Afundixi 5:1-31
5 Mu kizuwa kyenyokyo Debola ni Balake mon’a Abinowamu, embi o mwimbu yú:
2 “Ximanenu Nzambi mukonda dya yó adibhakula mu Izalayele.Ni mukonda dya masoladi akambele kukuta o ndemba* yâ.Embilenu Jihova!
3 Ivwenu enu mu jisobha! Bhanenu mátwi enu mu jinguvulu!
Nganda kwimbila* Jihova.
Nganda ximana Jihova, o Nzambi ya Izalayele ni mimbu.
4 Jihova, kyoso kiwatundu ku Seyile,Kyoso kiwende tunde ku ixi ya Idomo,O ixi yatunguta, o mvula ya noko,O matuta alundulula o menya.
5 Milundu ya lundumuka* ku pholo ya Jihova,Kate mwene o mulundu wa Sinayi walundumuka ku pholo ya Jihova, o Nzambi ya Izalayele.
6 Mu izuwa ya Sangale mon’a Anate,Mu izuwa ya Jayele, mu ikoka kimwexile mu kwendela muthu.O akwa kwenda njila exile mu bhambukila mu tunjila.
7 Mu Izalayele kimwexile dingi idimakaji.*Kimwexile dingi, kate eme, ngi Debola, ki ngabalumuka,Kate ki ngabalumuka kala ngi mama mu Izalayele.
8 Ene asolo jinzambi jengi.Kyenyiki, mu mabhitu a jimbanza mwexile ita.
O makwinyi awana a midi a Izalayele,Kexile ni ngubu né sosa.
9 Muxima wami walungila ku atwameni a masoladi a Izalayele,Adibhakula kumoxi ni mundu.
Ximanenu Jihova!
10 Enu mwa mukwendela mu jijumendu jazele,Enu mwaxikama mu jitapete ja yuka kinene,Enu mwa mukwendela mu jinjila,Xinganekenu o maka enya!
11 O mázwi a yó ateka o menya phala o ibhaku, a evu bhu matabhu.Kwenyoko azwela o ikalakalu yayuka ya Jihova,O ikalakalu yayuka ya idimakaji ya Izalayele,
Kyenyiki, o mundu wa Jihova wakulumuka kate bhu mabhitu a mbanza.
12 Balumuka, balumuka, Debola!
Balumuka, balumuka wimbe o mwimbu!
Balumuka Balake! Ambata o athu u wakutu, eye u mon’a Abinowamu!
13 Kyenyiki, o asubhuka adibundu ni atwameni.O mundu wa Jihova weza kokwami phala kubhânga ni mazonda.
14 O akwa Efalayíme akexile mu honga.O masoladi mê, eye u Bejamí, akexile kumoxi n’eye,
Ku akwa Makidi kwatundu o atwameni a ita,Ku Nzebulone, yó akalakala ni mbangala ya yó asola o athu phala kuya mu ita.*
15 O ilamba ya Izakale yakexile kumoxi ni Debola,Kala kyexile Izakale ni Balake.
Mwene a mutumikisa yu wende kate mu honga.
O miji ya Lubene yakexile ni jiphata javulu.
16 Mukonda dyahi waxikama ku mabunda* ayadiMu kwivwa o tufunga twa jimbudi kuxika o jimbendu?
O miji ya Lubene yakexile ni jiphata javulu.
17 Akwa Ngiliyade a nangenena ku sambwa yamukwa ya Njolodá,Mukonda dyahi o akwa Dane axala bhwala o jinaviyu?
O akwa Azele axikama ni usudi bhu ndundu ya musanza wa kalunga,Kaxikina kutunda ku matabhu mâ ma jinaviyu.
18 O mundu wa Nzebulone wate o myenyu yâ mu kilwezu, akexile polondo kate mwene phala kufwa ni akwa Nafitali atungu ku milundu.
19 O jisobha jeza ya abhânge ni ene.Mukyenyiki, o jisobha ja akwa Kanana abhânge,Ku Tahanake bhwa zukama o menya a Mejido.
Ene katena kwambata ne ngo kima kimoxi kya phalata.
20 O jithéthembwa jabhânge tunde ku dyulu,Mu jinjila jâ o jithéthembwa jabhânge ni Xixela.
21 O ngiji ya Kixone ya akungulula.O ngiji yokulu, o ngiji ya Kixone.
O yó ala ni kutena, eme ngayi ni ku adyota-dyota.
22 Mukyenyiki, o makanda a jikabalu abhangesa o mavu kutunguta, Kyoso o jikabalu ja ita ki jayi ni kulenga ni njinda yoso.
23 O anju ya Jihova yambe: ‘Bhubhidilenu Melozo.’‘Kyene mwene, bhubhidilenu o athu atungu mwenyomo,Kuma keza mu kwatekesa Jihova,Keza ni masoladi mukwatekesa Jihova.’
24 Ku ahatu, o wabeta-kota mu ku mubesowala Jayele,O muhatu wa Ebele mukwa Kene.Ku ahatu oso atungu mu jibalaka, mwéne wabeta-kota mu ku mubesowala.
25 Mwene wa mubhingi menya, Jayele wa mubhana lete.
Mwene wa mubhana lete mu ditijela dya fwama.
26 Mwene wasununa o lukwaku, yu wakwata o phaphu ya balaka,Ni lukwaku lwa kadilu wakwata o malutelu ya akalakadi.
Watutujula o mútwe wa Xixela ni maluteluO mútwe anga ubudika.
27 Mwene wabwila mu inama yê. Bhwa bwila bhwene bhwaxala.Wabwila bhu inama yê.Bhenyobho bhwa bwila, bhwene bhwa mutolola.
28 Sayi muhatu wexile mutalela mu njanena.
Mama ya Xixela wexile mu mutalela.
Mwene wexile mudibhwidisa: ‘Mukonda dyahi o dikalu dyê dya mulaleka?Mukonda dyahi o jibuya ja makanda a jikabalu jamulaleka?’
29 O kilumba kya betele-kota mu unjimu wexile mu mutambwijila.Kyene, mwene wakexile mubhitulula o izwelu yiyi phala mwéne mwene:
30 ‘Ene nange amuwana o ima yasange.Kilumba kimoxi, ilumba iyadi phala disoladi dimoxi.Milele yala ni jikolo javulu phala Xixela, milele yala ni jikolo javulu.Kizwatu kimoxi kyotunge ni uhete mu jimbandu, mulele wala ni jikolo javulu, izwatu yotunge ni uhete,Phala o xingu ya yó atambula o ima ya akwa.’
31 O jinguma jé, u Jihova, jibwike kyenyiki.Maji o yó akuzolo abhenya kala o mwanya.”
O ixi anga ikala ni kutululuka mu makwinyi awana a mivu.
Footnotes
^ Nange, “kijimbwete kya kwila, abhange kikanenu mba adibhakula kwa Nzambi.”
^ Mba, “nganda bhanga mwimbu.”
^ Mba nange, “yateketa.”
^ Mba, “yajimuka.”
^ Mba nange, “yó akalakala ni falamenda ya kusoneka.”
^ Kifwa, “mabunda ambata o yama.”
