Kala Kyasoneka Nzwá 3:1-36
3 Ku Jifalizewu kwexile diyala a mwixana Nikodemu, wexile mutwameni wa Jijudé.
2 Mwene weza mu usuku kwa Jezú, anga u mwambela: “Mesene,* twejiya kwila Nzambi wa kutumikisa kala u mulongexi, mukonda sé-ku muthu ubhanga o madiwanu u wa mubhanga, se Nzambi ukamba kukala-nê.”
3 Jezú wa mu tambwijila, wixi: “Ni kidi kyoso ngi kutangela kwila, se muthu akamba ku mu vwala lwa mukwá,* katena kumona o Utuminu wa Nzambi.”
4 Nikodemu wa mwibhwidisa, wixi: “Muthu atena kyebhi ku muvwala lwa mukwá se wakuka kyá? O kwila utena kubokona mu divumu dya many’â, n’a mu vwale lwa mukwá?”
5 Jezú wa mu tambwijila, wixi: “Ni kidi kyoso ngi kutangela kwila, se muthu akamba ku muvwala mu menya ni nzumbi, katena kubokona mu Utuminu wa Nzambi.
6 Woso a muvwala mu xitu, xitu mwene. Woso a muvwala mu nzumbi, nzumbi mwene.
7 Kana kudiwana mukonda nga kutangela kwila, enu mwatokala ku mi vwala lwa mukwá.
8 O kitembu kibhusa kwoso ku kyamesena, eye wívwa o jibuya jê, maji kwijiyé kwoso ku kyatundu ni kwoso ku kyamuya. Kiki kyene we kibhita ni muthu a muvwala mu nzumbi.”
9 Nikodemu wa mwibhwidisa: “Ima yiyi ibhita kyebhi?”
10 Jezú wa mu tambwijila: “Eye u mulongexi mu Izalayele, kiwejiya luwa o ima yiyi?
11 Ni kidi kyoso ngi kutangela kwila, o ima itwejiya yene ituzwela, o ima itwamono yene i tubhana o umbangi. Maji enu ki muxikina o umbangi u tubhana.
12 Eme nga mi tangela o ima ya ngongo, maji ki mwa ngixikana. Kyebhi-phe ki mwanda xikana o ima ya dyulu?
13 Mu kiki, kanaku muthu wabande ku dyulu, kikale ngó yó watundu ku dyulu, o Mon’a muthu.
14 Kala Mozé kyazangula o nyoka mu kikangalakata, kyene we o Mon’a muthu kyanda muzangula,
15 phala woso u muxikana, atambule o mwenyu wakalelaku.
16 “Mukonda Nzambi wazolo kyavulu o mundu, katé kyasuku mu kubhana Mon’ê umoxi-élele, phala woso u muxikana káfwe, maji akale ni mwenyu wakalelaku.
17 Kuma Nzambi katumikisa Mon’ê mu ngongo phala kufundisa o mundu, maji phala kubhulula o mundu bhukaxi ka mwene.
18 Woso u muxikana kanda mu fundisa. Woso-phe ukamba ku muxikana, a mufundisa kyá, mukonda mwene kaxikana mu dijina dya Mona umoxi-élele wa Nzambi.
19 O kima kyanda bhangesa o athu kwa fundisa, kyenyiki: O mukengeji weza mu ngongo, maji o athu azolo o kitombe muveji dya kuzola o mukengeji, mukonda o ibhangelu yâ yayibha.
20 Woso ubhanga o ima yayibha wazembe o mukengeji, mu kiki mwene kazukama ku mukengeji, phala o ibhangelu yê ki itukuluke.
21 Woso ubhanga o ima yambote, uzukama ku mukengeji, phala o athu amone kyambote kwila, o ikalakalu yê wa mu ibhanga kála kyamesena Nzambi.”
22 Kyoso kyabhiti o ima yiyi, Jezú ni maxibulu mê ayi mu jisanzala ja Judeya, mwenyomo mwene ukala nawu ni kubatizala.*
23 Nzwá wakexile we mu batizala ku Enono kwa zukamene ni Sadimi, mukonda kwenyóko kwakexile menya avulu. O athu anga akala muya kwa mwene phala ku abatizala,
24 kuma mu kithangana kyenyókyo, Nzwá kamutele hanji mu kaleya.
25 Kyenyiki o maxibulu a Nzwá azoko ni Judé imoxi, yalungu ni kijila kya kudizelesa.
26 Ene anga atangela Nzwá, exi: “Mesene,* o diyala dya kexile n’eye ku sambwa dya Njolodá, di wazwelele, wa mu batizala we, athu oso a muya kwa mwene.”
27 Nzwá wa tambwijila, wixi: “Muthu katena kutambula kima, se akamba ku mubhana-kyu kwa Nzambi.
28 Eme ng’ambele kwila, k’eme ngi Kidistu kana, maji a ngitumikisa phala ku mu twamenena ku pholo. Enu mwejiya o maka enyá.
29 O ngayala mwéne ukala ni dibhanga. Maji o dikamba dya ngayala kyoso kya zukama kwa ngayala ni kwívwa o dízwi dyê, usanguluka kyavulu. Mu kiki, o kusanguluka kwami kwatenena.
30 O mwenyú, o kikalakalu kyê kyatokala kuya ni kudibandekesa, maji o kyami kyandaya ni kusosoloka.”
31 O watundu bhulu, wabetakota athu oso ndenge. O mukwa ngongo, mukwá ngongo mwene, uzwela o ima ya ngongo. O watundu ku dyulu wabetakota athu oso ndenge.
32 Mwene ubhana umbangi walungu ni ima yamono ni yevu, maji sé-ku muthu uxikina o umbangi wê.
33 Woso uxikina o umbangi wê, uxikina* kwila Nzambi mukwá kidi.
34 Kuma o yó a mu tumikisa kwa Nzambi uzwela o maka ma Nzambi, mukonda Nzambi kabhana o nzumbi yê ni kufumba.*
35 O Tata wazolo o Mona, yu wa mubhana o ima yoso bhu maku mê.
36 Woso ukala ni kixikanu kwa Mona, wanda tambula o mwenyu wakalelaku, maji woso ukamba kubelesela o Mona, kanda tambula o mwenyu, maji o njinda ya Nzambi yanda xalela kuthandu dyê.
Footnotes
^ Mu Ngel.: “Labi.”
^ Mba nange, “a mu vwala bhulu.”
^ Mu Ngel.: “Labi.”
^ Mu Ngel.: “u ta kidimbu.”
^ Mba, “mu ku i zonga.”
