Afundixi 11:1-40
11 Jefete, mukwa Ngiliyade wexile dizonda. Mwene wexile mon’a kidyanzunga, o tat’ê wexile Ngiliyade.
2 Kyenyiki, o muhatu wa Ngiliyade wavwala we twana. Kyoso o twana ki twakulu, akaye Jefete, ya ambe: “Kiwanda tambula undundu ku dibhata dya tat’etu mukonda eye u mona wa muhatu wengi.”
3 Kyenyiki, Jefete walenge o jiphange jê, yu wayi mutunga mu ixi ya Tobe. O mayala akambele ikalakalu adibundu ni mwene, ya a mukayela.
4 Mukubhita thembu, akwa Amone abhânge ni akwa Izalayele.
5 Kyoso akwa Amone kyamateka kubhânga ni akwa Izalayele, o adyakime akwa Ngiliyade ayi ku Tobe mutakana Jefete ni lusolo lwoso.
6 Ene ambela Jefete exi: “Zá ukale kabhitangu k’etu ni tubhânge ni akwa Amone.”
7 Kyenyiki, Jefete wambela o adyakime a Ngiliyade, wixi: “K’enu mwa ngizembe? K’enu mwa ngikaye kubhata dya tat’etu? Mukonda dyahi mweza muzwela n’eme mu kithangana kiki ki mwatate?”
8 Kyenyiki, o adyakime a Ngiliyade ambela Jefete, exi: “Kyene kya tubhangesa kwiza muzwela n’eye, se wiza kumoxi n’etu anga mubhânga ni akwa Amone, wanda kala u mutwameni wa athu oso atungu ku Ngiliyade.”
9 Kyenyiki, Jefete wambela o adyakime a Ngiliyade, wixi: “Se ngivutuka n’enu phala kubhânga ni akwa Amone, Jihova anga wa abhakula bhu maku mami, nganda kala ngi mutwameni wenu.”
10 Kyenyiki, o adyakime a Ngiliyade ambela Jefete, exi: “Jihova akale mbangi* yetu, se kitubhange o ima i wa muzwela.”
11 Kyenyiki, Jefete wayi ni adyakime a Ngiliyade, o mundu anga umubhanga mutwameni ni kabhitangu. Ku Mixipa, Jefete wabhitulula o izwelu yoso ku pholo ya Jihova.
12 Mukusuluka, Jefete watumikisa akunji kwa sobha ya akwa Amone, mukwamba: “Unguma wahi u wa ngikwatela phala kwiza mubhânga n’eme mu ixi yami?”
13 O sobha ya akwa Amone wambela o akunji atumikisa Jefete, wixi: “Mukonda Izalayele watambula o ixi yami kyoso kyatundu ku Ijitu, tunde ku Anone kate ku Jaboke ndu ku Njolodá. Kindala ngibhanenu o ixi sé jinvunda.”
14 Maji Jefete watumu dingi o akunji kwa sobha ya akwa Amone,
15 yu wa ambela:
“Kiki kyene kyambe Jefete: ‘Akwa Izalayele katambula o ixi ya akwa Mowabe né ngo o ixi ya akwa Amone.
16 Kuma kyoso akwa Izalayele kyatundu ku Ijitu, endela mu kikangalakata kate mu Kalunga Kakusuka, ya abhixila mu ixi ya Kadexi.
17 Mukusuluka, akwa Izalayele atumikisa akunji kwa sobha ya Idomo phala ku mwambela, exi: “Twakudyondo, twehele kubhita mu ixi yé,” maji o sobha ya Idomo waditunu. O akwa Izalayele abhingi we kwa sobha ya Mowabe phala kwa ehela kubhita maji mwene we waditunu. Mukonda dyakiki, akwa Izalayele ayi mutunga mu ixi ya Kadexi.
18 Mu kwendela mu kikangalakata, akondoloka o ixi ya Idomo ni ya akwa Mowabe. Abhitila ku mbandu kutundila o dikumbi mu ixi ya akwa Mowabe, anga akala mu ixi ya Anone. Ene kabokona mu ixi ya Mowabe kuma o ixi ya Anone yexile o mbambe ya akwa Mowabe.
19 “Mukusuluka, akwa Izalayele atumikisa akunji kwa Sihone, o sobha ya akwa Mamodi, o sobha ya Hexebone. Akwa Izalayele ambe, exi: “Twakudyondo twehele kubhita mu ixi yé phala tubhixile ku ixi yatutokala.”
20 Maji Sihone kadyelele ku akwa Izalayele phala kubhita mu ixi yê. Kyenyiki, Sihone wexana o mundu wê, ya ayi kate ku Jahaze, ya abhânge ni akwa Izalayele.
21 Mukonda dyakiki, Jihova o Nzambi ya Izalayele, wabhakula Sihone ni mundu wê bhu maku a Izalayele. Mukyenyiki, ene a atolola. Akwa Izalayele anga atambula o ixi ya akwa Mamodi.
22 Atambula o ixi ya akwa Mamodi tunde ku Anone kate ku Jaboke, tunde mu kikangalakata kate ku ngiji ya Njolodá.
23 “Jihova o Nzambi ya Izalayele mwéne wakaye akwa Mamodi ku pholo ya mundu wê Izalayele, kindala-phe eye wamesena kukaya akwa Izalayele?
24 Eye kiwene mutambula o ima yoso ikubhana o nzambi yé Kemoxi? Etu we twanda tambula o ixi yanda tubhana Jihova Nzambi yetu.
25 O kwila eye wabeta-kota o Balake mon’a Zipolo ndenge? O kwila sayi kizuwa, mwene wadikwata kya ni Izalayele mba wabhânge nawu?
26 Kyoso Izalayele kyatungile ku Hexebone ni mu jisanzala ja atokalele, ni ku Alowele ni jisanzala ja atokalele, ni mu jimbanza jakexile mu jimbandu ja Anone mu hama jitatu ja mivu, mukonda dyahi enu kimuxinganeka kujitambula mu thembu yenyoyo?
27 Kingikute kituxi, maji eye wa mubhanga kima kyayibha mukwiza mubhânga n’eme. Lelu, Jihova akale o mufundixi bhu kaxi ka mundu wa akwa Izalayele ni ka mundu wa akwa Amone.’”
28 Maji o sobha ya akwa Amone, kabhana mátwi ku njimbu yatumikisa Jefete.
29 O nzumbi ya Jihova yeza kwa Jefete, mwene anga uzawuka Ngiliyade ni Manasa phala kuya ku Mixipa ya Ngiliyade. Ku Mixipa ya Ngiliyade wasuluka kate ku akwa Amone.
30 Mukusuluka, Jefete wabhange kikutu ni Jihova mukwamba: “Se ubhakula akwa Amone bhu maku ami,
31 o muthu wanda tunda mu inzo yami phala ku ngitambulula, kyoso kinganda vutuka ni kutululuka mu ita ni akwa Amone, wanda tokala kwa Jihova. Eme nganda mubhakula kala sata ya kwoha.”
32 Kyenyiki, Jefete wayi mubhânga ni akwa Amone, Jihova wa abhakula bhu maku mê.
33 Mwene wajibha athu avulu, tunde ku Alowele kate ku Minite makwinyi ayadi a jimbanza ndu kwa Abele-Helami. Mukyenyiki, akwa Amone a atolola kwala akwa Izalayele.
34 Mukusuka-ku, Jefete wabhixila ku Mixipa, o mon’ê wa muhatu mwene weza mu mutambulula ni kukina ni kuxika kangoma. Mwéne ngo wexile o mon’ê umoxi-élele, kexile dingi ni mona wengi, kikale wa diyala mba wa muhatu.
35 Kyoso mwene kya mumono, watandula o izwatu yê yu wadikola: “Ayiwe mon’ami tata! Eye wa ngiluwalesa kyavulu,* kuma wadibhange u muthu u nganda mubhakula. Eme ngabhange kikutu* kwa Jihova.”
36 Mwene wa mutambwijila, wixi: “Tata yami se wabhange kikutu ni Jihova, bhanga n’eme kala ki wakikanena. Mukonda Jihova wa kukwatekesa kuvutwila phonzo ku jinguma jê, akwa Amone.”
37 Mwene wambela tat’ê wixi: “Nganda kubhinga ngo kima kimoxi: Ngehele ngo kuya ku mulundu mukonda kinganda kazala dingi. Ngandaya-ku ngo eme ni makamba mami.”*
38 Mwene wa mwambela, wixi: “Ndé!” Kyenyiki mwene wa mwehela kuya phala kukala-ku mbeji jiyadi. Mukiki, mwene wayi ku mulundu ni makamba mê phala kudila mukonda keji kazala dingi.
39 Kudisukilu dya mbeji jiyadi, mwene wavutuka kwa tat’ê. Kyenyiki, Jefete wakumbidila o kikanenu kyabhangele kyalungu ni mon’ê. Mwene nuka wazekele ni diyala. O kiki kyakituka kijila mu Izalayele.
40 Mivu yoso, mu izuwa iwana ku muvu, o ilumba ya akwa Izalayele exile muya mukunda mon’a Jefete, o mukwa Ngiliyade, phala ku muximana.
Footnotes
^ Mu Heba.: “yó wivwa.”
^ Mu Heba.: “wa ngifukamesa.”
^ Mu Heba.: “ngajikula o dikanu dyami.”
^ Mba, “kudila ni makamba mami, mukonda kinganda kazala, lembwa.”
