Kala Kyasoneka Máluku 5:1-43
5 Ene-phe abhixila ku sámbwa dya kalunga, mu mbanza ya akwa Jelaze.
2 Kyoso Jezú kyatuluka mu ulungu, diyala dya kexile ni nzumbi yayibha dya tundu ku jimbila, wayi mu disanga-né.
3 Mwene watungile ku jimbila, katé mu kithangana kyenyókyo sé-ku muthu wa tenene ku mu kuta, né mwene ni malubhambu.*
4 A mu kutile kyá veji javulu ni malubhambu ku maku ni ku inama, maji mwene wakexile mu batujula o malubhambu. Sé-ku muthu wakexile ni nguzu phala ku mu tolola.
5 Mu usuku ni mu mwanya, mwene wakexile mu dikolakola jinga ku jimbila ni ku milundu, ni ku di kwama ni matadi.
6 Maji kyamono Jezú kadikanga, walenge katé bhwa kexile mwene, anga u mu fukamena.
7 Anga udikola ni dízwi dya swina, wixi: “Ihi i wamesena kokwami, Jezú, Mon’a Nzambi o Suke-ku? Nga kulokela mu dijina dya Nzambi kwila, kana ku ngi talesa hadi.”
8 Mukonda Jezú wa dyangele ku mwambela, wixi: “Tunda mwa mwene, eye u nzumbi yayibha.”
9 Jezú-phe wa mwibhula: “Dijina dyé nanyi?” Mwene wa mu tambwijila: “Dijina dyami Kifuxi, mukonda twavulu.”
10 Mwene wakexile mu dyonda kwa Jezú, phala ka tumikise o jinzumbi jayibha mu mbanza ya mukwá.
11 Kwakexile kibhanga kyadikota kya jingulu, ja kexile mudya ku mulundu.
12 Mu kiki, o jinzumbi jayibha ja mu dyondela, exi: “Tu tume ku kibhanga, phala tu bokone mu jingulu.”
13 Jezú-phe wa ehela. O jinzumbi jayibha jatundu, anga ja bokona mu jingulu, o jingulu ja ditakula mu dikenye* mu musanza wa kalunga, anga midi jiyadi ja jingulu ja boba mu menya.
14 O athu akexile mu langa o jingulu, alenge, ya ayi mu tangela o athu mu mbanza ni mu sanzala. O athu anga ayi mu tala o kima kyabhiti.
15 O athu azukama kwa Jezú, ya amono o diyala dya kexile ni Kifuxi kya madimonyo, waxikama, wazwata, wakexile kyá ni kilunji kyambote. O athu anga akala ni wôma.
16 Oso a mwene o madiwanu yá, atangela o athu eza o kima kyabhiti ni diyala dya kexile ni dimonyo, ni kima kyabhiti ni jingulu.
17 Mu kiki, a mateka ku dyondela Jezú phala kutunda mu mbanza yâ.
18 Kyoso mwene kyakexile mu haba mu ulungu, o diyala dya kexile ni dimonyo, wa mu dyondela phala kuya-nê kumoxi.
19 Maji Jezú ka mwehela kuya-nê, yu wa mwambela: “Ndé kubhata ku jindandu jé, wa atangele yoso yabhange Jihova kokwé, ni henda ya kukwatela.”
20 Anga o diyala utunda, yu wamateka kutangela o athu mu Dekapolo,* yoso ya mu bhangele Jezú. Athu oso anga adiwana.
21 Kyoso Jezú kyazubha kuzawuka ku sámbwa, mundu wavulu wa mu kondolokela. Mwene wakexile ku mbandu* ya musanza wa kalunga.
22 Mutwameni wa dilombe,* a mwixana Jayilu, weza, kyamono Jezú, wafukama bhu inama yê.
23 Mwene wa mu dyondela kyavulu, wixi: “Kamona kami ka muhatu, ka kumbama.* Nga kudyóndo, zá ute o maku mé kuthandu dyê, phala adisanze, n’a bhuluke.”
24 Jezú wayi-nê, mundu wavulu wakexile ku mu kayela ni ku mu xina-xina.
25 Kwakexile muhatu wakatele kibhubhe kya manyinga mu kwinyi ni kiyadi kya mivu.
26 Mwene a mu talesele hadi yavulu ku asaki, wa ngastalele o kitadi kyoso kyakexile nakyu, maji kadisanzele. Muveji dya kiki, o uhaxi wa dibandekesa dingi.
27 Mwene kyevu yalungu ni Jezú, wa mu zukama kudima bhukaxi ka mundu, anga u mu kwata ku kizwatu kyê,
28 mukonda wakexile mu zwela, wixi: “Se ngi kwata ngó ku kizwatu kyê, nganda disanza mwene.”
29 Mu kithangana kyenyókyo, o kibhubhe kya manyinga kyabatuka, anga udivwa mu mukutu kwila, wadisanze ku uhaxi wê wabhonzo.
30 Mu kithangana kyenyókyo Jezú wa divu kwila ku mukutu wê kwa tundile kutena. Mwene wa sakuka kudima bhukaxi ka mundu, anga wibhwidisa: “Nanyi wa ngi kwata ku kizwatu kyami?”
31 O maxibulu mê, a mwambela: “Eye wa mu mona kwila o mundu wa mu ku xina-xina, wa mu kwibhula hanji: ‘Nanyi wa ngi kwata?’”
32 Mu kiki, mwene wakexile mu tala mu jimbandu phala kumona se nanyi wa mu kwata.
33 O muhatu mu kwijiya yoso yabhiti ni mwene, ni kuteketa ni wôma, wa mu zukama, wafukama bhu pholo yê, yu wa mu tangela o kidi kyoso.
34 Jezú wa mwambela, wixi: “Mon’ami, o kixikanu kyé kya kubhangesa kudisanza. Ndé ni kutululuka, disanze ku uhaxi wé wabhonzo.”
35 Kyoso Jezú kyakexile hanji mu zwela, kwa bhixila mayala atokala ku inzo ya mutwameni wa dilombe,* ya a mwambela, exi: “Jayilu, mon’é wafu! Mukonda dyahi wa mu bhindamesa dingi o Mesene?”
36 Maji Jezú wevu o ima yakexile mu zwela ene, yu watangela o mutwameni wa dilombe,* wixi: “Kana kukala ni wôma! Kala ngó ni kixikanu.”
37 Mwene kehela muthu woso-woso ku mu kayela, kikale ngó Phetele, Tiyaku, ni Nzwá phang’ya Tiyaku.
38 Ene anga abhixila ku inzo ya mutwameni wa dilombe,* Jezú wamono o athu akexile mu dikola-kola ni kudila, ni kuditenda ni dizwi dya swina.
39 Kyoso kyabokona, mwene wa ambela, wixi: “Mukonda dyahi mwa mu dikola-kola ni kudila? O mona k’afu kana, maji wayi ngó kukilu.”
40 O athu amateka ku mwolela ni ku mu sebhulula. Maji kyazubha kutubhula o athu bhu kanga, wabokona kumoxi ni jitata avu o mona, ni yó eza-nê kumoxi, anga uya mwakexile o mona.
41 Mu kiki, mwene wakwata ku lukwaku lwa kamona, yu wa mwambela: “Talita kumi” kilombolola: “Kamona nga ku tumu, ‘Balumuka!’”
42 Mu kithangana kyenyókyo, o kamona ka balumuka anga umateka kwenda. (Mwene wakexile ni kwinyi ni kiyadi kya mivu.) Mu kyenyiki ene oso a sangulukile kyavulu.
43 Mwene wa atendelesa muveji javulu* phala katangele muthu, yoso yabhiti. Anga utuma kubhana kudya ku kamona.
Footnotes
^ Mba, “jingindaji.”
^ Mba, “kididi kya zendalala.”
^ Mba, “mu mbandu ya Dikwinyi dya Jimbanza.”
^ Mba, “ndundu.”
^ Mba, “kididi kya ubhezelu.”
^ Mba, “wa mu fwa.”
^ Mba, “kididi kya ubhezelu.”
^ Mba, “kididi kya ubhezelu.”
^ Mba, “kididi kya ubhezelu.”
^ Mba, “ni nguzu yoso.”
