumona phala ubandekese o kusanguluka kwami.
5 Ngilembalala o kixikanu kyé kyakidi, kala o kixikanu kyakexile nakyu kukwé Loide ni mamenu Unise, eme ngejiya ni kidi kyoso kwila, eye we wala ni kixikanu kyenyiki.
6 Mukonda dya kyenyiki, nga mu kulembalesa kwila o uhete u watambula kwa Nzambi kyoso ki ngakutula o maku kuthandu dyé, bandekesawu kala túbhya.
7 Mukonda o nzumbi ikôla itubhana Nzambi, ki itubhangesa kukala ni wôma maji itubhana kutena ni henda ni kilunji kyambote.
8 Mu kyenyiki, kana kukala ni jisonyi ja kubhana o umbangi walungu ni Ngana yetu, né kukala ni jisonyi jami, a ngikutu* mukonda dya mwene. Maji mu kudyelela mukutena kwa Nzambi, kolokota mukutala hadi mukonda dya njimbu yambote.
9 Mwene wa tubhulula yu watwixana phala kukala tu athu’ê osole,* katwixana mukonda dya ibhangelu yetu, maji mukonda dya vondadi yê ni ngalasa yê, mwene wa tulondekesa o ngalasa yiyi mwa Kidistu Jezú tunde xahulu.
10 Maji kindala o ngalasa yiyi ya dimonekena dingi bhukaxi ka kutukuluka kwa Mubhuludi wetu Kidistu Jezú, mwene wabhwisa o kufwa, anga bhukaxi ka njimbu yambote mwene walondekesa kyebhi kitutena kukala ni mwenyu, ni kukala ni mukutu ukamba o kubola.
11 Eme angisolo kala ngi muboki, ngi poxolo ni mulongexi wa njimbu yiyi yambote.
12 Mukonda dya kiki, kyene ki nga mutalela o hadi yiyi, maji kingala ni jisonyi mukonda o Yó nga muxikana nga mwijiya kyambote, ngadyelela kwila mwene utena kubhaka o kima ki nga mubhana phala kukilanga katé mu kizuwa kya kezaku.*
13 Dikwatenene mu maka mambote* uwevu kokwami, ni mu kixikanu ni mu henda ijila mu ukamba ni Kidistu Jezú.
14 Ni kikwatekesu kya nzumbi ikôla, bhaka kyambote o ima ya valolo ya kubhana phala ku ilanga.
15 Eye wejiya kwila enyoso mu kibatu kya Azya a ngibhana dikunda, katé mwene ni Fijelu ni Helemojene.
16 Ngana akwatele henda ku mwiji wa Onezifolo, mukonda mwene wa ngiswinisa muveji javulu, mwene kakexile ni jisonyi jami mukonda dya kungita mu kaleya.
17 Maji kyoso mwene kyejile ku Loma, wangisoto ni mwanyu woso katé kya ngisange.
18 O Ngana Jihova a mulondekese henda mu kizuwa kya kezaku.* Eye wejiya kyambote o ikalakalu yoso yabhange mwene ku Efezu.
Footnotes
^ Mba, “ngi pelezu.”
^ Mu Ngel.: “athu akôla.”
^ Mba, “kya kufundisa.”
^ Mba, “madisanze.”
^ Mba, “kya kufundisa.”
