Dyalwilu 4:1-49
4 Jihova wambela-phe Mozé ni Alá, wixi:
2 “Sonekesenu o an’a Kohate bhukaxi ka an’a Levi mu miji yâ ni mabhata a jitata jâ,
3 oso ala ni makwinyi atatu ndu makwinyi atanu a mivu abhanga mbandu ku kibuka kya athu a asolo phala kukalakala mu balaka ya kudyongekela.
4 “Kiki kyene o kikalakalu kya an’a Kohate mu balaka ya kudyongekela. Kima kikôla kinene.
5 Kyoso akwa Izalayele kyatunda kididi anga aya kididi kyengi, Alá ni an’ê anda bokona, anda katula o kulutina ya kibatulu, anda vunga-nayu o Álaka ya Umbangi.
6 Ku thandu dyê anda ta-ku kivunginu kya kibha kya foka,* anda kizala ku thandu a kulutina ya azulu,* anda ta-ku o mikambu phala ku ituta.
7 “Anda zala we kulutina ya azulu ku thandu a meza a jimbolo jikôla, anda ta-ku o malonga, o jikopho, o matijela ni jijala* ja jisata ja kunwa. O jimbolo jene mubhakula ithangana yoso, jatokala kukala jinga ku meza.
8 Ku thandu a ima yiyi mwanda zala-ku kulutina yakusuka. Ku thandu a meza mwanda ta-ku kivunginu kya kibha kya foka, mwanda ta-ku o mikambu phala ku ituta.
9 Mukusuluka ene anda kwata kulutina ya azulu, anda vunga-nayu o ditudilu dya tundeya dya kumwikina, ni tundeya we, o ijiminu, o ididi ya kutula o makala, ni ima yoso muya o máji, phala tuye ni kumwika.
10 Ene anda vunga o ditudilu dya tundeya ni ima yê yoso mu kivunginu kya kibha kya foka, anda itula ku thandu a dibaya phala ku ituta.
11 Ku thandu a kalatódyu ka ulu ene anda zala-ku kulutina ya azulu, anda ta-ku kivunginu kya kibha kya foka, anda ta-ku we o mikambu phala ku ituta.
12 Anda katula-phe o ima yoso ya kukalakala-nayu mu kididi kikôla ithangana yoso, anda itula mu kulutina ya azulu, ku thandu a ima yiyi, anda ta-ku kivunginu kya kibha kya foka, anda itula ku thandu a dibaya phala ku ituta.
13 “Atokala kukatula o uthôkwa* wa kalatódyu ni kuzala-ku kulutina ya jidinya ja pulúpula.
14 Ku thandu dyê anda ta-ku o ima yoso ya kukalakala-nayu bhu mbandu a kalatódyu: O ididi ya kutula o makala, o jingalufu,* o ivotelu ni matijela, ima yoso yatokala ku kalatódyo. Ku thandu dyê anda ta-ku kivunginu kya kibha kya foka ni kuta-ku mikambu phala ku ituta.
15 “Kyoso akwa Izalayele kyanda katuka phala kuya kididi kyengi, Alá ni an’ê anda zubha kuvunga o kididi kikôla ni ima yoso ya kididi kikôla. Kyenyiki, o an’a Kohate anda bokona phala ku ituta, maji katokala kukwata mu ima yala mu kididi kikôla phala kafwe. Kiki kyene o kikalakalu* kya an’a Kohate mu balaka ya kudyongekela.
16 “Eliyazale mon’a Alá o mukunji, mwéne wala ni kikalakalu kya kulanga o máji a kumwikina, o wasu wadizumba unuha kyambote, o sata ya makudya yene mubhakula ithangana yoso ni máji a ku unda. Mwéne ulanga o balaka yoso ni ima yoso yala-mu kumoxi ni kididi kikôla ni ima yê.”
17 Jihova wambela dingi Mozé ni Alá, wixi:
18 “Kimwehele o miji ya akwa Kohate ku ajima o mbutu bhukaxi ka Jilevita,
19 phala n’akale ku mwenyu, kafwe mukonda dya kuzukama mu ima ikôla kinene. Mubhanga kiki: Alá ni an’ê anda bokona, muthu ni muthu anda mubhana o kikalakalu kyê ni ima yanda tuta.
20 Ene katokala kubokona, katokala we kumona o ima ikôla né mu kakithangana kofele ngo, phala kafwe.”
21 Jihova wambela-phe Mozé, wixi:
22 “Mwatokala kusonekesa o an’a Ngelexone mu mabhata a jitata jâ ni miji yâ.
23 Watokala kusonekesa oso ala ni makwinyi atatu ndu makwinyi atanu a mivu, atokala ku kibuka kya athu a asolo phala kukalakala mu balaka ya kudyongekela.
24 O miji ya akwa Ngelexone a asolo phala kulanga ni
25 kututa o jikulutina ja balaka, o balaka ya kudyongekela, o kivunginu kyê, o kivunginu kya kibha kya foka kyala ku thandu dyê, o kulutina ya mwelu wa balaka ya kudyongekela,
26 o jikulutina ja kithádi, o kulutina ya mwelu wa kithádi ikondoloka o balaka ni kalatódyu, o mikolo yê ya kufikidila, ni ima yê yoso, ni yoso ibhanga mbandu mu kikalakalu kiki. Kiki kyene o kikalakalu kyâ.
27 Alá ni an’ê, éne anda kala ku pholo ni kulanga o ikalakalu yoso ya akwa Ngelexone ni ima yoso yanda tuta. O kikalakalu kya kulanga o ima yoso yanda tuta, ene a anda ibhana ku akwa Ngelexone.
28 Kiki kyene o kikalakalu kyatokala kubhanga o miji ya akwa Ngelexone mu balaka ya kudyongekela. O muthu wanda kala ku pholo mu kulanga o ikalakalu yâ, Itamale mon’a Alá, o mukunji.
29 “Yalungu ni an’a Meladi, watokala ku asonekesa mu miji yâ ni mabhata a jitata jâ.
30 Wanda sonekesa oso ala ni makwinyi atatu ndu makwinyi atanu a mivu abhanga mbandu ku kibuka kya athu a asolo phala kukalakala mu balaka ya kudyongekela.
31 O ima yatokala kututa kala kikalakalu kyâ mu balaka ya kudyongekela, yenyiyi: o mabaya a balaka, o mixi yê, o jiphiladi jê, o ibaka yê ni kifikidilu,
32 o jiphiladi jikondoloka o kithádi, o ibaka yê ni kifikidilu, o jiphapha jê ni mikolo yê ya kufikidila, kumoxi ni ima yê yoso ni yoso yalungu ni kikalakalu kiki. Mwatokala ku asola mu majina mâ, kala muthu ni kimbamba kyê kyatokala kututa.
33 Kiki kyene kyatokala kukalakala o miji ya an’a Meladi mu balaka ya kudyongekela. Itamale mon’a Alá o mukunji, mwéne wanda ku akalela ku pholo.
34 Kyenyiki, Mozé ni Alá ni atwameni a mundu asonekesa o an’a akwa Kohate mu miji yâ ni mabhata a jitata jâ,
35 oso exile ni makwinyi atatu ndu makwinyi atanu a mivu atokalele ku kibuka kya athu a asolo phala kukalakala mu balaka ya kudyongekela.
36 Athu oso a asonekesa kala kyadisokejeka mu miji yâ, atenesa midi jiyadi ni hama sambwadi ni makwinyi atanu.
37 Yá ene o athu oso a asonekesa ku miji ya akwa Kohate oso exile mu kalakala mu balaka ya kudyongekela. Mozé ni Alá a asonekesa kala o kitendelesu kyabhanene Jihova bhukaxi ka Mozé.
38 O An’a Ngelexone a asonekesa mu miji yâ ni mabhata a jitata jâ,
39 oso exile ni makwinyi atatu ndu makwinyi atanu a mivu atokalele ku kibuka kya athu a asolo phala kukalakala mu balaka ya kudyongekela.
40 Athu oso a asonekesa kala kyadisokejeka mu miji yâ ni mu mabhata a jitata jâ, atenesa midi jiyadi ni hama jisamanu ni makwinyi atatu.
41 Yá ene a asonekesa ku miji ya an’a Ngelexone, oso exile mu kalakala mu balaka ya kudyongekela. Mozé ni Alá a asonekesa kala o kitendelesu kya Jihova.
42 O an’a Meladi a asonekesa mu miji yâ ni mabhata a jitata jâ,
43 oso exile ni makwinyi atatu ndu makwinyi atanu a mivu atokalele ku kibuka kya athu a asolo phala kukalakala mu balaka ya kudyongekela.
44 Athu oso a asonekesa kala kyadisokejeka mu miji yâ, atenesa midi jitatu ni hama jiyadi.
45 Yá ene a asonekesa kwa Mozé ni Alá ku miji ya an’a Meladi, kala o kitendelesu kyabhanene Jihova kwa Mozé.
46 Mozé ni Alá ni atwameni akwa Izalayele asonekesa o Jilevita joso jiji mu miji yâ ni mabhata a jitata jâ.
47 Ene exile mu kitala kya makwinyi atatu ndu makwinyi atanu a mivu. Oso a asolo phala kukalakala ni kututa o ima yalungu ni balaka ya kudyongekela.
48 Athu oso a asonekesa atenesa dinake dya midi ni hama jitanu ni makwinyi anake.
49 A asonekesa kala o kitendelesu kyabhanene Jihova kwa Mozé. Kala muthu ni kikalakalu kyê kya mubhana, ni ima yatokalele kututa. A asonekesa kala kyatendelesele Jihova kwa Mozé.
Footnotes
^ Mba, “dikunji.” Kiki kyama kya menya.
^ Mba, “kilombelombe.”
^ Mba, “jinjotona.”
^ Mba, “uthôkwa wala ni banya,” kifwa uthôkwa wala ni banya ya jisata.
^ Mba, “inyangenu; misandu.”
^ Mu Heba.: “kimbamba.”
