Kala Kyasoneka Máluku 12:1-44
12 Mwene anga u mateka kwa tela ifika, wixi: “Sayi diyala dya kunu dibhya dya mividi. Mwene wa dikondolola ni ilumbu, wakande-mu ditangi dya kubhanga vinyu, ni kutunga-mu inzo ya matala ya alangidi, anga ubhana o dibhya ku idimakaji phala kudilanga,* yu wayi ku ixi yengi.
2 Mu kithangana kyatokala kya kubhongolola, mwene watumikisa mubhika ku idimakaji, phala kutambula-ku ibundu ya dibhya dya mividi.
3 Maji ene a mu kwata, a mu beta, anga a mu kaya ni maku ahatu.
4 Watumikisa dingi mubhika wa mukwá. Ene a mu kwama ku mútwe, ya a mu sebhulula.
5 Kyenyiki, watumikisa mubhika wengi, maji ene a mu jibha. Watumikisa dingi abhika avulu. Sayi yá a abeta, a ka mukwá a ajibha.
6 O mukwa dibhya waxala kyá ngó ni mon’ê wakazola. Mwene wa mu tumikisa, yu wambe, wixi: ‘Ene anda xila mon’ami.’
7 Maji o idimakaji a dizwelesa mudyâ, exi: ‘Yú mwéne o mulundudi. Zenu, tu mu jibhe ni tu xale ni undundu wê.’
8 Ene a mu kwata, a mu jibha, ya a mu takula bhu kanga dya dibhya dya mividi.
9 Ihi yanda bhanga o ngana ya dibhya? Mwene wanda kwiza, wanda jibha o idimakaji ni kubhana o dibhya dya mividi ku idimakaji yengi.
10 Enu kiluwa mu tanga mu Mikanda Ikôla kwila, ‘o ditadi dya ditunu o atungi, dyene dya kituka o ditadi dya betakota?
11 O ditadi didi dya tundu kwa Jihova, dyene madiwanu ku mesu metu.’”
12 Mukonda dya kiki, ene a mesenene ku mu kuta* mukonda ejidile kwila, o kifika kiki wa atela-kyu ene. Maji akexile ni wôma wa mundu. Ene a muxisa anga atunda-bhu.
13 Ene anga atumikisa kwa mwene amoxi ku Jifalizewu ni ku akayedi a Helode phala ku mu kwata mu izwelu yê.
14 Ene kyabhixila a mu tangela, exi: “Mesene, twejiya kwila u mukwa kidi, ki wene mu sota kusangulukisa o athu, mukonda ki wene mu tala o pholo ya athu maji ulonga o vondadi ya Nzambi ku athu ni kidi kyoso. Mu kiki tu tangele hanji, o kwila o athu atokala kufuta o lubhaku kwa Sézalu inga kana?
15 Twatokala ku lu futa inga kana?” Maji mu kwijiya o mangonya mâ, Jezú wa atangela, wixi: “Mukonda dyahi mwa mu ngi londa? Ngi bhekelyenu denádyu dimoxi ni ngi di mone.”
16 A mu bhekela denádyu dimoxi, mwene anga wa ebhwidisa: “O pholo yiyi ni kidimbu kiki kya nanyi?” Ene a tambwijila, exi: “Kya Sézalu.”
17 Mu kiki, Jezú wambe: “Bhanenu kwa Sézalu o ima ya Sézalu, maji kwa Nzambi o ima ya Nzambi.” Ene anga adiwana ni izwelu yê.
18 O Jisadusewu, yó kaxikina kwila kwene difukunukinu, a mu zukama, ya a mu ibhwidisa, exi:
19 “Mesene, Mozé wasoneka kwila, se diyala ufwa anga uxisa o muhatu, maji ukamba kuvwala-n’ê twana, o phang’yê watokala kukazala ni mutudi n’a vwale ana phala kusokolola o mwiji wa phang’yê wafu.
20 Kwakexile sambwadi dya jiphange ja mala. O wa dyanga wakazala, maji wafu sé kuvwala mona.
21 O wa kayadi wakazala ni mutudi, maji wafu we sé kuvwala mona. Kyene we kyabhiti ni wa katatu.
22 Ku sambwadi dya jiphange, sé-ku muthu waxisa mona. Mu kusuka-ku, o muhatu wafu we.
23 Ku difukunukinu mwene wanda kala muhatu wa nanyi? Kuma o sambwadi akazala-nê.”
24 Jezú wa atangela dingi, wixi: “Enu mwa tondala kyavulu! Mukonda ki mwejiya o Mikanda Ikôla, né o kutena kwa Nzambi.
25 Mukonda kyoso kyanda fukununa o madifundu, o mala kanda kazala, o ahatu we kanda kwa bhana mu ukaza, maji ene akala kála o jianju ku dyulu.
26 Kyalungu ni madifundu kufukunuka, kiluwa mu tanga mu divulu dya Mozé, mu musoso wa kisasa, kyoso Nzambi kya mu tangela, wixi: ‘Eme ngi Nzambi ya Mbalahamu, ngi Nzambi ya Izake, ngi Nzambi ya Jakobo’?
27 Mwene ki Nzambi ya madifundu, maji ya athu ala ku mwenyu. Enu mwa tondala kyavulu!”
28 Mesene imoxi ya kulonga o Kijila, wakexile bhenyobho, kyazubha kwívwa o jiphata ja kwatele, mu kumona kwila Jezú wa a tambwijila kyambote, wa mwibhwidisa, wixi: “Ku itumu yoso, kyebhi o kitumu kya dyanga?”*
29 Jezú wa tambwijila: “Kya dyanga kyenyiki: ‘Ívwa Izalayele, Jihova Nzambi yetu, mwéne ngó Jihova.
30 Zola Jihova Nzambi yé, ni muxima wé woso, ni mwenyu wé woso, ni kilunji kyé kyoso ni nguzu yé yoso.’
31 O kya kayadi, kyenyiki: ‘Zola mukwenu kála ki wadizolo eye mwene.’ Kibhwala kitumu kya túndu o itumu yiyi.
32 O mesene ya kulonga o Kijila, wa mu vutwila, wixi: “Mesene, kidi mwene ki wazwela, ‘Mwene Nzambi imoxi ngó, kikwene dingi mukwá’,
33 o ku mu zola ni muxima woso, ni kilunji kyoso ni nguzu yoso, ni kwila, mukwenu u mu zola kála ki wadizolo eye mwene, kwala kota, o jisata joso ja kwoha ni jisata ja mukwá, ndenge.”
34 Jezú mu kumona kwila, mwene wa tambwijila ni unjimu, wa mu tangela: “O Utuminu wa Nzambi ki wa kukala dikanga.” Mu kiki, sé-ku muthu watenene dingi ku mu bhanga ibhwidisu.
35 Mu kusuluka mu kulonga mu tembulu, Jezú wambe, wixi: “Mukonda dyahi o jimesene ja kulonga o Kitumu amba kwila, Kidistu mon’a Davidi?
36 Bhukaxi ka nzumbi ikôla, Davidi wambe, wixi: ‘Jihova wambela Ngana yami, wixi: “Xikama bhu mbandu yami ya kadilu, katé ki ngi tula o jinguma jé bhoxi dya inama yé.”’
37 Se Davidi wa mwixana Ngana, kyebhi-phe mwene kyakala mon’ê?”
Mundu wavulu akexile mu mwivwa ni ngalasa yoso.
38 Mwene wakexile mwalonga ni kuzwela, wixi: “Dilangyenu ni jimesene ja kulonga o Kijila, amesena kwenda ni izwatu yalebha ni kwa menekena mu itanda,*
39 amesena we o ididi ya dyanga* mu malombe* ni ididi ya betakota mu jifesa.
40 Ene atambula o ima yangene ya atudi,* abhanga misambu yalebha, phala kwa ximana ku athu. O kaxtiku kâ kanda kala dingi kota.”
41 Jezú anga uxikama bhwa zukama o jingonga ja kutula o kitadi, yu wakexile mu tonginina o mundu wakexile muta o kitadi mu jingonga. Jimvwama javulu jakexile muta-mu mabele* avulu.
42 Anga kwiza mutudi wala ngadyama, uta-mu tu mabele tuyadi* twa kambe valolo yavulu.
43 Mwene anga wixana o maxibulu mê, yu wa atangela, wixi: “Ngi mi ambela o kidi kwila, o mutudi yú wa ngadyama, wate dingi mu jingonga ja kitadi, ene oso ndenge.”
44 Mukonda ene oso ate-mu o ima ya a subhukile, maji mwene mu wadyama wê, wate-mu yoso ya kexile nayu phala kukala ku mwenyu.”
Footnotes
^ Mu Ngel.: “u di lukalesa.”
^ Mba, “ku mu kwata.”
^ Mba, “kya beta-o-kota.”
^ Mba, “mu ididi mu bhongoloka athu avulu.”
^ Mba, “ya beta-o-kota.”
^ Mba, “ididi ya ubhezelu.”
^ Mu Ngel.: “a dya o jinzo ja atudi.”
^ Mba, “iphaka.”
^ Mu Ngel.: “lepta jiyadi, ji tenesa quadrante imoxi.”
