Ku Akwa Ngalásya 6:1-18
6 Phange jami, se bhukala muthu wa muditela mu njila yayibha sé ku kijiya, enu mwa kulu mu nzumbi sotenu ku mu kwatekesa ni kubatâma kwoso. Maji kala muthu mudyenu adilange phala ka mutendale we mu kubhanga kima kyayibha.
2 Kolokotenu mu kwambata o imbamba yaneme ya akwenu. Mu kubhanga kiki, mwa mu kumbidila o Kijila kya Kidistu.
3 Se muthu ufika kwila mwene wa betakota o akwa ndenge, maji mwene ki kimé, wa mu dinganala mwene mudyê.
4 Maji kala muthu mudyenu atonginine o ibhangelu yê mwene, sé kudisokesa ni akwâ. Mu kubhanga kiki, mwene wanda sanguluka ni ima ya mubhanga.
5 Mukonda kala muthu wanda kwambata o kimbamba kyê.*
6 Ku mbandu yengi, oso a mu mulonga o maka ma Nzambi, a kwatekese we yó wa mu mulonga ni ima yoso yambote.
7 Kanenu kudinganala: kuma Nzambi k’ene ku mu tobhesa. Mukonda muthu yoso ya kuna, yéne yanda bhongolola.
8 Woso ukuna mu kuxinganeka o jihânji ja xitu, ku jihânji ja xitu wanda bhongolola-ku kalunga, maji woso ukuna mu kuxinganeka o nzumbi ya Nzambi, ku nzumbi ya Nzambi wanda bhongolola-ku mwenyu wakalelaku.
9 Kyenyiki, ki tubhwile mu kubhanga o ima yambote, mukonda se tukamba o kuzoza,* twanda bhongolola mu kithangana kyatokala.
10 Kyoso ki tukala ni kithangana kyatokala, tubhangyenu o mbote ku athu oso, maji benge-benge ku jiphange jetu mu nzumbi.
11 Talesenu, nga mi sonekena o mukanda yú ni maku mami ni isoneku ya makota.
12 O yó amesena kudizangeleka bhu pholo ya athu, amesena ku mi jijidika phala ku misaya, ene a kibhanga ngó phala ka azukutise mukonda dya taka* ya Kidistu.
13 Mukonda o yó a dikwatenena mu kitumu kya kusaya, k’ene mu kumbidila o Kijila kyoso, maji ene amesena kwila enu a misaya, phala a dizangeleke mukonda dyenu.*
14 Eme ki nga mesena kudizangeleka mu kima kyoso-kyoso, maji ngi dizangeleka ngó mukonda dya taka* ya Ngana yetu Jezú Kidistu. Bhukaxi ka mwene, o mundu wafu phala eme,* eme we ngafu phala o mundu.
15 O kusaya ni kukamba kusaya ki kwala ni valolo, maji o kima kya betakota o ku tubhanga tu athu a ubhe kwala Nzambi.
16 Oso akayela o maka enyá, akale ni henda ni kutululuka, ene atokala ku Izalayele ya Nzambi.
17 Tundé lelu katé ku hádya, kana muthu u ngi bhekela maka, mukonda nga mu kwambata ku mukutu wami o itote* idikisa kwila ngi mubhika wa Jezú.
18 Phange jami, o ngalasa ya Ngana yetu Jezú Kidistu ikale ni enu kyoso ki muya ni kulondekesa o idifwa yambote. Kyene.*
Footnotes
^ Mba, “kala muthu wa tokala kubhanga o kikalakalu kyê.”
^ Mba, “se tu kamba kubhwila.”
^ Tala o Dilombolwelu.
^ Mu Ngel.: “mukonda dya mikutu yenu.”
^ Tala o Dilombolwelu.
^ Mba, “a u phaphela kutaka.”
^ Mba, “ixeke.”
^ Mba, “Amen, mu dimi dya Ngeleku.”
