Dyalwilu 24:1-25
24 Kyoso Balamu kyamono kwila Jihova wamesenene mwene* kubesowala akwa Izalayele, kayi dingi musota mizambu,* maji walungila o pholo mu kikangalakata.
2 Kyoso Balamu kyabhetula o mesu yu wamono akwa Izalayele emikine o jibalaka jâ kala kya asokejekele mu miji yâ, o nzumbi ikôla ya Nzambi ya mutula.
3 Mwene anga utumbula o izwelu yiyi:
“Izwelu ya Balamu mon’a Bewole,Izwelu ya diyala a mujikula o mesu,
4 Izwelu ya yó wívwa o mak’a Nzambi,Wamono o kisumwa kya Muteni wa Yoso,Wadyondela ni mesu ajikuka:
5 Jibalaka jé kuwabha kwahi, éye Jakobo,O mabhata mé, éye Izalayele!
6 Adizale kala jihonga,Kala jijaludim ku mbandu a ngiji,Kala alowé yakunu Jihova,Kala mixi ya misedulu bhu mbandu a menya.
7 Menya abwabumuka mu itutu yé iyadi,O mbutu yé yokune bhu mbandu a menya avulu.
Kikyene ngo, o sobha yé yanda túnda Akake,O utuminu wé anda uzangeleka.
8 Nzambi wa mu akatula ku Ijitu,Mwene ukwatekesa Izalayele ni kutena kwê kala o jingela ja phakasa.
Izalayele wanda bwika o ifuxi yene mu mutatesa,Wanda kwa ajibha ni jisosa jê.
9 Izalayele wabutama, wazeka kala hoji,Kala kibhita ni hoji, nanyi udikaka ku mubalumuna?
Oso abesowala Izalayele, anda ku abesowala we,Oso abhubhidila Izalayele, anda ku abhubhidila we.”
10 Balake anga ukala ni njinda ya Balamu. Balake waxongwena mu kubeta jindamba, yu wambela Balamu: “Ngakwixana phala kubhubhidila o jinguma jami, maji mu lutatu lwos’ulu, eye wa abesowalé ngo.
11 Vutuke kya kubhata. Eme ngamesenene ku kujingisa kyavulu, maji Jihova wa kufidisa kutambula o kijingu.”
12 Balamu wambela Balake, wixi: “Eme ngambela kya o akunj’ê:
13 ‘Né mwene se Balake u ngibhana o inzo yê yezala ni phalata ni ulu, eme kingitena kubhanga kima mu vondadi yami*, kikale kyawabha mba kyayibha, ki bhukumukina o kitumu kya Jihova. Nganda zwela ngo yoso i ngitangela Jihova phala kuzwela.’
14 Kindala, ngamuyami ku mundu wami. Maji nganda kutangela hanji o ima yanda bhanga o mundu yú, ku mundu wé ku hádya.”*
15 Mwene anga utumbula o izwelu yiyi:
“Izwelu ya Balamu mon’a Bewole,Izwelu ya diyala a mujikula o mesu,
16 Izwelu ya yó wívwa o mak’a Nzambi,Ni yó wala ni kwijiya kwa Sukeku.Wamono o kisumwa kya Muteni wa Yoso,Wadyondela ni mesu ajikuka:
17 Nganda mumona, maji kikindala,Nganda mutonginina, maji kwakambe hanji.
Kwa Jakobo kwanda tunda thethémbwa,Kwa Izalayele, kwanda balumuka mbasá.
Mwene sé phata, wanda bula o dibhômo dya Mowabe,Ni mítwe ya isweya yoso.
18 Idomo yanda kituka undundu,Kyene, Seyile undundu wa jinguma jê,Maji Izalayele wanda londekesa o kuswina kwê.
19 Kwa Jakobo kwanda tunda muthu wanda tumina,Mwene wanda bwika woso wanda subhuka mu mbanza.”
20 Kyoso mwene kyatale kwa Amaleke, wasuluka ni izwelu yê, wixi:
“Amaleke kyene o kifuxi kya dyanga,*Maji ku disukilu, anda kibwika.”
21 Kyoso kyatale ku akwa Kena, mwene wasuluka ni izwelu yê, wixi:
“Watungu wasomo, o dibhata dyé dyala bhu ndanji.
22 Maji sayi muthu wanda bwika akwa Kena* ni túbhya.
Phala ku akwika ku akwa Asídya, kwanda kamba hanji thembu kuxi?”
23 Mwene wasuluka ni izwelu yê, wixi:
“Wawe! Nanyi wanda subhuka, kyoso Nzambi kyanda bhanga kiki?
24 Ku ndundu ya Kitime kwanda tunda jinaviyu,Akwa Asídya anda ku abwikisa,Akwa Hebele anda ku abwikisa.
Maji mwene anda mubwikisa we.”
25 Kyenyiki, Balamu wayi ni njila yê. Balake anga uya we ni njila yê.
Footnotes
^ Mu Heba.: “kyawabhele ku mesu a Jihova.”
^ Mba, “ijimbwete.”
^ Mu Heba.: “ni muxima wami.”
^ Mba, “kudisukilu dya izuwa.”
^ Kifwa, kyene o kifuxi kya dyanga kuzoka ni akwa Izalayele kyoso kya tundu ku Ijitu.
^ Mu Heba.: “Kayini.”
