Jozuwé 10:1-43
10 Kyoso Adonizedeke sobha ya Jeluzaleme kyevu kwila, Jozuwé wa bwika o mbanza ya Hayi yu wajibha o sobha yê, kala kyabhangele ni sobha ya Jedikó, ni kwila o akwa Ngibiyone abhange paze ni ene ya atungile kumoxi,
2 wôma wa mukwata, mukonda o mbanza ya Ngibiyone yexile mbanza yadikota, exile mu itumina ku sobha. Yene yabetele-kota o mbanza ya Hayi ndenge, o mayala oso a mbanza exile masoladi.
3 Mukonda dya kiki, Adonizedeke sobha ya Jeluzaleme, watumikisa njimbu kwa Hohame, sobha ya Hebolone, ni ku sobha ya Philama ni ku sobha ya Jalemute ni ku sobha ya Jafiya ni ku sobha ya Lakiji ni ku sobha ya Ndebile ni ku sobha ya Engolone, mukwamba:
4 “Zenu mu ngikwatekese kubhânga ni akwa Ngibiyone, kuma ene abhange paze ni Jozuwé ni akwa Izalayele.”
5 Mukiki, o kitanu kya jisobha ja akwa Mamodi, o sobha ya Jeluzaleme, o sobha ya Hebolone, o sobha ya Jalemute, o sobha ya Lakiji ni sobha ya Engolone, ayi atula o jibalaka jâ kwenyoko, phala kubhânga ni akwa Ngibiyone.
6 Kyenyiki, o mayala akwa Ngibiyone, atumina kutangela Jozuwé wakexile ku Jidingale, exi: “Kana kubhana dikunda ku abhik’é, zá ni lusolo u tukwatekese. Kuma o jisobha joso ja akwa Mamodi, jatungu ku milundu, adibhongolola phala kubhânga n’etu.”
7 Kyenyiki, Jozuwé watundu ku Jidingale ni masoladi oso ni mazonda a ita.
8 Jihova wambela Jozuwé, wixi: “Kana kwa akwatela wôma, kuma nga abhakula bhu maku mé. Séku muthu mudyâ wandatena kubhânga n’eye.”
9 Jozuwé watundu ku Jidingale, wende o usuku woso, wayi mubhânga ni jinguma jê. Mu kithangana kyenyokyo o jinguma jê kakifikile.
10 Jihova wa abhangesa kukala mu kavwanza ku pholo ya Izalayele. O akwa Izalayele ajibha athu avulu ku Ngibiyone, mu kwakaya mukubanda ku Betolone ni ku ajibha mu njila yoso, tunde ku Azeka ndu ku Makeda.
11 Kyoso o jinguma ki jakexile mulenga akwa Izalayele, ya akexile mu kulumuka ku Betolone, Jihova wabhangesa kunoka mvula ya matadi amakota ku thandu dyâ, kate ku Azeka, ene anga afwa. Mukidi, o athu afu ku matadi avudile dingi, o afu ku xibhata ya akwa Izalayele ndenge.
12 Mu kizuwa kyoso Jihova kyakwatekesa akwa Izalayele kutolola akwa Mamodi, Jozuwé wasambe kwa Jihova, ku pholo ya akwa Izalayele, mukwamba:
“Dikumbi, emana hanji ku Ngibiyone.Mbeji, emana mu honga ya Ajalone.”
13 Kyenyiki, o dikumbi dyemana mwene, o dyeji we dyemana, kate kyoso o kifuxi kya Izalayele kyajibha o jinguma jâ. O maka yá, a asoneka mu divulu dya Jexele. O dikumbi dyemanene bhukaxi ka dyulu mu kizuwa kya muvimba, dyalembwa o kuboba ni lusolo.
14 Nuka kwakexile kizuwa kala kyokyo, né mukulu né mu izuwa ku pholo, kuma Jihova wevu o dizwí dya muthu, mukonda Jihova wakexile mubhângela akwa Izalayele.
15 Mukubhita o ima yiyi, Jozuwé wavutuka ni Izalayele yoso ku Jidingale.
16 Maji o jisobha jitanu, alenge, ya adisweka mu dikungu ku Makeda.
17 Kyenyiki, ambela Jozuwé, exi: “O jisobha jitanu alenge, ya adisweka mu dikungu ku Makeda.”
18 Kyenyiki-phe Jozuwé wa ambela, wixi: “Lundumunenu o matadi onene bhu dibokwenu dya dikungu, anga mutula mayala phala kulangidila o dikungu.
19 Maji yó anda xala kudima, katokala kwimana. Kayenu o jinguma jenu ni ku ajibha. Kanenu kwa ehela kubokona mu jimbanza jâ, kuma Jihova Nzambi yenu wa abhakula bhu maku menu.”
20 Jozuwé ni akwa Izalayele ajibha athu avulu, asubhuka ngo yó atena o kulenga anga adisweka mu jimbanza jakexile ni ilumbu.
21 Mukiki, o mundu woso wavutuka ni mwenyu kwa Jozuwé, ku Makeda. Séku muthu watenene kuzwela kima kyayibha ku akwa Izalayele.
22 Mukusuluka, Jozuwé wa ambela, wixi: “Jikulenu o dibokwenu dya dikungu, bhekenu o kitanu kya jisobha bhu kanga.”
23 Kyenyiki, ene abheka bhu kanga o jisobha jitanu. O sobha ya Jeluzaleme, o sobha ya Hebolone, o sobha ya Jalemute, o sobha ya Lakiji ni sobha ya Engolone.
24 Kyoso kyabheka o jisobha jiji kwa Jozuwé, mwene wexana o mayala oso a Izalayele, yu wambela o jikabhitangu ja ita ayile ni mwene, wixi: “Zukamenu. Tulenu o inama yenu kumakoxi a jisobha jiji.” Kyenyiki, ene azukama, ya atula o inama yâ kumakoxi a jisobha.
25 Mukusuluka, Jozuwé wa ambela dingi, wixi: “Kanenu kukala ni wôma, kanenu kuthandanganya, kalenu mu indanda muswine, kuma kiki kyene kyanda bhanga Jihova ku jinguma jenu joso janda kwiza mubhânga n’enu.”
26 Kyenyiki, Jozuwé wa ajibha yu wa anyenge ku mixi itanu. Ene axala kwenyoko kate mu ngoloxi.
27 Kyoso o dikumbi kidyexile muboba, Jozuwé watumu kukatula o imbi ku mixi, ni ku itakula mu dikungu mwa diswekele o jisobha jenyiji. Mukusuluka, atula matadi bhu dibokwenu dya dikungu. O matadi ala kwenyoko kate mu izuwa yalelu.
28 Mu kizuwa kyenyokyo, Jozuwé watolola o mbanza ya Makeda, yu wajibha o athu ni xibhata. Mwene wajibha o sobha ni oso atungile mwenyomo, kaxisa-ku muthu ni mwenyu. Mwene wabhange kwa sobha ya Makeda kala kyabhangele kwa sobha ya Jedikó.
29 Kyenyiki, Jozuwé watundu ku Makeda ni Izalayele yoso ayi kate ku Libina, yu wabhânge ni akwa Libina.
30 Jihova wabhakula we o mbanza ni sobha yê bhu maku a Izalayele, ene ajibha o athu oso, kaxisa muthu ni mwenyu. Bhenyobho ene abhange we kwa sobha yâ, kala kyabhangele kwa sobha ya Jedikó.
31 Mukusuluka, Jozuwé ni Izalayele yoso, atundu ku Libina, ya ayi ku Lakiji. Mu kubhixila kwenyoko, abhânge ni akwa Lakiji.
32 Jihova wabhakula o mbanza ya Lakiji bhu maku a akwa Izalayele, ene anga a ibwika mu kizuwa kyakayela. Atolola o mbanza ni xibhata, ni athu oso atungile-mu kala kyabhangele ni Libina.
33 Holane sobha ya Ngezele wayi mukwatekesa o sobha ya Lakiji, maji Jozuwé wa mujibha mwéne ni mundu wê woso, kikusubhuka né ngo muthu umoxi ni mwenyu.
34 Kyenyiki, Jozuwé ni akwa Izalayele atundu ku Lakiji, ya ayi kate ku Engolone. Mu kubhixila kwenyoko, abhânge ni akwa Engolone.
35 Atambula o mbanza mu kizuwa kyenyokyo, ya a ibwika ni xibhata. Ajibha athu oso atungile mwenyomo, kala kyabhangele ni akwa Lakiji.
36 Mukusuluka, Jozuwé watundu ni Izalayele ku Engolone, ya ayi kate ku Hebolone. Mukutula kwenyoko, abhânge ni akwa Hebolone.
37 Atambula o mbanza, ya a ibwika ni xibhata. A bwika kikale o sobha, kikale o jisanzala jâ ni athu oso atungile-mu, kaxisa-mu né ngo muthu umoxi ni mwenyu. Kala kyabhangele ni Engolone, ene abwika kikale o mbanza ya Hebolone, kikale o athu atungile-mu.
38 Mu kyenyiki-phe, Jozuwé ni Izalayele ayi kate ku Ndebile ya abhânge ni ene.
39 Mwene wabwika o mbanza ni sobha yê ni jisanzala joso ja atokalele, yu wajibha o athu atungile-mu, kikuxala né ngo muthu umoxi. Mwene wabhange ku akwa Ndebile, kala kyabhangele ku akwa Hebolone ni ku akwa Libina ni sobha yê.
40 Jozuwé watolola o ixi yoso. O jimbanza ja kexile ku milundu, ku Nengebe, ku Sefelá ni mu jihonga ni jisobha jâ joso. Kaxisa-ku muthu ni mwenyu. Mwene wajibha o athu oso kala kyatumine Jihova, o Nzambi ya Izalayele.
41 Jozuwé watolola o jimbanza joso, tunde ku Kadexi-Balaneya, kate ku Ngaza ni ixi ya Ngozene, ndu ku Ngibiyone.
42 Jozuwé watundu ngo lumoxi yu watolola o jisobha joso ni jixi jâ, mukonda Jihova o Nzambi ya Izalayele, mwéne wakexile mubhângela akwa Izalayele.
43 Mukiki-phe, Jozuwé wavutuka ni Izalayele yoso bhu kididi kyâ, ku Jidingale.
