O Mukanda wa Kayadi kwa Timote 3:1-17
3 Ijiya kwila, mu izuwa isukidilaku kwanda kwiza ithangana yanda bhonza kudibhana nayu.
2 Mukonda o athu anda dizola ngó ene mudyâ, anda zola o kitadi, anda kala athu akake, akwa ukumbu, axinga Nzambi, axibhaka tata ni mama, kanda kala ni kisakidilu, akamba ufiyele.
3 Kanda kala ni henda ya muthu, kanda kumbidila o ima yabakana,* anda kala akwa kutatela akwâ, kanda ditumina jihânji, anda kala ijibhangânga, azemba o ima yambote.
4 Anda kala akwa kulungulukila akwâ, akwa kujiza, anda zola dingi o jihânji jâ muveji dya kuzola Nzambi.
5 Kukanga alondekesa kwila axila Nzambi maji anda dituna o kutena kuku ku myenyu yâ, athu akala kiki, asondoloke.
6 Bhukaxi ka ene kwala o mayala ene mubokona mu miji bhofele-bhofele, phala kufunyisa o ahatu azoza mu kixikanu, ezala ni ituxi ni jihânji javulu jayibha.
7 O ahatu enyá amateka ukulu ni kudilonga maji alembwa kwijiya o kidi.
8 Kala Jane ni Jambele kya bhukumukine Mozé, athu ya a mu bhukumukina we o kidi. O mayala ya ala ni ilunji yabolo, Nzambi ka axikina mukonda ene aditunu o kixikanu.
9 Enyá kandaya dikanga, mukonda o kutobha kwâ kwanda dimonekena bhu pholo ya athu oso, kala kyabhitile ni mayala ayadi yo.
10 Maji eye wakayela kyambote o ilongesu yami, o wendelu wami, o vondadi yami, o kixikanu kyami, o mwanyu wami, o henda yami, o kukolokota kwami,
11 o izukutisu yami, o jiphaxi jami jinga dibhana naju ku Andiyokiya, ku Ikônyu ni ku Listra. Eme ngakolokota mu izukutisu yoso yiyi, Ngana anga wa ngibhulula mu ima yoso.
12 Mukidi, oso adibhakula mu kusidivila Nzambi mu ukamba ni Kidistu Jezú, anda kwa zukutisa we.
13 Maji o athu ayibha ni akwa makutu andaya ni kudibandekesa, ene anda nganala akwâ maji anda kwa nganala we.
14 Eye-phe kolokota mu ima i wadilongo, ya kwijidisa nayu kwila ya kidi. Kuma wejiya se nanyi wakulongo o ima yiyi.
15 Tundé mu undenge wé, eye wejiya o Mikanda Ikôla itena ku kubhangesa kukala ni unjimu phala ubhuluke bhukaxi ka kixikanu mwa Kidistu Jezú.
16 O Mikanda yoso Ikôla yatundu* kwa Nzambi, yene yafwama phala kulonga, phala kubazela o itondalu, phala kuyukisa* yabhengalala, ni kwijidisa wendelu wambote.
17 Phala o selevende ya Nzambi atenene, akale polondo phala kubhanga ikalakalu yoso yambote.
