Kala Kyasoneka Nzwá 2:1-25
2 Mu kizuwa kya katatu, kubhita fesa ya ukaza mu sanzala ya Kaná mu mbanza ya Ngalileya. Anga o many’â Jezú ukala mwenyomo.
2 Jezú ni maxibulu mê, a exana we mu fesa ya ukaza.
3 Kyoso kyakexile mu bhwa o vinyu, Jezú a mwambela kwa many’â, wixi: “Ene kala dingi ni vinyu.”
4 Jezú wa mu tambwijila: “O kwila o maka yá a tutokala?* O kithangana kyami ki kyabhixila luwa.”
5 Many’â wambela o athu akexile mu sidivila: “Yoso yanda mi tangela mwene bhangenu-yu.”
6 Bhenyobho bhwakexile masanga a samanu a matadi phala kuta-mu menya, kala kyexile o kifwa kya Jijudé kya kudizelesa. Kala disanga nange dyakexile mu kwambata 44 mba 66 a jilitulu ja menya.
7 Jezú wa atangela, wixi: “Izalesenu o masanga ni menya.” Ene anga a azalesa katé kuthandu.
8 Mwene wa ambela: “Kindala katulenu-ku twofele, mu tu bhekele o mutwameni wa fesa.
9 Kyoso o mutwameni wa fesa kyalola o menya a akitula mu vinyu, sumbala kejidile kwebhi kwatundile (maji o akalakadi akatwile o menya, a kijidile), mwene wexana o ngayala,
10 anga u mwambela: “Athu oso adyanga kusidivila o vinyu yambote. Kyoso o ajitu kya kodiwa kyá, kyene kyasidivila o vinyu ki yawabha kyavulu. Maji eye wabhake o vinyu yambote katé kindala.”
11 Jezú wabhange o madiwanu yá mu sanzala ya Kaná mu mbanza ya Ngalileya, kala dimatekenu dya madiwanu eji bhanga. Mwene walondekesa o kutena kwê, o maxibulu mê anga a muxikana.
12 Kyoso kyabhiti o ima yiyi, Jezú ni many’â ni jiphange jê ni maxibulu mê, a kulumuka ku Kafalanawú, maji kanange-ku izuwa yavulu.
13 Kwa kambele ngó tu izuwa phala o Fesa ya Phasu ya Jijudé, Jezú anga ubanda mu Jeluzaleme.
14 Mwene wasange mu tembulu o athu akexile mu sumbisa o jingombe, jimbudi ni jipomba, ni akwa kutolokala kitadi axikama ku yalu.
15 Kyenyiki, kyazubha kubhanga o xikote ya jingoji, wakaye oso mu tembulu, ni jimbudi ni jingombe, wa mwange o mabele* a akwa kutolokala o kitadi, ni kulundumuna o jimeza jâ.
16 Mwene anga utangela o akwa kusumbisa o jipomba, wixi: “Katulenu o ima yiyi bhabha! Ki mubhange o inzo ya Tata yami kididi kya kubhanga-mu wenji!”*
17 O maxibulu anga alembalala o izwelu yosoneke mu Mikanda Ikôla: “O henda i nga kwatela ku inzo yé, yanda wama kála túbhya ku muxima wami.”
18 Mukonda dya kiki, o Jijudé a mwambela, exi: “Tu idikise kijimbwete kilondekesa kwila eye wala ni ungana wakubhanga o ima yiyi.”
19 Jezú wa atangela: “Bulenu o tembulu yiyi, mu izuwa itatu nganda i tunga dingi.”
20 O Jijudé anga azwela, exi: “O tembulu yiyi a itungu mu makwinyi a wana ni samanu a mivu, eye wanda i tunga mu izuwa itatu?”
21 Maji o tembulu yakexile mwa tangela, yexile o mukutu wê.
22 Kyoso mwene kya mu fukununa mw’alunga, o maxibulu mê a lembalala kwila mwene wakexile muzwela o ima yiyi. Ene anga axikina mu ima yosoneke mu Mikanda Ikôla ni ya zwelele Jezú.
23 Kyoso mwene kyakexile mu Jeluzaleme mu Fesa ya Phasu, athu avulu a muxikina* mu kumona o madiwanu akexile mubhanga.
24 Maji Jezú ka adyelele, mukonda wa a ejidile kyambote,
25 mwene kabhingile muthu u mu tangela yalungu ni athu, mukonda wejidile o ibanzelu yâ.
Footnotes
^ Mu Ngel.: “Muhatu, ihi ya lungu n’eme ni eye?” Mu dimi dya Ngeleku o athu phala kudituna kima akexile mu tumbula o izwelu yiyi. O kizwelu “muhatu”, ki ki londekesa kukamba kuxila.
^ Mba, “iphaka.”
^ Mba, “kitanda.”
^ Mu Ngel.: “a xikina mu dijina dyê.”
