Kala Kyasoneka Máluku 13:1-37
13 Kyoso kyakexile mu tunda mu tembulu, dixibulu dimoxi dya mu tangela, wixi: “Mesene, tala o kuyuka kwa matadi yá ni kwa tembulu yoso!”
2 Mu kiki, Jezú wa mwambela, wixi: “Eye wa mu mona o ilumbu yiyi ya makota? Bhenyabha ki bhwanda xala ditadi dimoxi kuthandu dya mukwá, sé ku di lundumuna.”
3 Kyoso mwene kya xikamene ku Mulundu wa Midiva, mu kutala o tembulu, Phetele, Tiyaku, Nzwá ni Mandele a mu ibhwidisa ubheka wâ, exi:
4 “Tu tangele, o ima yiyi yanda bhita thembu kuxi? Kyebhi o kijimbwete kya kwila, o dizubhilu dya ima yiyi dya zukama?”
5 Jezú wamateka kwa tangela, wixi: “Dilangyenu phala ki bhukale muthu u mi nganala.
6 Avulu anda kwiza mu dijina dyami kwila: ‘Éme ngi Kidistu.’ Ene anda nganala athu avulu.
7 Kyoso ki mwívwa ita ni jingolokela* ja ita mu ididi yavulu, ki mu kale ni wôma. Ima yiyi yatokala kubhita mwene, maji ki dyene luwa o dizubhilu.
8 “Mukonda akwá ixi imoxi anda bhânga mu ita ni akwá ixi ya mukwá, kwanda kala kutunguta kwa ixi mu ididi yavulu, kwanda kala we nzala. Ima yoso yiyi, dimatekenu ngó dya malamba.*
9 “Enu-phe, dilangyenu. O athu anda mi bhakula mu jinzo ja kufundisa, ni ku mi beta mu malombe.* Mukonda dyami, ene anda mi ambata bhu pholo ya jinguvulu ni ya jisobha, phala kwa bhana umbangi.
10 Ki bhinga we kwila, o njimbu yambote adyanga ku iboka mu jixi joso.
11 Kyoso kya mi ambata phala ku mi bhakula ku jinguvulu, ki mu tandanganye ni ima i mwanda zwela, maji mu zwela o ima yanda mi bhana mu kithangana* kyenyókyo. Mukonda k’enu mwandazwela, maji o nzumbi ikôla.
12 Muthu wanda bhakula phang’yê phala ku mu jibha, o tata wanda bhakula o mona, o twana twanda lungulukila o jitata, phala kwa jibhisa.
13 Athu oso anda mi zemba mukonda dya dijina dyami. Maji woso ukolokota katé ku dizubhilu, mwéne wanda bhuluka.
14 “Kyoso ki mu mona o kisunji ki bhekela o kibwikilu, kyemana bhu kididi ki kyatokala kukala-bhu, (woso utanga a tongolole), mu kyenyiki-phe, oso akala mu Judeya, amateke kulengela ku milundu.
15 Woso ukala kuthandu dya inzo yê katuluke, né kubokona m’onzo phala kukatula kima.
16 Woso we ukala ku dibhya, kavutuke ku ima yaxisa kudima, phala kutakana o kizwatu kyê.
17 Lamba dya ahatu anda kwimita ni yó anda kwamwisa mu izuwa yenyóyo!
18 Kolokotenu mu kusamba phala o ima yiyi, ki ibhite mu thembu ya mbambi,*
19 mukonda izuwa yóyo yanda kala izuwa ya hadi, kiluwa ibhita tundé ku dimatekenu kyoso Nzambi kyabhange o ngongo, katé kindala, ku hádya we ki yanda bhita dingi.
20 Mu kidi, se Jihova katolesele o izuwa yenyóyo, sé-ku muthu weji bhuluka. Maji mukonda dya yó a asolo kwa mwene, o izuwa yenyóyo mwene wa itolesa.
21 “Mu kyenyiki, se bhukala we muthu u mi tangela, wixi: ‘Talesenu! Kidistu yú bhabha,’ mba, ‘Talesenu! Yú koko,’ kanenu ku mu xikina.
22 Mukonda kwanda moneka Jikidistu ja makutu ni jipolofeta ja makutu, ene anda bhanga isumwa ni madiwanu phala kunganala o athu, katé mwene ni yó a asolo kwa Nzambi.
23 Mu kiki, dilangyenu. Ima yoso nga mi tangela-yu ande dya kubhita.
24 “Maji, mu izuwa yenyóyo, kyoso kyanda bhita o hadi yiyi, o dikumbi dyanda vunda, o mbeji ki yanda mwika o mukengeji wê,
25 o jithéthembwa janda lawuka ku dyulu, o ima ku dyulu yanda tunguta.
26 O athu anda mona o Mon’a muthu kwiza ku matuta, ni kutena ni fuma yoso.
27 Mwene wanda tumikisa o jianju jê, ni kubhongolola o athu’ê ósole ku mbandu jiwana ja ngongo,* tundé kwa tundu o ixi katé kwa suku o dyulu.
28 “Ku muxi wa mufiku, dilongyenu-ku o kifika kiki: Kyoso ki mu mona kwila, o jithangu ja ubhe ja mateka kubwingita, mwejiya kwila o thembu ya mvula ya zukama.
29 Kyene we kimoxi, kyoso ki mu mona o ima yoso yiyi ya mu bhita, ijiyenu-kyu kwila, mwene wazukama, wala kyá bhu mwelu.
30 Ngi mi tangela ni kidi kyoso kwila, o mwiji yú ki wanda bhita, katé kyanda dikumbidila o ima yoso yiyi.
31 O dyulu ni ixi yanda bhita, maji o maka mami anda nangenena katé ku hádya ni hádya.
32 “Yalungu ni kizuwa mba kithangana* kyenyókyo, sé-ku muthu wa k’ijiya, né o jianju ku dyulu, né o Mona, maji Tata ngó wa k’ijiya.
33 Alukenu-phe, kolokotenu mu kudilanga, mukonda o kithangana kyoxinde ki mwa k’ijiya.
34 Kiki kya difwangana ni diyala, wayi mu ixi yengi, waxisa o inzo yê, yu wabhana o ungana ku abhik’ê, anga wa awanena kala muthu ni kikalakalu kyê, yu watendelesa o mulangidi, n’a kolokote kudilanga.
35 Kyenyiki, kolokotenu mu kudilanga, mukonda ki mwejiya o kithangana kyanda kwiza o ngana mukwa inzo, kikale mu usuku mba mu kaxi ka usuku, mu makolombolo, mba mu kamene-mene.
36 Phala ki kibhite kwila, kyoso mwene kyanda kwiza, ka mi sange mwa mu zeka.
37 Kyoso ki nga mi tangela, ene oso nga atangela-kyu: Kolokotenu mu kudilanga.”
Footnotes
^ Mba, “minangu ya.”
^ Mu Ngel.: “ndolo ya kuvwala.”
^ Mba, “ididi ya ubhezelu.”
^ Mu Ngel.: “ola.”
^ Mba, “kixibhu.”
^ Mu Ngel.: “itembu iwana.”
^ Mu Ngel.: “ola.”
