Afundixi 20:1-48
20 Kyenyiki, o Izalayele yoso yatundu ku Dane ni ku Beleseba ni ku ixi ya Ngiliyade, athu oso anga adyongeka kumoxi* ku pholo ya Jihova ku Mixipa.
2 Kyenyiki, o atwameni a mundu ni miji yoso ya Izalayele amoneka ku pholo ya mundu wa Nzambi, hama jiwana ja midi a masoladi akexile ni jixibhata.
3 O akwa Bejamí eza mu kwijiya kwila akwa Izalayele abandele ku Mixipa.
Kyenyiki, o mayala akwa Izalayele ebhwidisa: “Tutangelyenu, o kima kiki kyayibha kinene, kyabhiti kyebhi?”
4 Kyenyiki, o diyala wavu o muhatu amujibha watambwijila, wixi: “Eme ngabhixila ku Ngibeya ya Bejamí kumoxi ni muhatu wami phala kubhita-ku o usuku.
5 O akwa Ngibeya* a ngilungulukila, akondoloka o inzo mu usuku. Ene amesenene ku ngijibha, maji muveji dya kubhanga kiki, abhange ufusa ku muhatu wami, mwene yu wafu.
6 Kyenyiki, ngakwata ku kimbi kya muhatu wami, ngakibatujula mu jimbandu jimbandu, eme nga jitumikisa ku madyembu a akwa Izalayele, kuma o kima kyabhange mu Izalayele kyayibha kinene, kikwatesa jisonyi.
7 Kindala-phe, enu mu mundu woso wa Izalayele, zwelenu ihi i mubanza ni mubhane kayula.”
8 O mundu woso* wadyambela mudya, exi: “Se-ku muthu wanda vutuka mu balaka yê mba ku dibhata dyê.
9 Kindala, kiki kyene kitwanda bhanga ni akwa Ngibeya: “Tutenu jisolote ni tuye mubhânga nawu.
10 Ku ifuxi yoso ya Izalayele, ku hama, tusola-ku dikwinyi dya mayala, ku midi, tusola-ku hama ya mayala, ku dikwinyi dya midi, tusola-ku midi ya mayala phala kusokejeka kudya, phala o masoladi andaya mubhânga ni akwa Ngibeya ya Bejamí. Kuma abhange kima kibhekela jisonyi mu Izalayele.”
11 Kyenyiki, o mayala oso akwa Izalayele abhange kikutu phala kuya mubhânga ni akwa Ngibeya.
12 Mukusuluka, o miji yoso ya Izalayele yatumikisa mayala ku miji yoso ya Bejamí, mukwamba: Mukonda dyahi mwaxaxi kenu mwabhiti o kima kiki kyayibha kinene?
13 Kindala, tubhakulyenu o mayala ayibha akwa Ngibeya, phala twajibhe ni tuzubhe o kuyibha mu Izalayele.” Maji akwa Bejamí aditunu kubhana o matwi ku jiphange jâ akwa Izalayele.
14 Mukusuluka, akwa Bejamí atundu mu mbanza, adibhongolola ku Ngibeya phala kubhânga ni akwa Izalayele.
15 Mu kizuwa kyenyokyo o akwa Bejamí adibhongolola mu jimbanza jâ, atenesa makwinyi ayadi ni samanu a midi a mayala akexile ni jixibhata. Kwakexile we hama sambwadi a masoladi akwa Ngibeya abetele kukala ni uhete.
16 Mu kifuxi kyenyiki hama sambwadi a masoladi akexile ni uhete, enyoso exile kakyaso. Kala muthu mudyâ, mukutakula o ditadi ni mbalafunda,* kakexile mu lweza né ngo lundemba.
17 O mayala akwa Izalayele abhongolola hama jiwana ja midi a masoladi akexile ni jixibhata, ene exile mazonda, o akambele-ko ngo akwa Bejamí.
18 Ene abande ku Betele phala kwijiya o kibanzelu kya Nzambi. O mundu wa Izalayele webhwidisa: “Nanyi wanda tukala ku pholo phala kubhânga ni akwa Bejamí?” Jihova wa atambwijila, wixi: “Akwa Judá ene anda kala ku pholo.”
19 Mu kamene kaselu akwa Izalayele abalumuka, ya ayi kate bhwa zukamene o mbanza ya Ngibeya phala kubhânga nawu.
20 Akwa Izalayele anga eza phala kubhânga ni akwa Bejamí. O masoladi adisokejeka phala kubhânga ku Ngibeya.
21 Mukyenyiki akwa Bejamí atundu ku Ngibeya. Mu kizuwa kyenyokyo ajibha makwinyi ayadi a midi akwa Izalayele.
22 Maji o masoladi akwa Izalayele alondekesa kuswina, ya adisokejeka dingi phala kubhânga kala kyabhangele mu kizuwa kya dyanga.
23 Akwa Izalayele abande anga adila bhu pholo ya Jihova kate mu usuku, ya ebhwidisa Jihova, exi: “O kwila twatokala dingi kuya mubhânga ni jiphange jetu, o mundu wa Bejamí?” Jihova watambwijila, wixi: “Bandenu, mubhânge nawu.”
24 Kyenyiki, muveji ya kayadi akwa Izalayele ayi kate bhwexile akwa Bejamí.
25 Akwa Bejamí atundu ku Ngibeya phala kubhânga ni ene mu kizuwa kya kayadi, ene ajibha dikwinyi ni dinake a midi ndenge akwa Izalayele, enyoso exile ni jixibhata.
26 Mukonda dyakiki o mayala oso akwa Izalayele abande kate ku Betele, ene adidi ya axikama bhenyobho ku pholo ya Jihova. Mu kizuwa kyenyokyo, afulu o kudya kate mu usuku, ya abhakula jisata ja kwoha ni jisata ja paze kwa Jihova.
27 Mukusuluka, o mayala akwa Izalayele asoto o kibanzelu kya Jihova, mukonda o Alaka ya Kikutu kya Nzambi yakidi yakexile kwenyoko.
28 (Mu thembu yenyoyo, Fineya mon’a Eliyazale, mon’a Alá, wakexile musidivila* kala mukunji.) Ene ebhwidisa: “O kwila tutena dingi kubanda phala kubhânga ni jiphange jetu, o mayala akwa Bejamí, inga kituye dingi?” Jihova wa atambwijila, wixi: “Bandenu kuma mungu nganda kwa abhakula bhu maku menu.”
29 Mukusuluka, akwa Izalayele atumu mayala phala kubatama bhwa zukamene o mbanza ya Ngibeya.
30 Akwa Izalayele abande ku Ngibeya phala kubhânga ni akwa Bejamí mu kizuwa kya katatu, ya adisokejeka phala kubhânga kala kyabhangele muveji jamukwa.
31 Kyoso akwa Bejamí kyatundu phala kubhânga ni kifuxi kya Izalayele, a abhangesa kuya dikanga. Kyenyiki, kala kyabhangele kya, amateka kujibha o mayala akwa Izalayele mu ikoka. Kikoka kimoxi kiya kate ku Betele, o kyamukwa kiya kate ku Ngibeya, ajibha makwinyi atatu a mayala akwa Izalayele mu mukáwu.
32 Kyenyiki, akwa Bejamí ambe: “Twa mwatolola kala ki twabhangele kya.” Mukiki, o akwa Izalayele, ambe: “Tuvutuke bhofele kudima phala kwabhangesa kukala dikanga dya mbanza, n’a kale mu ikoka.”
33 Kyenyiki, o mayala akwa Izalayele atundu mu ididi yâ ya adisokejeka phala kubhânga ku Bahale-Tamale. Kyoso o masoladi akwa Izalayele abatamene kyatundu, ya adisokejeka bhwa zukamene ni akwa Ngibeya, abhânge nawu.
34 Kyenyiki, o dikwinyi dya midi dya masoladi akwa Izalayele akexile dingi ni uhete wa kubhânga, abhixila ku Ngibeya, o ita yatemene kyavulu. Maji akwa Bejamí kejidile kwila o kibwikilu kyâ kyazukamene.
35 Jihova watolola akwa Bejamí bhu pholo ya akwa Izalayele. Mu kizuwa kyenyokyo, akwa Izalayele ajibha makwinyi ayadi a midi ni kitanu ni hama ya mayala akwa Bejamí, enyoso akexile ni jixibhata.
36 O akwa Bejamí abanzele kwila ejitolola o mayala akwa Izalayele, kyoso ene kyavutuka kudima bhu pholo yâ. Maji akwa Izalayele avutukile kudima mukonda adyelele kwila akwa Bejamí eji kwatolola kwa yó abatamene ku Ngibeya.
37 O mayala abatamene atundu ni lusolo lwoso ya atolola o mbanza ya Ngibeya. Ene adimwange ya ajibha o athu oso mu mbanza ni xibhata.
38 O mayala akwa Izalayele adibakanesa ni mayala abatamene kwila ejibhangesa kutunda dixi mu mbanza kala kijimbwete.
39 Kyoso o mayala akwa Izalayele kyavutukile bhofele kudima, o mayala akwa Bejamí amateka kubhânga ni ku ajibha. Ajibha makwinyi atatu a mala akwa Izalayele. Kyenyiki ene ambe: “Se phata, twa mwatolola dingi kala kitwatolola muveji yatundumu.”
40 O dixi anga dimateka kubanda mu mbanza kala dituta. Kyoso akwa Bejamí kyasakuka kudima, ene amono o mulengu wa túbhya mu mbanza yoso wa mubanda ku dyulu.
41 Mukusuluka, akwa Izalayele avutuka ya a mateka kubhânga nawu. O mayala akwa Bejamí aluwalele kyavulu, mukonda amono kwila o kibwikilu kya atula.
42 Mukyenyiki, alenge ku pholo ya mayala akwa Izalayele ya aditela mu kikangalakata, maji katenene kubhuluka mukonda o mayala akexile mutunda mu mbanza akexile mu ajibha.
43 Akwa Izalayele akondoloka akwa Bejamí, a akayela ni nguzu yoso, a ajibha bhwa zukama ni mbanza ya Ngibeya, ku mbandu kutundila o dikumbi.
44 Mukusuka-ku, dikwinyi ni dinake dya midi a mayala akwa Bejamí afu, enyoso exile mazonda.
45 O mayala akwa Bejamí, alengela mu kikangalakata ku ndanji yala ku Limone. O akwa Izalayele ajibha midi jitanu mu ikoka, ya asuluka ni kwa kaya kate ku Ngidome. Kwenyoko ajibha-ku dingi midi jiyadi ja mayala ndenge.
46 Mu kizuwa kyenyokyo, akwa Izalayele ajibha makwinyi ayadi ni kitanu kya midi a mayala akwa Bejamí akexile ni jixibhata, enyoso exile mazonda.
47 Maji hama samanu a mayala alengela mu kikangalakata mu ndanji ya Limone, anga akala kwenyoko ku Limone mu mbeji jiwana.
48 O mayala akwa Izalayele avutuka phala kutolola akwa Bejamí, ajibha ni xibhata, o athu oso mu mbanza ni yama. O jimbanza joso mwabhitile ajite túbhya.
Footnotes
^ Mu Heba.: “kala muthu umoxi.”
^ Mba nange, “avu o ixi.”
^ Mu Heba.: “kala muthu umoxi.”
^ Tala o Dilombolwelu.
^ Mu Heba.: “wakexile mu kwimana.”
