Afundixi 14:1-20
14 Sasawu wakulumuka ku Timinate, mwene wamono-ku muhatu mukwa Fidíxa.
2 Kyenyiki, wavutuka kubhata yu wambela manya ni tat’ê, wixi: “Ku Timinate ngamono-ku muhatu mukwa Fidíxa nga muwabhela kyavulu. Ngamesena kwila mu mubhenga,* n’a kale muhat’wami.”
3 Maji, tat’ê ni mam’ê a mwambela, exi: “O kwila kutena kusota muhatu mwaxaxi ka jiphange jetu ni ku mundu wetu? Watokala mwene kusota muhatu mwaxaxi ka akwa Fidíxa akambe ku asaya?” Maji Sasawu watambwijila tat’ê, wixi: “Mubhengyenu mukonda mwene o muhatu watokala phala eme.”*
4 O tat’ê ni mam’ê kejidile kwila Jihova mwene wexile mubhanga o ima yiyi. Mukonda Mwene wexile musota ndunge phala kutolola akwa Fidíxa, kuma o akwa Fidíxa ene exile mutumina akwa Izalayele mu izuwa yenyoyo.
5 Sasawu wakulumuka ku Timinate kumoxi ni jitata jê. Kyoso kyabhixila ku mixi ya mividi ku Timinate, wadisange ni hoji yakexile muzuma.
6 Kyenyiki, Jihova wa mubhana kutena bhukaxi ka nzumbi yê ikôla. Ni maku ahatu, mwene watandula o hoji mu luyadi kala wa mutandula kahombo. Maji mwene katangela o maka yá ku jitata jê.
7 Mukusuluka, Sasawu wakulumuka ku Timinate, yu wadizwelesa ni muhatu. Mwene wexile hanji o muhatu wa wabhele ku mesu mê.
8 Ku pholo dya kwenda, kyoso mwene kyexile muvutuka kya kubhata mu kwambata o muhatu, wa bhambuka phala kutala o hoji ya jibhile. Ku ifuba ya hoji, wasange-ku ndumba ya jinyuki ni wiki.
9 Mwene wakatula o wiki ni maku yu wa udi kyoso kyexile mukwenda. Kyabhixila bhwexile o jitata jê, wa abhana we n’adi. Maji ka atangela kwila wakatwile o wiki mu ifuba ya hoji.
10 Sasawu ni Tat’ê akulumuka kate bhwexile o muhatu. Sasawu anga ubhana fesa yadikota mukonda kiki kyene kyexile o kifwa kya minzangala ya mala.
11 Kyoso o athu kya a amono, ene abheka makwinyi atatu a mayala phala ku mukwatekesa.
12 Kyenyiki, Sasawu wa ambela: “Ngamidyondo, nganda mitela sabhu. Se mu sambwadi dya izuwa mu ngilombolola o sabhu, nganda mibhana makwinyi atatu a izwatu ya linyu ni makwinyi atatu a izwatu yamukwa.
13 Maji se mulembwa kulombolola o sabhu, mwanda ngibhana makwinyi atatu a izwatu ya linyu ni makwinyi atatu a izwatu yamukwa.” Ene amwambela, exi: “Tutangele o sabhu, twamesena ku ivwa.”
14 Mwene wambe wixi:
“Moxi dya mukwa kudya, mwatundu kudya.O moxi dya mukwa nguzu, mwatundu kima kyatowala.”
Mu izuwa itatu ene alembwa ku ilombolola.
15 Mu kizuwa kya kawana ambela o muhatu wa Sasawu, exi: “Ndé u nganale mwadi wê, phala utubhane o dilombolwelu dya sabhu. Se kukibhange, eye ni dibhata dyoso dya tat’enu twanda myoha ni tubhya. Mbe mwa twixana bhabha phala ni muxale ni jimbote jetu?”
16 Kyenyiki, o muhatu wa Sasawu wadidi bhu pholo yê, yu wa mwambela: “Eye nange wa ngizembe! Eye kiwangizolo. Eye wate sabhu ku mundu wami, maji kwangitangela o dilombolwelu.” Sasawu wa mutambwijila, wixi: “Eme kingazwela o dilombolwelu né ngo ku jitata jami. Mukonda dyahi ngeji kutangela?”
17 Mu kithangana kyoso kya fesa ya sambwadi dya izuwa, mwene wasuluka ni kudila bhu pholo yê. Mu kubhixila mu kizuwa kya kasambwadi, Sasawu wa mulombolola o sabhu, mukonda mwene wa mujijidika. Mukusuluka, o muhatu wayi mutangela o dilombolwelu ku mundu wê.
18 Kyenyiki, mu kizuwa kya kasambwadi ande dya dikumbi kuboba,* o mayala a mbanza amutangela:
“Ihi yatowala dingi o wiki ndenge?Ihi yabeta kukala ni nguzu o hoji ndenge?”
Mwene wa atambwijila, wixi:
“Se muhat’wami ka mikwatekesele,*Kimwejitena ku ngilombolwela o sabhu.”
19 Kyenyiki, o nzumbi ya Jihova ya mubhana kutena. Mwene wayi kate ku Axikilone, wajibha-ku makwinyi atatu a mayala. Wakwata o izwatu yâ yu wa ibhana ku mayala atambwijila o sabhu yê. Mwene wexile ni njinda yavulu kyoso kyavutuka kubhata dya tat’ê.
20 Mukusuluka, o muhatu wa Sasawu a mubhana ku mukwatekexi umoxi wa fesa, yó wayile mu muxinjikila.
Footnotes
^ Kilombolola, “o jindandu ja diyala, aya mudikunda o maka ni jindandu ja mon’a muhatu anga ambata o muhatu.”
^ Mu Heba.: “mwéne wa ngiwabhela ku mesu ami.”
^ Mba nange, “ande dya mwene kubokona mu dixilu dyê.”
^ Mu Heba.: “se ki mwakalakalele ni kangombe kami.”
