Kala Kyasoneka Nzwá 21:1-25
21 Kyabhiti o ima yiyi, Jezú wa tukulukila* dingi o maxibulu mê ku mbandu ya Kalunga ka Tibeliyade. Mwene wa atukulukila
2 kyoso Ximá dya Phetele, Tomé (a mwixana Jingongo), Natanayele mukwá Kaná ka Ngalileya, ni an’a Nzebedewu ni maxibulu ayadi amukwá, kyakexile kumoxi.
3 Ximá dya Phetele wa atangela: “Nga muya mutamba.” Ene a mwambela: “Twandaya kumoxi n’eye.” Ene ayi, asambela mu ulungu, maji kakwatele né ngó mbiji imoxi mu usuku wenyó.
4 Mu kúkya, Jezú wemana ku ndundu ya kalunga, maji o maxibulu mê, katongolola kwila, yó wexile Jezú.
5 Jezú anga wa ebhwidisa: “An’ami, o kwila mwala ni kama* ka kúdya?” Ene a mu tambwijila: “Kana!”
6 Mwene wa atangela: “Takulenu o wanda bhu mbandu ya kadilu ya ulungu, mwanda kwata kama koso-koso.” Kyenyiki ene atakula o wanda, maji katena ku usunga mukonda dya ndumba dya jimbiji.
7 O dixibulu a muzolele kyavulu kwa Jezú, watangela Ximá dya Phetele: “Yó Ngana Jezú!” Mu kwívwa kiki, Ximá dya Phetele wate o izwatu yê,* mukonda wakexile ni thuxi,* yu wa ditakula mu musanza wa kalunga.
8 Maji o maxibulu a mukwá eza mu ulungu wofele ni kukoka o wanda kuma wezalele ni jimbiji, mukonda ene kexile dikanga dya ndundu, kwexile ngó makwinyi avwa a jimétulu.*
9 Kyoso kyabhixila ku ndundu, ene amono túbhya twawama, ni mbiji yatula ku makala ni mbolo.
10 Jezú wa atangela: “Ku jimbiji ji mwa kwata, bhekenu-ku tumbiji.”
11 Ximá dya Phetele anga udilônga mu ulungu, usunga o wanda ku ndundu. O wanda wezalele ni jimbiji, mwexile hama ni makwinyi atanu ni kitatu a jimbiji ja makota. Sumbala o jimbiji javudile, o wanda ki watandujuka.
12 Jezú wa ambela: “Zenu mudye.” Sé-ku dixibulu watenene ku mwibhwidisa se mwene nanyi, mukonda ejidile kwila, mwéne o Ngana.
13 Jezú wakatula o mbolo, wa abhana-yu. Kyene we kyabhange ni mbiji.
14 Yiyi yexile o veji ya katatu yamoneka Jezú ku maxibulu mê, tundé kya mu fukunwine mw’alunga.
15 Kyazubha kudya, Jezú webhwidisa Ximá dya Phetele: “Ximá mon’a Nzwá, eye wa ngizolo dingi, o ima yiyi ndenge?” Mwene wa mu tambwijila: “Kyene Ngana, eye wejiya kwila, nga kuzolo.” Jezú wa mutangela: “Disa o jimbudi jami.”
16 Mwene wa mwibhwidisa dingi lwa kayadi: “Ximá mon’a Nzwá, eye wa ngizolo?” Mwene wa mu tambwijila: “Kyene Ngana, eye wejiya kwila nga kuzolo kyavulu.” Jezú wa mutangela: “Inga o tumbudi twami.”
17 Mwene wa mwibhwidisa dingi lwa katatu: “Ximá, mon’a Nzwá, eye wa ngizolo?” Phetele wa luwala mukonda dya ku mwibhwidisa lwa katatu: “O kwila eye wa ngizolo?” Mukonda dya kiki, mwene wambe: “Ngana, eye wejiya o ima yoso, wejiya kwila, eme nga kuzolo.” Jezú wa mutangela: “Disa o tumbudi twami.
18 Ni kidi kyoso ngi kutangela kwila: Kyoso kiwexile u munzangala, wakexile muzwata ni kuya kwoso ku wamesenene. Maji kyoso ki wanda kuka, eye wanda leka o maku mé phala muthu wengi n’a ku zwike. Mwene wanda kwambata ku kididi eye kiwanda mesena kuya-ku.”
19 Jezú wazwela kiki, phala kulondekesa kyebhi Phetele kyeji fwa mu kufumanesa Nzambi. Kyazubha kuzwela kiki, Jezú wamwambela: “Suluka mu ku ngi kayela.”
20 Phetele anga usakuka, umona kwila o dixibulu a muzolele kyavulu kwa Jezú wakexile mu akayela. O dixibulu didi yó wazukamene bhu jihata ja Jezú, kyoso kyakexile mudya, wa mu ibhwidisa: “Ngana, tutangele nanyi wanda kusumbisa?”
21 Kyoso Phetele kya mumono, webhwidisa Jezú: “Ngana, ihi yanda bhita ni diyala didi?”
22 Jezú wa muvutwila: “O kwila eye wabhingi kutandanganya, se ngi mesena kwila, mwene ukala ku mwenyu katé ki ngi vutuka? Eye, kolokota ngó mu ku ngikayela.”
23 Kyenyiki, kwa dimwange o njimbu kwila, o dixibulu didi keji fwa. Maji Jezú kazwelele kwila, mwene keji fwa, maji wambele: “O kwila eye wabhingi kutandanganya, se ngi mesena kwila, mwene ukala ku mwenyu katé ki ngi vutuka?”
24 O dixibulu didi, mwéne ubhana umbangi walungu ni ima yiyi, mwéne we wa isoneka. Twejiya kwila, o umbangi wê wa kidi.
25 Mu kidi, sayi ima yavulu ya mukwá yabhangele Jezú, ka isoneka. Se yoso a isonekene, nga fika kwila, mu ngongo kimweji kala kididi kyasoko phala o madivulu moso.
Footnotes
^ Mba, “wa moneka dingi ku maxibulu.”
^ Mba, “kambiji.”
^ Mba, “wa di kutu o izwatu yê.”
^ Mba, “ka di vungu o mukutu woso.”
^ Mu Ngel.: “Hama jiyadi ja jikóvadu.”
