Kala Kyasoneka Máluku 4:1-41
4 Jezú anga umateka dingi kulonga ku mbandu ya musanza wa kalunga, mundu wavulu wa bhongoloka bhwa kexile mwene. Mu kiki, mwene wa dilôngo mu ulungu yu waxikama, anga o ulungu a usetula bhofele, maji o mundu-phe wakexile ku mbandu* ya kalunga.
2 Mwene wamateka kwalonga ima yavulu bhukaxi ka ifika, yu wa ambela, wixi:
3 “Ivwenu! Mukuni wa jimbutu watundu phala kukuna.
4 Kyoso kyakexile mu kuna o jimbutu, sayi jiji ja sonokena bhu mbandu a njila, o jinjila jiza anga jimoma o jimbutu.
5 Ja mukwá ja sonokena bhu kididi bhwala o matadi mwala ngó mavu ofele, ja sabhuka lusolo, mukonda o mavu ala ngó kuthandu.
6 Maji kyoso kyatu o mwanya, jene jalela, anga jikukuta, mukonda ja kambele jindanji.
7 Ja ka mukwá jasonokena mu minya, o minya ikula ixita o jimbutu mwa vundu. Anga jene ji kamba kwima ibundu.
8 Ja mukwá jasonokena mu mavu ambote, jimateka kwima ibundu. Anga jibhana makwinyi atatu, makwinyi a samanu, ni hama ya jiveji ndenge.”
9 Mwene-phe wambe dingi, wixi: “Woso-phe wala ni mátwi a kwívwa, évwe.”
10 Kyoso kyakexile ubheka wê, o athu a mu kondolokele eza kumoxi ni kwinyi ni kiyadi kya jipoxolo, anga amateka ku mu bhanga ibhwidisu yalungu ni ifika yatele.
11 Mwene wa ambela, wixi: “Enu a mibhana o unjimu wa kwijiya o ikutu ya Nzambi yalungu ni Utuminu wê, maji o athu a ka mukwá ima yoso a azwelela-yu bhukaxi ka ifika,
12 phala a mone o ima i ngi bhanga, maji ka itendela, evwa o ima i ngi longa, maji ka itongolola, ene kanda vutuka kwa Nzambi n’a tambule o muloloki.”
13 Jezú wa a ambela dingi, wixi: “Enu ki mwa tendela o kifika kiki? Kyebhi-phe, ki mwanda tena kutendela o ifika ya mukwá?
14 “O mukuni, ukuna o mak’â Nzambi.
15 O jimbutu jo kune ku mbandu a njila, jilombolola o athu evwa o mak’â Nzambi, anga kwiza Satanaji ukatula o maka o kune ku mixima yâ.
16 Kyene we kimoxi, o jimbutu jokune bhu kididi bhwala o matadi, jilombolola o athu evwa o mak’â Nzambi, anga axikina ni kusanguluka kwoso.
17 Maji ene kala ni jindanji moxi dyâ, mu kiki a nangenena ngó ka kithangana, kyoso ki moneka o ibhidi mba izukutisu mukonda dya mak’â Nzambi, ene atexi o kixikanu kyâ.*
18 Sayi hanji ja mukwá jokune mu minya, jene jilombolola o athu évwa o mak’â Nzambi,
19 maji o jihele ja mwenyu ku mundu yú,* o kudyanguka kwa jimbongo ni lwímbi lwa kukala ni ima ya mukwá dingi, lubokona ku mixima yâ, anga lubhaka o mak’â Nzambi mwavundu.
20 Mu kusuka-ku, o jimbutu jokune mu mavu ambote, jilombolola o athu évwa o mak’â Nzambi, axikina, anga ema ibundu, makwinyi atatu, makwinyi a samanu, ni hama ya jiveji ndenge.”
21 Mwene anga wa atangela dingi, wixi: “O kwila o athu ene mu futa o kandeya ni kinda* mba ku katula koxi a hama? Kene mu katula kuthandu a meza?
22 Mukonda ki bhwale kima kyosweke akamba ku kijiya, mba kima kyobhake kyambote ki kamba kumoneka.
23 Woso wala ni mátwi a kwívwa, évwe.”
24 Mwene wambe dingi, wixi: “Alukenu ku yoso i mwívwa. Mukonda o kizongelu ki mu zongela nakyu akwenu, kyene we kyanda mi zongela na-kyu, anga anda mi bandekesa-ku dingi.
25 Mukonda woso wala ni kima, anda mu bhana dingi, n’a kale ni ima yavulu, maji woso kala ni kima, katé mwene ni kima kyofele kyala nakyu, anda mu tambula-kyu.”
26 Mwene anga wa atangela dingi, wixi: “Kyenyiki, o Utuminu wa Nzambi wa difwangana ni diyala ukuwa jimbutu mu mavu.
27 Mu usuku, mwene uzeka, mu kamene, ubalumuka, o jimbutu kyoso ki jisabhuka, anga jikula, mwene ka kijiya.
28 O mavu bhofele-bhofele, abhana idima mudyê mwene: Ku dyanga o kixina, ku kayela o disa, mu kusuka-ku, o jimbundu jabhi kyá.
29 Maji kyoso o jimbundu ki jibhya, mwene ukwata o kibhôlola,* mukonda o kithangana kya kubhongolola kya bhixila kyá.”
30 Jezú wambe dingi, wixi: “O Utuminu wa Nzambi tu usokesa ni ihi? Mba tu u jimbulula ni kifika kyahi?
31 Wene wa difwangana ni lumbundu lwa mustarda. Kyoso kya lu kuna, lwéne lwa beta o kutola ku jimbutu joso mu ngongo.
32 Maji kyazubha o ku lu kuna-phe, lusabhuka anga lukala kota mu kukula, idima yoso ndenge, anga lukala ni jithangu* ja makota. O jinjila jibhita bhulu jiza, anga jisanga diswamenu mu kilembeketa kyê.”
33 Jezú wa alongo o mak’â Nzambi mu ifika yavulu kala yiyi, katé bhwoso bhwa tenene kutendela.
34 Mu kidi, mwene kakexile mwa tangela kima sé kuta ifika, maji kyoso kyakexile ubheka ni maxibulu mê, wakexile mwa lombolwela o ima yoso.
35 Mu kizuwa kyenyókyo mu kutula mu ngoloxi, mwene wambela o maxibulu mê: “Tu zawukyenu ku sámbwa dya musanza wa kalunga.”
36 Kyoso o maxibulu kyazubha kulekela o mundu, adilôngo mu ulungu kumoxi ni Jezú. Anga o maulungu a mukwá a akayela we.
37 Anga kumateka kitembu kyadikota mu kalunga, o mabhuku akexile mu divunda ku ulungu. O ulungu wakexile mu kwizala ni menya.
38 Maji Jezú wakexile kudima mu ulungu mu zeka ku phétu, ene a mu balumuna, anga a mu ambela, exi: “Mesene, kwa mu mona kwila twanda fwa?”
39 Mwene wa balumuka wabazela o kitembu, yu wambela o musanza wa kalunga, wixi: “Tululuka! Dixibhe!” O kitembu kibatama, anga kukala kutululuka kwavulu.
40 Jezú-phe wa ambela, wixi: “Mukonda dyahi mwala ni wôma wavulu?* Ki mwalenu luwa ni kixikanu?”
41 Ene akala ni wôma wavulu, anga adyambela mudyâ, exi: “O diyala didi nanyi? Katé mwene o kitembu ni mabhuku a mu belesela!”
Footnotes
^ Mba, “ndundu.”
^ Mu Ngel.: “a dibhukana.”
^ Mba, “ja thembu yiyi.” Tala o Dilombolwelu.
^ Mba, “kinda kya kuzongela.”
^ Mba, “imvwe.”
^ Mba, “mabhanda.”
^ Mba, “mwa mu teketa kyavulu.”
